Ende pa të nisur zyrtarisht fushata zgjedhore, kryetarët e komunave iu përvishen punëve të cilat nuk i përfunduan për katër vite mandat. Vrull morën në asfaltim të rrugëve nëpër fshatrat e harruara deri sot.

Shkëndije Ahmeti

Edhe pse kohë fushate, banorët e shumë fshatrave në Kosovë iu gëzuan që në lagjet e tyre do ketë më në fund asfalt, po ky gëzim nuk zgjati shumë. Zhgënjimi i tyre erdhi menjëherë nga shtrimi i asfaltit që u bë shkel e shko. Trashësia e asflatit dallon nga ajo që shkruan në dokumente. Rasti i fundit në fshatin Mazhiq të Mitrovicës, ku shumë centimetra nuk janë shtruar.

Këto asfaltime në këtë formë, po arsyetohen nga zyrtarë të kësaj komune, duke thënë se ato punime nuk janë pranuar teknikisht.

Banorët nuk hezituan të tregojnë hallet dhe problemet të cilat po përballen tash e një jetë. Qerim Zenelit që ia kanë bllokuar derën e shtëpisë, nuk i kishte bërë qare as Komuna. Por, ai veç premtimeve nuk ka mori asgjë tjetër.

“Në 100 metra një kamion zall  u qitke. Madje unë prita, ju thash ju mu ma prishet rrugën, se me makinë nuk kam shanc me hy në oborr. Prapë jam ardh jam anku në komunë, ju thash, mua më mbeti rruga as pa zhavorr, as pa asfalt as pa me u hjek materiali që mu ka blloku dyert e oborrit”, tha Zeneli.

Njëjtë i ndodhi edhe Xhavit Ahmetit, që ka një hall tjetër.

“E kam një problem që nënën e kam 90 vjeç, qetu me ma ndreq unë  jam i kënaqur veç shkak i nanëns”, tha Ahmeti.

Drejtori i Infrastrukturës në Komunën e Mitrovicës, Besnik Beka pati arsyetim.

“Unë nuk i di telashet që realisht ju po i potenconi që është shtruar me hollë se sa që ka qenë…për sa i përket rrugës atje afërsisht trashësia e asfaltit në bazë të kontratës  është 8 centimetra ndërsa gjatësia e rrugës përafërsisht është mbi 3 kilometra për vetë raste ku realisht fshati nuk ka leju me u hap rruga përndryshe ë gjitha lagjet janë përfshi në asfalt…kemi parasysh që ende nuk janë pranuar teknikisht se atje kanë me u punu edhe bankinat në momentin që pranohet teknikisht pranohet vetëm qysh është nënshkruar në kontratë”, tha Beka.

Beka insiston që punimet në asfalt janë duke shkruar sipas kontratës, dhe se ato punime po mbikëqyren nga inxhinieret e komunës. Gjitha kritikat për këto punime Beka po thotë se po i bënë dikush që po “i vjen nxehtë”.

“Na kemi qenë bashkë aty edhe me fshatin. Unë nuk po di këto telashe që t’i po i potencon. Tash ke parasysh që jemi kohë fushate dhe njerëzit mujnë me fol se dikujt po i vjen nxehtë atje pse na  po punojna pse jena duke ekzekutuar buxhetin e viti 2017-të mirëpo ne nuk ndalemi, ne punojna se për këtë jemi të thirrur, me shtru asfalt me ndërtu kanalizim, me ndërtu ujësjellës”, thotë Beka.

Ankesa për rrugë po kanë edhe banorët e fshatit Zhabarë i Epërm. Edhe pse iu ishte premtuar shtrimi me asfalt një gjë e tillë nuk u bë , madje atje u tentua të shtrohet zhavorr, por një gjë të tillë nuk e lejuan disa banorë, tha Enver Sefedini.

“Që katër vite ne në këtë rrugë kemi ‘hangër’ pluhun… Ne e ndërpritem këtu shkaku i pluhurit, tjetër s’po di çka me fol. Po shihni edhe vetë. Kanalizimin e kemi kry vetë me harxhime tona. S’ka pas nevojë këtu as kanalizim, as ujësjellës, por vetëm duhet me u shtru asfalt. Nuk ka lagje që nuk u shtru asfalt por vetëm kjo rrugë ka mbet. Kjo ka mbet me qëllim dhe me inate të kryetarit të Komunës Agim Bahitrit i cili tentonte me na marr tokat poshtë për fabrika…dhe me gabimet e veta, që dikujt ka dashtë me ja pagu dy mijë e uro e dikujt një mijë euro, edhe qaty pak u inatqu”, tha Sefedini për Ndërtimi.info.

Telashe me vrullin e punimeve në kohë fushate po e ka edhe një banorë tjetër në këtë anën. Me të marr rrugën nga qendra e Mitrovicës për në fshatin Zhabarë, në anën e djathtë, pak metra nga trotuari po gjendet shtëpia e Enver Brahimit. Brahimit në derë të oborrit iu është hapur gropa mbi 1 metër e thellë. Ai nëpërmes telefonit tha se ajo gropë po rrezikon të gjithë qytetarët dhe se prej 5 javësh nuk e ka prekuar askush.

Për këtë gropë nuk po kris kiameti, në krahasim me punët që po bëhen në komunë, tha zyrtari i komunës Beka.

“Ne jemi duke folur për komplet qytetin e Mitrovicës, ti ke parasysh qyteti i Mitrovicës nuk di saktë se sa metra katror i ka krejt dhe tash një gropë që u hap atje në Zhabarë nuk ka kris kiameti. Se menaxhojnë me 72 mijë banorë dhe përderisa jemi duke punuar gjithë këtë punë”, tha Beka.

Punët në asfalt që janë bërë nuk po ia pranon as ish drejtori i Drejtorisë së Infrastrukturës  në Mitrovicë, tani anëtar i shtabit zgjedhor të PDK në këtë komunë, Rasim Veseli.

“Mund të ketë nëpër fshatra gjithçka, mund të ketë edhe tri centimetra edhe më pak ndoshta. Mund të ketë deri në 8 centimetra por mund të ketë raste që ka bazament të dobët. Ka raste që punët në rrugët caktuara vec janë përfunduar paraprakisht ndërsa janë ekzekutuar vetëm niveli i asfaltit ndërsa paramasat parapake në tenderë kanë qenë gjitha punët parapake që janë bërë…Këto rrugë që po asfaltohen dhe ato më parë veç kanë fillu mos me i qëndru kohës”, tha Veseli.

E kandidati për kryetar të Komunës në këtë komunë nga radhët e Vetëvendosjes, Fehmi Ferati po thotë se duhet të ekzistoj një Ligj i cili e ndalon investimet në kohë fushate.

“Që sa kohë dhe që sa vite njëkohësisht janë kontrata zotime të parakohshme, janë planifikime të investimeve por lihen vetëm në periudha parazgjedhore dhe kjo e dëmton shumë edhe buxhetin, e dëmton poashtu edhe kualitetin e rrugëve dhe investimeve të përgjithshme. Nga ato që kemi zbuluar në shumë raste kemi pa që ka kualitet shumë të dobët të punës. Dhe ne e dimë që në Kosovë dhe çdo banor e di që keqpërdorimet më të mëdha janë bërë në investime ku këta kanë përqindje, investime në zhavorr, asfalt në kubëza betoni, fatkeqësisht këtë po e shohim edhe në Komunën e Mitrovicës, Janë bërë punët shkel e shko, dhe kjo është një tragjedi publike dhe infrastrukturore që ka ndodh sidomos muajin e fundit jo më shumë”, tha Ferati.

Ndryshe, sipas zyrtarëve të komunës për katër vite u shtruan 170 kilometra rrugë me asfalt, ku u harxhuan mbi 11 milionë euro në ndërtim e rehabilitim të rrugëve, asfaltim, ndërtim të trotuareve e pjesë gjelbëruese.

Një ditë nga heshtja zgjedhore e dy ditë nga zgjedhjet, komuna po synon t’i shtroj asfaltin edhe në fshatin Rahovë të ulët, dhe të përfundoj punimet në Kçiq.