Ndërmarrja Publike Banesore SH.A. Prishtinë (NPB) e drejtuar nga Hajdar Hoxha, kishte kontraktuar një person jokompetent, i cili kundërligjshëm ka bërë përcaktimin e kufirit ndërmjet dy parcelave në Lakrishtë në kuadër të përgatitjes së dokumentacionit për të ndërtuar projektin e dyshimtë milionësh afaristo-banesor të NPB-së.
Personi i angazhuar nga NPB-ja është Haki Selmani me kualifikim “TEKNIK GJEODET I LICENSUAR” që ligjërisht përkufizohet si person fizik me shkollim të mesëm.
Sipas Udhëzimit Administrativ Nr.13/2019 për Licencimin e Kompanive Gjeodete dhe Gjeodetëve, neni 5, TEKNIKU GJEODET I LICENSUAR, në këtë rast, Haki Selmani nuk ka të drejtë të bëjë PËRCAKTIM TË KUFIJVE TË PARCELAVE, si ka vepruar, por vetëm ndarje të pacelave, bashkim të pacelave dhe piketim të parcelave, siç thuhet qartë edhe në licencën e tij. (Shih dokumentin më poshtë).
Sipas Nenit 4, paragrafit 1, nëparagrafi 1.2 të këtij akti nënligjor, përcaktimi i kufijve të parcelave është kompetencë ekskluzive e personave të kualifikuar si GJEODET I LICENCUAR ose KOMPANI GJEODETE TË LICENCUARA.
I pyetur përmes telefonit pse ka vepruar kundër ligjit dhe licensës së punës, Selmani thekson se “ka menduar që ka të drejtë”. Në bisedë e sipër ai zbulon edhe një informacion tjetër, që nëse vërtetohet, përveç në këtë rast, implikon në shkelje të vazhdueshme ligjore drejtorinë e Kadastrit të Komunës së Prishtinës që aktualisht udhëhiqet nga Valbona Osmani Mehmetaj. Selmani bën të ditur se lëndë të karakterit të njëjtë ka kryer qe një dekadë dhe askush nuk i ka dhënë vërejtje.
“Unë qe 10 vjet kam kryer landë të tilla me karakter të njëjtë dhe e kam të shkruar aty piketim i parcelave dhe unë e kam nënkuptu që kam të drejtë….Unë e kam kuptu që kam të drejtë se landë të tilla kam kryer dhe kam dorëzu në kadastër dhe i kam kryer pa vërejtje. Kurrkush kurrë nuk më ka dhënë vërejtje për atë punë”, theksoi përmes telefonit tekniku gjeodet i licencuar, Haki Selmani, i cili siç shihet në dokumentet më poshtë i është referuar vetës edhe si gjeodet i licensuar ndonëse në vulë i shkruan qartë se është teknik.
Nga burimet brenda Komuna e Prishtinës merret vesh se Agjencia Kadastrale e Kosovës ka kërkuar nga Kadastri i Komunës që ta rishqyrtoj lëndën dhe të evitoj shkeljet ndërsa nga Komisioni për Licencim që të ndërmerr masat e nevojshme ndaj Teknikut Gjeodet, Haki Selmani.
Komuna e Prishtinës e drejtuar nga Shpend A. Ahmeti ende nuk është deklaruar për këtë çështje.
Kujtojmë se lënda me këto shkelje dhe pa pëlqimin e AKP-së është miratuar nga Drejtoria e Kadastrit e Komunës së Prishtinës, e cila i ka hapur rrugë lëshimit të lejes së ndërtimit për realizimin e projektit milionësh afaristo-banesor të NPB-së, për të cilin janë shfaqur publikisht fakte, dëshmi, akuza e pretendime të bazuara për shkelje ligjore dhe procedurale që nga faza tenderuese e deri te dhënia e lejeve nga Komuna e Prishtinës që kulmuan me skandalin mjedisor të shkatërrimit të azbestit pa kontroll duke rrezikuar shëndetin e banorëve.
Prokuroria ende nuk ka kthyer përgjigje nëse i ka nisur hetimet. (Artikulli është shkruar nga gazetari i televizionit publik të Kosovës: Arsim Halili)./Media Ndërtimi.