Ka disa vite që dy tregjet e qytetit të Prizrenit, tregu “Qylhani” dhe tregu Fatoni ”Bajram Curri” po operojnë pa kontratë me Kuvendin Komunal të Prizrenit. Kësisoj këta dy operatorë po grumbullojnë të hyra të majme nga operimi i shfrytëzuesve privat, ndërsa komuna po humb para duke lejuar që të shfrytëzohet prona e saj pa asnjë kompensim.
Që nga viti 2013 tregjet në Prizren janë shfrytëzuar pa kontrata dhe komuna nuk ka ndërmarrë asnjë hap për lirimin e këtyre dy pronave (tregjeve Tregu Qylhani dhe tregu Fatoni ”Bajram Curri”), kanë pasur kontratën mujore 3500 euro, (ku për vit i bije 42,000 euro e për tri vite 126,000 euro – pra deri në dhjetor 2019). Ato aktualisht po punojnë pa kontratë.
Këto fakte kanë dalë nga Raporti i Zyrës Kombëtare të Audtimit për Pasqyrat Financiare të vitit 2019, shkruan lajmi.net.
Sipas auditorit, në këtë rast komuna nuk e ka trajtuar si borxh sepse pronat janë duke u shfrytëzuar pa kontratë.
Ligji për dhënien në shfrytëzim dhe këmbim të pronës së paluajtshme komunale 06/L-092”, neni 23 pika 1 cek: ”Pas përfundimit të afatit të përcaktuar në kontratën për dhënien në shfrytëzim të pronës së paluajtshme të komunës, prona i kthehet komunës”.
Komuna e Prizrenit me datë 01.08.2001 ka bërë marrëveshje mbi Koncesionin për tregjet “B. Curri” dhe “Qylhani” me kohëzgjatje për 10 vite, deri më dt. 01.08.2011, nga kjo datë kanë bërë Aneks-kontratë për një periudhë dy-vjeçare deri më 01.08.2013, duke u bazuar mbi kushtet e marrëveshjeve fillestare dhe duke cekur se kjo kontratë nuk mund të vazhdohet më tutje.
Sipas auditorit, që nga viti 2013 tregjet janë shfrytëzuar pa kontrata dhe komuna nuk ka ndërmarr asnjë hap për lirimin e këtyre dy pronave (tregjeve). Mirëpo nga Drejtoria e Ekonomisë dhe Financave është vendosur të ngarkohet me tarifë deri në vitin 2016.
“Komuna nga viti 2017 nuk i ka faturuar këta dy shfrytëzues të pronave, pasi që nuk ka bazë ligjore për ngarkesë, përderisa shfrytëzuesit privat brenda këtyre tregjeve, paguajnë qira për shfrytëzimin e tezgave apo lokaleve që gjinden në treg”.
Auditori ka shkruar në raport se, shfrytëzimi i tregjeve dhe pronave tjera publike, pa kontrata valide mes komunës dhe shfrytëzuesve të pronës komunale, i shkakton komunës humbje të konsiderueshme financiare.
“Kryetari i Komunës duhet të siguroj marrjen e masave për largimin e shfrytëzueseve ilegal nga pronat publike, arkëtimin e borxheve dhe më pastaj dhënia e pronës publike me qira të realizohet sipas Ligjit për dhënien në shfrytëzim dhe këmbim të pronës së paluajtshme komunale 06/L-092”, thuhet në rekomandimin e auditorit që i ka dhënë kryetarit të Komunës së Prizrenit, Mytaher Haskuka lidhur më këtë rast.
Po ashtu, auditori ka theksuare dhe disa shkelje tjera që kanë të bëjnë me parregullsi me subvencione, tenderë, lejet ndërtimore, etj.
You must be logged in to post a comment Login