Ndikimi zvarritës i pandemisë së koronavirusit – i ndërthurur me luftën në Ukrainë, rritjen e inflacionit dhe kostot e energjisë dhe karburantit – e bëri 2022 një vit të vështirë për shitjen e makinave.

Por shitjet e makinave elektrike mbetën praktikisht të paprekura dhe, në fakt, thyen një rekord të ri në Bashkimin Europian, sipas shifrave të publikuara këtë muaj nga Shoqata Europiane e Prodhuesve të Automobilave (ACEA).

Në tremujorin e fundit 2022, automjetet me motor alternativ (Alternative Propulsion Vehicles – APV) zunë më shumë se gjysmën e tregut automobilistik në BE (53.1%), me më shumë se 1.3 milionë automjete të regjistruara në total.

APV janë automjete që nuk djegin lëndë djegëse tradicionale fosile që rrjedhin nga nafta, ose përdorin një sistem hibrid që fuqizohet nga një motor me karburanti fosil, i mbështetur nga një burim energjie të rinovueshme, siç janë bateritë elektrike.

Në terma tremujorë, Shoqata deklaroi se ishte hera e parë që shitjet e APV ishin më të larta se shitjet e automjeteve me benzinë dhe naftë.

Edhe makinat elektrike me bateri (BEV) – thyen rekordin në vitin 2022, duke zënë 12.1% të pjesës totale të tregut, krahasuar me 9.1% në 2021, dhe 1.9% në 2019.

Makinat hibride patën ecuri të kënaqshme, duke arritur 22.6% të pjesës totale të tregut, me rritje me 22.2% krahasuar me të njëjtën periudhë të vitit 2021.

Tremujori i fundit i 2022 – periudhë së cilës i referohet ACEA në raport – ishte veçanërisht i qëndrueshëm për tregun e BEV, që regjistroi rritjen më të madhe.

Nga tetori deri në dhjetor, shitjet e makinave të reja elektrike me bateri në BE u rritën me 31.6%, duke arritur në total 406.890 njësi të shitura.

Pjesa më e madhe tregjeve të BE regjistruan rritje të makinave BEV, veçanërisht Gjermania, me 198.293 njësi të shitura. Franca renditet e dyta, me 62.155 njësi, dhe Suedia e treta, me 37.013 njësi të regjistruara.

Vendet me më pak BEV të shitura ishin Qipro, me vetëm 108 njësi të reja të shitura në 2022, Estonia (202 njësi) dhe Bullgaria (325 njësi). Qipro, megjithatë, me shifrat e saj modeste, regjistroi një rritje më të ndjeshme të shitjeve të BEV krahasuar me vitin 2021 (671.4% më shumë), ndjekur nga Letonia (+199.2%) dhe Suedia (+84.3%).

Dhjetë vite më parë, vetëm 0.5% e tregut automobilistik përbëhej nga automjete elektrike (BEV, makina elektrike hibride plug-in, apo PHEV).

Makinat me benzinë vijojnë të humbin terren

Raporti thotë gjithashtu se makinat me benzinë dhe naftë po humbin gradualisht terren. Megjithatë, së bashku, ato përfaqësojnë më shumë se gjysmën e shitjeve të makinave në BE në vitin 2022, me 52.8% (përkatësisht 16.4% e 36.4%).

Shitjet e makinave me naftë regjistruan një tendencë në rënie, me rënie me 19.7%, veçanërisht në Francë dhe Belgjikë. Në të dyja vendet po rritet numri i zonave me emetime të ulëta, që parandalojnë qarkullimin e automjeteve me naftë.

“Sot klientët janë më të informuar; sot shumë më pak klientë vijnë në koncesionar dhe kërkojnë të blejnë makinë me naftë, pasi e dinë që së shpejti, do të ndalohet” – shpjegoi Alix Couturier, konsulent shitjesh në Autothivolle, një grup koncesionar makinash në Francë.

“Ndër të tjera, çmimi i karburantit është rritur mbi 20 euro për litër. Tani krahasoheni këtë të dhënë me atë të një makine elektrike, që kushton 1,80 € për 100 kilometra, duke përfshirë rikarikimin dhe mirëmbajtjen. Nuk është e nevojshme të bëhen llogaritje të mëdha për të kuptuar që makinat elektrike janë shumë më të leverdishme”.

Në Francë tashmë është ndaluar qarkullimi i disa modeleve me naftë dhe benzinë në disa qytete. Lioni, për shembull, do ta ndalojë plotësisht qarkullimin e makinave me naftë dhe një pjesë të madhe të atyre me benzinë në vitin 2026./Media Ndërtimi