Është pamje më e pranishme kohëve të fundit. Lokale me qira, të madhësive të ndryshme, sheh në shumë lagje të Prishtinës. Letra në xhamat e lokaleve tregojnë se ato janë të gatshme për qiramarrësit e rinj. Edhe në uebfaqe të ndryshme ka dhjetëra objekte me qira në Prishtinë, që janë bosh e në pritje për klientë.

Natyrisht, ka edhe banesa të shumta me qira.Vetëm këtë vit, sipas Agjencisë Tatimore e Kosovës, për 10 muaj janë paguar 27 milionë euro tatim për qira, rritje prej më shumë se tre milionë eurosh krahasuar me vitin 2022.

Por pse ka kaq shumë objekte me qira në Prishtinë?

“Disa prej arsyeve që kemi lokale me qira është se janë lëshu një numër i madh i ndërtesave për ndërtim, pa ndonjë plan adekuat sa i përket biznesit. Ligji për tregtinë e brendshme ende nuk është funksional, ende nuk ka kalu. Kur kemi një numër kaq të madh të ndërtesave të zbrazëta do të thotë që ato ndërtesa nuk janë duke gjeneru të hyra. Do të thotë që ne kemi një biznes që ka ndërtu një produkt i cili nuk shfrytëzohet, nuk i shitet. Kur nuk shitet produkti do të thotë që ka mungesë të qarkullimit dhe të tregut. Çfarë janë arsyet për mungesën e tregut? Arsyejet janë problematikat që i kemi tash së fundmi edhe me sanksionet, pastaj problemet politike, inflacioni, problemet e luftës (v.j. në Ukrainë) – deklaron Zana Beqiri ngaDhoma e Tregtisë dhe Industrisë.

Përveç lejeve të shumta ndërtimore, një njohës i tregut të patundshmërive thotë se hapja jo aq e madhe e bizneseve të reja ka ndikuar në kërkesën për qira.

“Gjatë vitit të fundit, vërehet rënia e kërkesave të qirave të banesave, edhe të hapësirave afariste. Kjo është shkak i biznesve të cilat po falimentojnë dhe kërkesa për hapësira afariste ka rënë më shumë se sa kërkesa për qiramarrje të banesave.” – deklaroi Ilir Tahiri nga “Illyrian Real Estate”.

Meriton Canaj nga agjencia e patundshmërive “Anem” vlerëson se ndërtesat në Prishtinë në vitet e fundit kanë më shumë hapësira për objekte se më parë.

“Po saktë, shumë prona sheh që janë të lira, por dallimi është pjesë e konkurencës. Në dy vitet e fundit janë fut në përdorim goxha disa ndërtesa dhe ndërtesat tash po ndërtohen, një 30 për qind i ndërtesës po është administrative. D.m.th. po janë lokale, zyre dhe ajo pastaj po e bën këtë dallimin që nëse para tri viteve definitivisht ka pasë më pak treg për zyre se që ka tash. Zyret dhe pjesa biznesore-administrative si target, është gjithmonë më e dëshirueshme prej pronarëve, sepse edhe çmimi është më i lartë. Ndryshe lëshon me qira një banesë për banim, ndryshe për zyre” – deklaroi Meriton Canaj nga “Anem”.

Sipas analizës së Canajt, tregu i qirasë është zgjeruar në tri vitet e fundit, por, natyrisht, edhe çmimi i qirasë është rritur.

“Tregu u rrit i zyreve. Mundem me thënë që në dy vitet e fundit është goxha një far rritje përafërsisht 30-35 për qind më shumë po ka në treg zyre sesa që ka pasur para pandemisë. Çmimi në tri vitet e fundit është rritur, por është rritur edhe kualiteti. Një kohë në treg ka pasur ndërtesa që janë përshtat në zyre. Tash ndërtesa ndërtohet me kualitet dhe me infrastrukturë të zyrës, rrjedhimisht edhe çmimi i metrit katror aty është më i lartë se sa po e zëmë në një ndërtesë të vjetër në qendër të qytetit. Kërkesë më së shumti ka në Prishtinë, që ka bërë që secili çmim i zyreve, po flas për zonën e parë të qytetit, me u rrit ndjeshmërisht, unë po e gjykoj te 28-30 për qindëshi në tri vitet e fundit” – vlerësoi Canaj.

Natyrisht, ka edhe lagje më të kërkuara, kushtimisht më “ekskluzive”, ku qiraja kushton më shtrenjtë.

Po kush po merr më së shumti objekte me qira?

“Një kohë, para tri viteve, 500-600 metra katrorë kanë qenë objektet, tash ka kalu në 2000-3000 metra katrorë, që po ka hapësirë. Atë hapësirë më së shumti me fol me përqindje, e kanë kërkesë kompanitë e teknologjisë, kompani softuerike, ku kanë numër të madh të stafit.” – përfundoi Canaj./Media Ndërtimi