Gjashtë kulla shumë katesh po ndërtohen në qendër të Tiranës, brenda territorit që dikur ishte zonë e mbrojtur historike. Vendimi Nr.582 i Këshillit të Ministrave (me kërkesë të Bashkisë Tiranë), i hapi rrugë tkurrjes së qendrës historike të qytetit.
Kjo ndërhyrje u kritikua nga Kontrolli i Lartë i Shtetit si e pabazuar në asnjë studim të mirëfilltë, veç interesave të biznesit të ndërtimit.
Cilat janë projektet që po betonizojnë qendrën e Tiranës?
Tirana’s rock – një kullë prej 24 katesh në formën e bustit të heroit kombëtar Skënderbeu, po ngrihet mbi rrënojat e vilave 100-vjeçare të rrugës “Broduej”. Këshilli Kombëtar i Territorit e miratoi këtë projekt në vitin 2018, duke i dhënë investitorit “ANA Shpk” të drejtë të shfrytëzojë 95% të truallit për ndërtim, një rekord negativ sa i përket intensitetit të zhvillimit.
“New Hotel Tirana International” – Një kullë 33 katëshe që do të jetë vazhdimi i hotelit “Tirana Internacional”, i njohur si 15-katëshi i Tiranës. Këshilli Kombëtar i Territorit e miratoi këtë leje në vitin 2017. Përpara miratimit të lejes, Bashkia e Tiranës i shpronësoi pronarët e banesave 100-vjeçare në zonë me pretekstin e zhvendosjes së nënstacionit elektrik. Trualli i shpronësuar u dha më pas për ndërtim firmës “GECI Shpk”, e cila po ndërton një hotel me 500 dhoma.
Book Building – Është një kompleks godinash 4,5,11 dhe 21 katëshe që po ngrihet vetëm 8 metra larg Sahatit të Tiranës, ndërtesës simbol të kryeqytetit. KKT e miratoi këtë leje në vitin 2018, vetëm pak muaj më pas një zjarr përfshiu tokën ku do ngriheshin kullat, duke dëmtuar objektet që gjendeshin aty.
“Eyes of Tirana” – Kulla 24 katëshe e ngritur në lulishten krah Bankës së Shqipërisë mori “bekimin” e KKT në vitin 2017. Kompania “Ideal Konstruksion” ndërtoi 4,646 m2 sipërfaqe pa leje në këtë kullë. Qeveria shqiptare hartoi një VKM të veçantë që i lejoi ndërtuesve t’i shpëtonin ndjekjes penale, ndërsa shkelja e ligjit nuk e pengoi Bashkinë Tiranë që të lidhte një marrëveshje të re me kompaninë, duke i dhuruar asaj mbi 1000 metra tokë publike në qendër të Tiranës, në këmbim të 50% të sipërfaqes së ndërtimit.
“Forever Green” – Kulla nisi punimet në shkurt të vitit 2011. Për ta përfunduar projektin e kullës 25 katëshe u deshën 13 vite pas falimentimit të kompanisë që nisi punimet, ajo u përfundua nga kompania “AlbStar”.
“Tirana Mount” – Një kullë prej 185 metrash do të ngrihet në këtë hapësirë të gjelbër, duke shënuar rekordin e ri për ndërtesën më të lartë të Tiranës. Projekti i studios Daneze CEBRA, u zgjodh nga një juri e përbërë nga katër arkitektë, Kryeministri Edi Rama dhe Kryebashkiaku Veliaj në tetor 2022 dhe mori miratimin e Këshillit Kombëtar të Territorit në mars të këtij viti. Ditët që pasuan rrethimin e godinës u shoqëruan me protesta nga aktivistët e Lëvizjes Bashkë.
Qendra e Tiranë është aktualisht zona me intensitetin më të lartë të ndërtimeve të reja në Shqipëri, kullat e reja po i shtojnë qendrës një sipërfaqe ndërtimi prej më shumë se 256 mijë m2. Pavarësisht kësaj institucionet qendrore dhe lokale kanë “harruar” të miratojnë Planin e Detajuar Vendor për qendrën. Në faqen zyrtare të AKPT nuk ka asnjë Plan të Detajuar Vendor (PDV) për zonën TR/1 edhe pse zyrtarisht ky territor është subjekt i PDV-së.
Këshilli Kombëtar i Territorit, i udhëhequr nga Kryeministri Rama dhe Bashkia e Tiranës po vijojnë të miratojnë intensivisht leje të reja ndërtimi. Miliona m2 beton i janë shtuar Tiranës vitet e fundit, duke tkurrur hapësirat e gjelbra dhe kthyer qytetin në një parajsë të pastrimit të parave.