Autoriteti Rrugor Shqiptar njoftoi se do të nisë rehabilitimi i shtresave asfaltike në aksin rrugor Tiranë-Durrës.

Rruga që ka dëmtime të shumta dhe që jo pak herë është bërë objekt ankese edhe në vitet e shkuara duket se edhe për këtë vit do t’u nënshtrohet arnave të reja në fillim të sezonit turistik veror.

“Në kuadër të zbatimit të kontratës së mirëmbajtjes, ditën e sotme do të fillojë rehabilitimi i shtresave asfaltike të aksit rrugor Tiranë–Durrës. Procesi i punës do të fillojë nga Sukthi në drejtim të Tiranës.

Do të punohet me njërën korsi, përkohësisht të bllokuar për një gjatësi prej 500 m, sipas skemave të miratuara të menaxhimit të trafikut në bashkëpunim me Policinë Rrugore.

Njëra korsi lëvizjeje do të jetë e lirë për drejtuesit e mjeteve dhe tjetra do të jetë përkohësisht e bllokuar në një gjatësi prej 500 m. Me përfundimin e punës në këtë gjatësi, bllokimi do të spostohet në 500 m të tjerë për vijimin e punës.

Me qëllim shmangien e aksidenteve, udhëzojmë drejtuesit e mjeteve, të zbatojnë sinjalistikën rrugore të vendosur në objekt. Kërkojmë mirëkuptimin e përdoruesve të rrugës dhe drejtuesve të mjeteve për këtë ndërhyrje që do të kryhet”, njoftoi ARRSH.

Ndërkohë më herët ARRSH ka çelur procedurat e prokurimit për disa akse të rëndësishme ku ndër të tjera bën pjesë edhe zgjerimi i Tiranë-Durrës.

Në fillim të prillit u çelën disa procedura me fond limit 120 milionë euro ku bënte pjesë zgjerimi i superstradës Tiranë-Durrës, rikonstruksion i rrugës së vjetër Kombinat – Ndroq – Plepa, Loti 1” me një fond limit 754 milionë lekë.

Po kështu ishte zgjerimi i rrugës Elbasan-Qafë Thanë që aktualisht është duke u punuar në lotet 1-4 teksa tashmë janë hapur procedurat për lotin 5 me një fond limit 2.49 miliardë lekë, loti 6 me fond limit 2.48 miliardë lekë, loti 7 me fond limit 2.47 miliardë lekë dhe loti 8 me 2.49 miliardë lekë.

Një tjetër projekt është ai për rrugën Berat-Ballaban loti i parë me një fond limit 1.9 miliardë lekësh dhe loti i dytë me një fond limit 2.25 miliardë lekë. Projekti i fundit shtrihet në Jug të vendit dhe lidhet me zgjerimin e rrugës së Ksamilit për të cilin është parashikuar një fond limit 1.66 miliard lekë.

Një grup i parë matësash inteligjentë po instalohet aktualisht tek konsumatorët në disa lokalitete si pjesë e një programi pilot të kryer nga Ministria e Energjisë me mbështetjen e PNUD-it në Moldavi. Programi do të zgjerohet më vonë, falë mbështetjes financiare të Qeverisë Italiane, të ofruar nga UNDP.

Një pjesë e matësve janë instaluar nga Premier Energy Distribution në komunën e Kishinau dhe gjashtë periferi dhe një pjesë tjetër – nga RED Nord, në rajonin verior, duke përfshirë periferinë e Bălți. Matësit janë instaluar në amvisëri të përzgjedhura sipas kritereve të vendndodhjes gjeografike, dendësisë së popullsisë, cenueshmërisë së energjisë, gjendjes socio-ekonomike, disponueshmërisë së infrastrukturës etj.

Matësit inteligjentë do të matin konsumin në intervale të shkurtra, parametrat e cilësisë së energjisë dhe do t’i transmetojnë të dhënat automatikisht, në mënyrë të sigurt dhe pa gabime te furnizuesi i energjisë, pa qenë nevoja që punonjësit e kompanive të shpërndarjes të lexojnë fizikisht matësat. Në të njëjtën kohë, furnizuesi do të faturojë konsumin aktual të energjisë, jo të vlerësuar dhe shpërndarësi do të jetë në gjendje të identifikojë aksidentet më shpejt dhe të zvogëlojë kohën e përgjigjes.

Të dhënat e mbledhura në kuadër të programit do të përdoren për të zhvilluar politika të reja për konsum më efikas. UNDP dhe BE po testojnë disa zgjidhje teknike që mund të shtrihen në të gjithë vendin, duke përfshirë programin pilot për instalimin e matësve inteligjentë dhe programin “Rabla për pajisjet shtëpiake” për të zëvendësuar pajisjet që konsumojnë energji me ato me efikasitet energjie.

Më shumë se 50% e njehsorëve në BE janë inteligjente, gjë që ka reduktuar konsumin komercial deri në 15% dhe konsumin teknik me 5%. Rrjetet inteligjente nxiten nga nevoja për të minimizuar konsumin në mbarë botën për të frenuar humbjet e burimeve dhe ngrohjen globale./Media Ndërtimi

160 mijë euro ka kushtuar renovimi i objektit të Psikiatrisë së Fëmijëve dhe Adoleshentëve, e 110 mijë renovomi i objektit të Psikiatrisë Intensive në QKUK.

Këto renovime janë bërë përmes Projektit të Kosovës për Efiçiencë të Energjisë dhe Energji të Ripertëritshme, i financuar nga Banka Botërore përmes kredisë së IDA-së.

Ministri i Shëndetësisë, Arben Vitia, në përurimin e objekteve sot, më 14.05.2024, tha se fëmijët dhe adoleshentët do të mund të hospitalizohen, ndryshe nga deri më tani, që kanë marrë vetëm shërbime ambulantore, në mungesë të shtretërve.

Po ashtu, tani e tutje, përveç diagnostikimit janë krijuar kushtet edhe për trajtimin e autizmit.

“Në repartin për fëmijë dhe adoleshentë, me ngritjen e kapaciteteve do të lehtësohet puna e profesionistëve dhe fëmijët e adoleshentët tani e tutje do të marrin shërbime me kujdes më afatgjatë, sepse deri tani në këtë repart janë ofruar vetëm shërbime ambulantore. Po ashtu kemi shtuar shërbimin për logopedi. Në të kaluarën është bërë vetëm diagnostikimi i autizmit ndërsa tani janë krijuar kushtet edhe për trajtim” – ka thënë Vitia.

Ministrja e Ekonomisë, Artane Rizvanolli, ka thënë se me këto dy objekte u shënuan 90 ndërtesa publike të renovuara dhe dha detaje për aspektin e energjisë në to.

“Kur investojmë e rinovojmë ndërtesat publike gjithmonë kemi dy synime. T’i bëjmë ndërtesat tona publike sa më efiçiente, në mënyrë që të kursejmë energjinë sa më shumë që është e mundur, dhe të rrisim komforin për të gjithë stafin e qytetarët, të cilët shfrytëzojnë hapësirat e këtyre ndërtesave. Kjo e dyta është veçanërisht e rëndësishme për ne kur investojmë në objekte spitalore, e edhe më e rëndësishme në raste të tilla si ky sot, kur kemi të bëjmë me objekte të dedikuara për trajtimin e fëmijëve, e të kategorive më të cenueshme” – theksoi Rizvanolli.

Po ashtu, Rizvanolli deklaroi se tash në të dy ndërtesat do të kursehet energjia për 50 për qind, që do të thotë kursim prej 8 mijë e 627 euro në vit në faturat e energjisë.Ndër të tjera, ministri Vitia ka thënë se ndërgjegjësimi mbi rëndësinë e shëndetit mendor, me theks të veçantë për fëmijët mbetet nevojë e menjëherëshme. E për këtë tha se kanë ndarë 50 mijë euro për të mbështetur organizatat joqeveritare që merren me shëndetin mendor gjatë vitit 2024./Media Ndërtimi