Aktuale

Ministria e Kulturës “kursen” buxhetin, s’i ndal shkeljet në shpenzime

Published

4 years ago

June 18, 2020

Mosshfrytëzimi i gati gjysmës së buxhetit të investimeve kapitale, pagesat e parregullta e kontrata të nënshkruara jashtë procedurave ligjore, janë disa prej gjetjeve të Zyrës Kombëtare të Auditimit në Ministrinë e Kulturës për vitin 2019. Në Raportin e auditimit për pasqyrat financiare të këtij institucioni auditorët kanë nxjerrë në pah se ka avanca të pambyllura të udhëtimeve të zyrtarëve ministrorë qysh nga viti 2010. Në këtë dokument, që është publikuar të mërkurën, del se keqplanifikimi i buxhetit e ka përcjellë gjatë gjithë kohës MKRS-në. Angazhimi i punonjësve me Marrëveshjen për shërbime të veçanta e pagesat e majme për mediat që përcillnin aktivitet e ish-ministrit të Kulturës, Kujtim Gashi, janë gjetjet e tjera që bien në kundërshtim me ligjet në fuqi.

Ngecja e shpenzimeve kapitale e mbi 80 mijë euro për udhëtime zyrtare

Për vitin e kaluar Ministria e Kulturës kishte në dispozicion 44 milionë e 733 mijë euro. Prej tyre ka shpenzuar 30 milionë e 917 euro. Sipas auditorëve, buxheti final për investime kapitale në vitin 2019 ishte 21 milionë e 724 euro. Kurse prej kësaj shume janë shfrytëzuar vetëm 12 milionë e 312 euro, apo 57 për qind.

“Me rastin e analizës së pagesave sipas kodeve ekonomike, ne kemi gjetur se disa nga pagesat nuk janë bërë nga kodet adekuate ekonomike. Pagesat kanë rezultuar me gabime për shkak të klasifikimit të gabuar qysh në fazën e aprovimit të Ligjit për ndarjet buxhetore dhe pagesave direkte nga vendimet gjyqësore”, shkruhet në Raport. Auditorët kanë konstatuar se nga kategoria e subvencioneve dhe transfereve ishin realizuar pagesa në vlerë 94 mijë euro për shpenzime që i takojnë kategorisë mallra dhe shërbime. Me këto mjete ishin paguar bileta të udhëtimit zyrtar, mirëmbajtje të objekteve, pagesat për anëtarë të këshillave drejtues e fatura të tjera.

“Nga kategoria e investimeve kapitale, me vendim gjyqësor ishte realizuar pagesa në vlerë 88 mijë e 354 eurosh për bileta të udhëtimit zyrtar, shpenzime të cilat për nga natyra i takojnë kategorisë mallra dhe shërbime”, shkruhet në Raport. Auditorët kanë konstatuar se një pagesë në vlerë 15 mijë euro ishte bërë për diferencën në pagë, shpenzime të cilat i takojnë kategorisë paga dhe mëditje. Janë 26 mijë euro të tjera të planifikuara për mallra dhe shërbime, të cilat kanë shkuar për punë shtesë për zyrtarët e angazhuar jashtë orarit të rregullt të punës.

Mbi 220 mijë euro për festën e Pavarësisë

“Për organizimin e aktiviteteve lidhur me festën e Pavarësisë së Kosovës, MKRS-ja ka shpenzuar 220 mijë e 809 euro nga kategoria e subvencioneve. Këto aktivitete për nga natyra dhe plani kontabël i takojnë kategorisë për mallra dhe shërbime”, shkruhet në Raportin që pasqyron menaxhimin e MKRS-së për vitin e kaluar. Mjetet për festë ishin ndarë nga subvencionet me vendim të veçantë të Qeverisë dhe Ministria kishte kryer vetëm punët operative. “Gabimet më sipër kanë ndodhur për shkak të planifikimit të dobët të buxhetit nga Qeveria dhe kujdesit të pamjaftueshëm të menaxhmentit të MKRS-së për të parandaluar ndarjet buxhetore në kodet e gabuara të shpenzimeve”, shkruhet në Raport.

Pagesat pa evidencë për aktivitet e punonjësit shtesë

Auditorët kanë gjetur se ‘’Mbrojtja civile’’, që ishte caktuar në departamente të ndryshme të MKRS-së në veri të vendit, figurojnë si punonjës vetëm me paga. Në Raport shkruhet se për këta zyrtarë, MKRS-ja nuk ka ofruar ndonjë dëshmi për vijueshmëri në punë apo raporte për punën e kryer gjatë vitit 2019. Shpenzimet e pagave gjatë vitit 2019 ishin 150 mijë e 789 euro. Sa u përket punonjësve, MKRS-ja del të këtë bërë goxha histori vitin e kaluar./Koha/

Aktuale

Publikohet platforma digjitale për historinë e Prishtinës

Published

9 hours ago

May 16, 2024

Ndertimi Media

Historia qindravjeçare e Prishtinës tash e tutje do të mund të njihet edhe përmes platformës digjitale “Prishtina në histori”.

E krijuar nga “Trembelat”, kjo platformë prezanton qindra dokumente origjinale për Prishtinën, që nga shekulli i 13-të.

Përmes një komunikate për media, “Trembelat” kanë bërë të ditur se platforma digjitale (qerthulli) “Prishtina në histori” përmbledh një grumbull digjital të teksteve, hartave, gravurave, fotografive dhe punimeve rreth historisë së qytetit të Prishtinës që kapin kohën prej fundit të shekullit 13-të deri në vitete e para të shekullit 20-të.

Në Arkivin e Prishtinës, pjesë e Komunës së Prishtinës, rishtazi janë sjellë rreth 38,598 dokumente osmane, të cilat dokumentojnë historinë e Prishtinës prej shekullit të 15-të deri në shekullin 20-të, shumica prej tyre, siç thuhet në komunikatë janë krejt të pastudiuara dhe të panjohura për publikun.

Në anën tjetër, po sipas komunikatës, shumë studime të cilat janë bërë bazuar në arkivat e Romës, Venedikut dhe Dubrovnikut mbesin në sirtarë të bibliotekave dhe njihen vetëm prej një grupi të vogël specialistësh.

“Këto të dhëna, por dhe të tjera që kanë të bëjnë me të kaluarën e Prishtinë, nga arkiva, biblioteka e koleksione janë mbledhur dhe do të vazhdojnë të mblidhen në fazat e tjera të këtij projekti (Prishtina në histori)”- thuhet në komunikatën e ‘Trembelave”.

Po siaps komunikatës, në mesin e materialeve të botuara janë edhe rreth 100 dokumente origjinale të përkthyera, si shtesë për tekstet e shkruara enkas, e artikuj të rëndësishëm nga e kaluara që meritojnë të lexohen më gjerësisht, pjesa më e madhe e tyre, sic thuhet më tej në komunikatë, janë botuar në këtë fazë fillestare.

Platforma është iniciativë e “Trembelave” me siglën botuese “Varg” e mbështetur financiarisht nga Komuna e Prishtinës, në partneritet të ngushtë edhe me Arkivin e Prishtinës, të cilët edhe kanë mundësuar qasjen në dokumentet nga arkivat osmane, që në vitin 2018 janë sjellë në kopje digjitale te ky arkiv./Media Ndërtimi

Aktuale

Asociacioni i Arkitektëve të Kosovës organizon kuvendin zgjedhor

Published

1 day ago

May 15, 2024

Ndertimi Media

Të nderuar anëtarë të Asociacionit të Arkitektëve të Kosovës, duke u bazuar në Ligjin Nr. 06/L-043, për Lirinë e Asocimit ne Organizata Joqeveritare dhe Nenit 26, të Statutit të Asociacionit të Arkitektëve të Kosovës, të vitit 2022, shpallë Zgjedhjet e rregullta për Kryetarin e a-a-k.

KUVENDI ZGJEDHOR i a-a-k, do të mbahet:

Datë: 23.05.2024 (E Enjte)

Ora: 17:00 h

Vendi: MODELARIUMI në Fakultetin e Arkitekturës në UP-ë.

Ftohen, të gjithë anëtarët e Asociacionit të Arkitëktëve të Kosovës që të marrin pjesë në kuvendin zgjedhor, dhe në frymën e konkurencës së lirë dhe kandidimit, të shprehin vullnetin e tyre për tu kandiduar për pozitën e kryetarit të a-a-k, duke u mbështetur në nenin 32, të Statutit./Media Ndërtimi

Aktuale

“Reagim ndaj shkrimeve të pasakta dhe tendecioze rreth nënshkrimit të kontratës me Arkitektin e Qytetit”

Published

2 days ago

May 14, 2024

Ndertimi Media

Komuna e Prishtinës ka reaguar ndaj shkrimeve rreth nënshkrimit të kontratës me Arkitektin e Qytetit”

Me datën 13 maj 2024 është publikuar një shkrim me titull “Tre muaj para se të regjistrohej në ARBK, kompania Shërbimi i Arkitektit të Kryeqytetit nënshkroi kontratën me Komunën e Prishtinës” nga një prej portaleve lokale, dhe po të njëjtat informata të pasakta e tendencioze janë shpërnda nga eksponentë politik të caktuar.

Kryeqyteti informon qytetarët se ky artikull dhe shkrimet pasuese janë të pasakta dhe se:

Konsorciumi i kompanive fituese kanë qenë të regjistruara pranë ARBK shumë kohë më parë
Procesi i tenderimit të Shërbimit të Arkitektit të Kryeqytetit është vlerësuar tri (3) herë nga OSHP, si proces i rregullt dhe në përputhje me ligjin.
Procesi i tenderimit është zhvillu përmes sistemit elektronik “EPROKURIMI” dhe të gjitha të dhënat digjitale janë në dispozicion për të vërtetuar rregullsinë e procesit

Më poshtë është shpjeguar në hollësi procesi.

Aktiviteti i prokurimit me titull “Konsulencë për themelimin e Shërbimit të Arkitektit të Kryeqytetit për nevojat e Komunës së Prishtinës” me nr. të prokurimit 616-22-7431-3-1-2, është publikuar me datën 21.07.2022. Pra aktiviteti ka filluar në korrik të vitit 2022 dhe ka përfunduar rreth 1 vit më pas apo më 27.06.2023 kur është nënshkruar kontrata, ndërsa kontrata e nënshkruar si e tillë përmes kësaj procedure aktualisht është në zbatim e sipër. Procedura si e tillë është zhvilluar në dy faza, ku kanë marrë pjesë gjithsej 6 tenderues (operatorë ekonomik ose grupe të operatorëve ekonomik). Gjatë aktivitetit të prokurimit janë shtjerrë të gjitha procedurat sipas mjeteve juridike në dispozicion. Mbi të gjitha kjo lëndë është trajtuar tri (3) herë nga OSHP dhe nënshkrimi i kontratës është manifestuar vetëm pas rikonfirmimit përmes vendimit të tretë të Panelit Shqyrtues në OSHP.

Sa i përket pretendimit se është nënshkruar kontratë me një operator ekonomik që nuk ka qenë i regjistruar në ARBK, duhet theksuar faktin që kontrata është nënshkruar me datë 27.06.2023 nga të dy palët kontraktuese dhe jo me datë 27.03.2023 sikurse është pretenduar. Kontrata është nënshkruar në tri kopje origjinale, por në njërën kopje të kontratës me rastin e nënshkrimit të kontratës, operatori ekonomik ka bërë gabim teknik ku në vend të numrit 6 ka shënuar numrin 3. Megjithatë ky gabim menjëherë është reviduar ndërsa data e nënshkrimit është evidentuar saktë (27.06.2023). Pra data e nënshkrimit të kontratës është 27.06.2023 dhe ky fakt është i pakontestueshëm për cilëndo palës me interes juridik. Data e nënshkrimit 27.06.2023 mund të konfirmohet edhe nga sistemi elektronik EPROKURIMI. Vlen të shtohet po ashtu se njoftimi për dhënie të kontratës është publikuar me datë 27.06.2023 ndërsa njoftimi për nënshkrim të kontratës është publikuar me datë 29.06.2023. Pra thjesht ka qenë e pamundur që të nënshkruhet kontrata në muajin mars 2023 sikurse pretendohet. Me këtë rast duhet kuptuar faktin që procedura e prokurimit zhvillohet hap pas hapi në përputhje me dispozitat ligjore në fuqi. Pra nuk mund të kalohet në hapin e radhës pa përmbushur me sukeses hapi paraprak. Gjithashtu, siç u tha më sipër, ky aktivitet është trajtuar tri (3) herë nga OSHP ku vendimi i parë nga OSHP është marrë me datë 02.02.2023, vendimi i dytë me datë 22.05.2023 ndërsa vendimi i tretë dhe i fundit me datë 26.06.2023 me ç’rast është mundësuar edhe nënshkrimi i kontratës me datë 27.06.2023.

Më tutje, grupi i operatorëve ekonomik të kontraktuar “Anarch Sh.P.K. & Ardi CC L.L.C.” kanë qenë të regjistruar kohë më parë. “Anarch” Sh.P.K. si anëtar i konsorciumit ekonomik është themeluar 17.10.2018 ndërsa anëtari tjetër i konsorciumit “Ardi CC” Sh.P.K. është themeluar me datë 29.04.2008. Pra, që të dy kompanitë kanë vite përvojë pune dhe nuk janë regjistruar tre muaj para nënshkrimit të kontratës siç pretendohet në shkrimet tendencioze. Pas shpalljes fitues në procesin e tenderimit, dy kompanitë kanë krijuar shoqërinë me përgjegjësi të kufizuar “Shërbimi i Arkitektit të Kryeqytetit” për zbatim të kontratës dhe këtë e kanë regjistruar në ARBK me 27.06.2023, si një subjekt i përbashkët për qëllime të zbatimit të kësaj kontrate. Edhe nga të dhënat publike të ARBK mund të konfirmohet se shoqëria e konsorciumit “Shërbimi i Arkitektit të Kryeqytetit” përbëhet nga dy operatorët ekonomik tenderues që janë “Anarch” Sh.P.K. dhe “Ardi CC” L.L.C.

Pra nuk qëndrojnë aspak pretendime sipas të cilave kinse është nënshkruar kontratë me një operator të paregjistruar në ARBK.

Bashkëngjitur do të gjeni disa kopje të dokumenteve që i faktojnë të dhënat e mësipërme, të cilat edhe janë në dispozicion publik në EPROKURIMI dhe në ARBK./Media Ndërtimi