Fakulteti i Inxhinierisë Mekanike i Universitetit të Prishtinën ka reaguar ndaj deklaratave të ekspertit të komunikacionit, Nol Dedaj gjatë intervistës në emisionin e Ora Shtatë në Klan Kosova, duke i cilësuar në deklarimet e tij se “përbuzës dhe fyes ndaj personelit akademik të Fakultetit të Inxhinierisë Mekanike sa i përket ekspertëve dhe superekspertizave që i realizojnë, dhe licencimit të tyre nga Këshilli Gjyqësor i Kosovës, si dhe me kritika ndaj Këshillit Gjyqësor të Kosovës për këtë çështje”.

Ky është një reagim i FIM për këtë deklaratat e ekspertit të komunikacionit Nol Dedaj.

FIM realizon superekspertiza të lëmive të ndryshme, përfshirë edhe ato të aksidenteve të trafikut. Superekspertizat e aksidenteve të trafikut nga FIM nuk realizohen nga një ekspert por grup i ekspertëve prej së paku 3 (tre) apo më shumë anëtarë.

Duhet të sqarojmë se superkespertizat e aksidenteve të trafikut janë komplekse dhe u përkasin disa fushave të ekspertizës ku kërkohen ekspertë të komunikacionit, automjeteve (inxhinierisë mekanike), etj. dhe ku kemi analizë nga: kinematika e lëvizjes së automjeteve, dinamika e goditjes së automjeteve, dinamika e procesit të frenimit të automjetit, deformime të materialeve – të automjeteve dhe objekteve tjera, dinamika e goditjes automjet-këmbësor, por edhe problemet e infrastrukturës rrugore, problemet e sinjalistikës rrugore dhe hekurudhore, qarkullimit të automjeteve në trafik, etj.

Për këtë arsye, Komisioni i ekspertëve që formohet i merr parasysh gjithë këta faktorë dhe caktohen ekspertët nga këto fusha. Gjithashtu, ndodh që të emërohet edhe ekspert shtesë për simulim me softuer dhe 3D modelim për analizë të aksidenteve.

Kjo ka bërë që të realizojmë superekspertiza të mirëfillta dhe kemi fituar besimin e qytetarëve, gjykatave, prokurorive, policisë, ministrive, institucioneve tjera publike, kompanive të sigurimit të automjeteve, etj. Si rrjedhim, kemi fituar edhe besimin e Këshillit Gjyqësor të Kosovës, të cilët kanë licencuar ekspertët tanë.

Duhet theksuar që FIM nuk realizon ekspertiza për palët e involvuara në aksident por vetëm bazuar në urdhëresa të gjykatave dhe prokurorive të Kosovës.

Në kuadër të FIM ekziston edhe Programi Dizajn Inxhinierik dhe Automjete që merret me automjetet motorike, e kjo bie në kundërshtim me “motoristikën” e deklarimit të Nol Dedaj në këtë emision. Duhet të theksojmë edhe një herë se Nol Dedaj një pjesë të shkollimit, konkretisht Magjistraturën, e ka kryer pikërisht në FIM, dhe është gabim të baltos institucionin ku ka marrë shkollimin apo profesorët që e kanë vlerësuar dhe ngritur atë, e të cilat sipas tij nuk qenkan kompetentë për analizë të aksidenteve në trafik.

Zakonisht nga ana e gjykatave urdhëresat për realizim  të superekspertizave të aksidenteve të trafikut vijnë pasi që në dosje përmbajnë edhe së paku dy ekspertiza që në konkluzione janë në kundërshtim me njëra tjetrën.

Ndodh që ndonjëra të jetë e “ekspertit” Nol Dedaj e cila është kontestuar nga Gjykata dhe palët ndërgjyqësore. Për më tepër kërkojnë të bëjmë edhe vlerësimin e ekspertizave individuale të ekspertëve. Ne, për hir të korrektësisë nuk jemi marrë me ekspertizat e tij, por në shumë prej tyre kemi vërejtje dhe lënë shumë për të dëshiruar.

Në disa raste ekspertët e FIM në seancat gjyqësore kanë kërkuar që të merren masa ndaj ekspertëve të ndryshëm që përpilojnë ekspertiza, të cilët pa marrë parasysh analizën profesionale “palën që i angazhon gjithmonë e nxjerrin të pafajshme”.

Falënderojmë Këshillin Gjyqësor të Kosovës (KGJK) për besueshmërinë dhe licencimin e ekspertëve tanë,  dhe Institucionet tjera – prokuroritë, gjykatat, policinë, ministritë e Qeverisë së Republikës së Kosovës për besueshmërinë e vazhdueshme në FIM, shkruan në reagimin e Fakultetit të Inxhinierisë Mekanike të Universitetit të Prishtinës./Media Ndërtimi.