Masat e izolimit gjatë pandemisë së koronavirusit nuk kishin qenë kurrfarë pengese për persona të panjohur që vandalizuan Parkun Arkeologjik të Apolonisë. Dy muaj më parë u dëmtuan rëndë dy kolona të nimfeut (fontanës) monumentale të Apolonisë – një sit arkeologjik që është në Listën e Trashëgimisë Botërore të UNESCO-s. Ndërsa zyrtarisht thuhet se situata është në dorë të forcave të rendit dhe Prokurorisë, Ministria e Kulturës në Tiranë po e konsideron angazhimin e pjesëtarëve të shoqërisë shtetërore të sigurisë “Illyrian Guard” për ruajtjen e të gjithë muzeve, siteve arkeologjike dhe institucioneve të tjera kulturore.
Nëpërmjet një kumtese për media, ministrja e drejtuar nga Elva Margariti të hënën ka komentuar rastin e dëmtimit të dy kolonave në Parkun Arkeologjik të Apolonisë për t’i vënë fre, siç kanë thënë, dezinformimit të mbështetur në hamendësime dhe keqinterpretime rrjetesh sociale pa asnjë burim zyrtar.
“Ministria e Kulturës nuk ka bërë asnjë përpjekje për të fshehur dëmtimin e dy kolonave, por ka ndjekur rrugën ligjore për zbardhjen e këtij akti vandal dhe ka marrë masa të menjëhershme për hartimin e projektit për ringritjen e tyre. Dy kolonat e fasadës së fontanës monumentale të Apolonisë janë dëmtuar dy muaj më parë, gjatë izolimit nga COVID-19. Ato janë gjetur të dëmtuara gjatë kontrollit nga punonjësit e Zyrës së Administrimit dhe Koordinimit të Parqeve Arkeologjike Apoloni dhe Bylis, në datën 13 prill 2020”, thuhet në njoftimin e institucionit më të lartë kulturor në Shqipëri.
Sipas Ministrisë, pas lajmërimit të Drejtorisë së Policisë Vendore në Fier, ngjarja tashmë është duke u hetuar nga Policia e Shtetit dhe Prokuroria. Po ashtu, siç bën me dije kumtesa, Zyra e Administrimit dhe Koordinimit të Parqeve Arkeologjike në Apoloni dhe Bylis ka vënë në dijeni Ministrinë e Kulturës dhe Institutin Kombëtar të Trashëgimisë Kulturore.
Për Ministrinë e Kulturës, e cila bazohet në vlerësimin e specialistëve, nuk ka asnjë humbje të parikuperueshme në këtë monument.
Kjo kumtesë ka bërë të ditur se Zyra e Administrimit dhe Koordinimit të Parkut ka hartuar menjëherë një projekt restaurimi, i cili është miratuar tashmë në Këshillin Shkencor të Institutit të Monumenteve dhe në Këshillin Kombëtar të Trashëgimisë Kulturore të Ministrisë së Kulturës.
“Puna për ringritjen e kolonave dhe restaurimin e tyre do të nisë në ditët në vijim”, thuhet tutje në kumtesë.
Duke e cilësuar Parkun e Apolonisë si nga më të rëndësishmit në Shqipëri, Ministria e Kulturës ka vlerësuar se ruajtja e një sipërfaqeje prej 700 hektarësh ka shfaqur vështirësi përgjatë viteve.
Ministria e drejtuar nga Margariti ka shtuar se është duke bashkëpunuar me shoqërinë shtetërore të sigurisë, “Illyrian Guard”, për vendosjen nën ruajtje të të gjitha muzeve, siteve arkeologjike dhe institucioneve të tjera kulturore.
“‘Illyrian Guard’ operon përmes sistemit digjital të ruajtjes, duke siguruar një kontroll më të mirë të territorit, duke tejkaluar problematikën e pamundësisë së mbikëqyrjes fizike të objekteve të trashëgimisë kulturore”, thuhet në kumtesë./KOHA/
You must be logged in to post a comment Login