Muaj më parë ishte raportuar se fillimi i ndërtimit të Termocentralit “Kosova e Re” do të ishte në Mars. Mirëpo, 17 marsi doli të jetë data kur amerikanët e Contour Global vendosën të tërhiqeshin nga projekti i termocentralit “Kosova e Re”, që ka filluar jo më vonë se në vitin 2006, për të ardhë në përfundim për një prodhim me kapacitet 500 MW. Si me porosi, kjo i lehtësoi punë kryeministrit Albin Kurti, që mos të fillonte procedura të shumta për të anuluar këtë projekt.

Edhepse shumë e shumë vite ka pasur përpëlitje për këtë projekt, që nga koha kur vetëm se doli në publik që amerikanët e Contour Globalit do e marrin “Kosovën e Re”, kockë e fortë ishte Vetëvendosja. Lideri i saj, Albin Kurti ishte shumë i qartë, nuk e dontë këtë projekt, pasi sipas tij, i bënte dëm vendit. Gjithmonë këto dy palë kishin tension në ajër, ku amerikanëve në krah u rrinin edhe partitë e koalicionit qeverisës, PAN.

“Të njëjtën ditë kur ia dyfishoi pagat qeverisë dhe kabinetit të vet, më 20 dhjetor 2017, Haradinaj nënshkroi edhe kontratën me Contour Globalin për ndërtimin e TC ‘Kosova e Re’. Sipas kësaj kontrate të dëmshme e të frikshme, nuk do të punojë Contour Global për Kosovën dhe qytetarët e saj, por ne do të punojmë për Contour Globalin”, kishte shkruar Kurti, gati para një viti.

E sot në tërheqjen e tyre, Contour Global tregon se një nga arsyet e tërheqjes është edhe “arsyeja politike”.

“Projekti Kosova e Re nuk mund të ecë përpara. Situata politike në Kosovë që nga korriku, formimi i një qeverie të udhëhequr nga një kryeministër që e kundërshtoi publikisht projektin dhe mosveprimi i qeverisë e kanë bërë të pamundur që projekti t’i përmbushë detyrimet e kërkuara”, thuhet në një njoftim për media nga Contour Global, duke shtuar se “siç kemi thënë në të kaluarën, Kosova duhej të ishte projekti ynë i fundit me qymyr. Ne nuk do të zhvillojmë termocentrale qymyri në të ardhmen”.

Një nga ekonomistët që Vetëvendosje e vë në ballë të debateve, por që debatonte kundër kësaj kontrate edhe para futjes në VV, është Hekuran Murati. Ai nuk vonoi të shpërndante komunikatën e botuar në Reuters, dhe të shkruante se tash duhet nisur puna në TC “Kosova A”.

“Tash s’duhet me humb kohe, por me fillu sa me shpejt rindertimin e TC Kosova A. Ekonomise tone i duhet furnizim i qendrueshem me rryme, dhe me cmim te perballueshem”, shkruan Murati. Ai, i kontaktuar nga Ndertimi.info, ka thënë se mund të referohemi në atë që ka shkruar në Facebook, asgjë më shumë.

Aty shihet se nga propozimet që bëjnë disa komentues, Murati këmbëngul se “Kosova A është opsioni ma i lirë në cfarëdo skenari”.

I pavonuar ka qenë reagimi i këshilltarit të presidentit Hashim Thaçi, Artan Behrami, që e quan gjithë këtë si rezultat i kërcënimeve ndaj amerikanëve, nga Qeveria e Kosovës.

“Kërcënimet e Qeverisë së Kosovës kundër investimeve amerikane sot morën formë. Kompania amerikane që planifikojë t’i investojë mbi 1.5 miliardë euro në ndërtimin e termocentralit “Kosova e Re”, sot u tërhoq nga ky investim, për shkak të kundërshtimit të Qeverisë Kurti”, shkruan Behrami. Ai thotë se me këtë projekt Amerika ka synuar që të na jepte pavarësinë e Kosovës nga Serbia e Rusia në sektorin energjetik.

14 arsyet e Kurtit pse “CONTOUR GLOBAL” s’punon për Kosovën

Kryeministri i tashëm i Kosovës, teksa ishte lider i opozitës me Lëvizjen Vetëvendosje, kishte numëruar 14 arsyet pse Contour Global s’punon për Kosovën, që mund t’i lexoni më poshtë.

• Kostoja e ndërtimit u ngrit nga një miliard euro në 1.3 miliard euro, e kjo rritje do t’i faturohet popullit, madje me kamatë
• Shkalla e kthimit të brendshëm në kapital për Contour Globalin është garantuar në plot 18.5%, në kohën kur bankat paguajnë më pak se 1% interes në depozitat e qytetarëve;
• Republika e Kosovës do t’ia paguajë Contour Globalit të gjitha shpenzimet, plus këstet e kredisë, kamatën, fitimin, e në fund edhe tatimin në fitim;
• Për një periudhë 20 vjeçare, qytetarët do të paguajnë 5 deri në 7 miliardë euro për këtë marrëveshje;
• Për t’ia siguruar këto të hyra Contour Globalit, Qeveria ka krijuar një kompani të re publike, Neë Kosovo Electricity Company, e cila do të blejë detyrimisht çdo MWh të prodhuar të Contour Globalit, pavarësisht se a kemi nevojë për të ose jo;
• Contour Globalit i është siguruar blerja pa limit e energjisë së prodhuar, madje me çmim 20% më lartë se 80 euro për MWh për çdo MWh të prodhuar më shumë;
• Kur të fillojë ky termocentral punën, do të mbyllet Kosova A dhe punëtorët do të mbeten pa punë;
• Contour Globalit i është dhënë prioritet i shitjes së energjisë krahasuar me KEK-un ani se me çmim më të shtrenjtë, gjë që e bën TC ‘Kosova B’ prodhues që punon me gjysëm orari, si kapacitet rezervë, e kjo nënkupton edhe më shumë punëtorë që mbeten pa punë;
• KEK-u është i obliguar që t’i sigurojë Contour Globalit hapësirat për deponim të hirit dhe gipsit, pa asnjë cent kompensim, tërësisht falas;
• Contour Globalit ia japim 15 hektarë tokë për 10 euro gjithsej;
• Me këtë kontratë krijohet një monopol i përkrahur nga shteti, që bie në kundërshtim me vetë Kushtetutën e vendit dhe paraqet edhe shkelje të MSA-së;
• Janë shkelur së paku tri ligje nga kontrata me Contour Globalin: Ligji për Ndërmarrjet Publike, Ligji për ZRrE-në dhe Ligji për Prokurimin Publik;
• Vetëm pas 20 viteve, TC ‘Kosova e Re’ do t’i bartet në pronësi Qeverisë së Kosovës.
• Në rast të shkëputjes së kontratës para fillimit të zbatimit, Kosova ndëshkohet me 19.7 milionë euro, ndërsa po e bëri këtë Contour Globali me 8 milionë.