Nga sot pritet të ketë përmirësim të situatës me energji elektrike.
Kështu po thotë zëdhënsi i KEDS-it Viktor Buzhala, i cili shton se ky përmirësim vjen pas futjes në funksion të njësisë B2 i Termocentralit Kosova, njësi kjo e cila ishte në remont.
““Kufizimet e energjisë elektrike janë vazhdimisht që nga e hëna e kaluar deri sot, kanë qenë rreth dy orë… Presim që të ketë përmirësim pasi që në bazë të informatave që kemi nga KEK-u pritet të rikthehet nga planifikimi mirëmbajtja e planifikuar vjetore, njësia B2 e Termostatit Kosova B dhe do ta stabilizojë mjaft situatën” ka thënë Buzhala.
Buzhala foli edhe për aplikacionin eKesco nëpërmjet të cilit qytetarët kanë mundur të informohen për orarin e reduktimeve.
Ai tha se ky aplikacion ka rezultuar si ndër më të suksesshmit për informimin e qytetarëve rreth reduktimeve.
“I vetmi aplikacion automatik është eKesco, ne jemi në botën e aplikacioneve. Secili qytetar ka qasje në internet. Penetrimi në internet në Kosovë është gati qind për qind, d.m.th. është gjendur zgjidhja më e mirë për t’i njoftuar secilin qytetar individualisht për pikën matëse aty ku është rezident. Pra, aplikacioni eKesco në këtë rast që është ndër më të suksesshmit në Kosovë sa i përket kompanive elektro-energjetike edhe në rajon është metoda më efikase”.
Ndërsa sa i përket vonesave të rrymës në disa raste, ai tha se kjo po ndodh shkaku i volumit të madh të shkyqjeve të daljeve.
“Bëhet fjalë për volum jashtëzakonisht të madh të shkyçjeve të daljeve dhe është e pamundshme që ato të kryhen për të njëjtën kohë. Mirëpo nëse një shkyçje ndodh në orën 8:20, atëherë konsumatorit i kthehet energjia elektrike në 22:20 apo edhe me herët ndoshta në ndonjë rast”, thekson ai.
Qytetarët e Kosovës janë duke u përballur me reduktime të energjisë elektrike nga data 15 gusht.
Ndërkaq Qeveria e Kosovës të mërkurën ka ndarë 41 milionë euro në kuadër të pakos së ringjalljes ekonomike për mbështetje në tejkalimin e krizës energjetike.
Ministri i Financave, Punës dhe Transfereve, Hekuran Murati tha se ky është zotim i qeverisë për të mbështetur qytetarët në tejkalimin e krizës energjetike dhe përballimin e tarifave të shtrenjta./Media Ndërtimi