Kryetari i Bordit, Nazmi Mikullovci nuk e thotë të vërtetën rreth çështjes. Asnjë masë ndaj Jasharit.

Shefi i Agjencisë Kosovare të Privatizimit (AKP), Avni Jashari është tërhequr nga nisma për përcaktimin e kufirit problematik mes parcelës së NPB-së dhe një prone të administruar prej AKP-së në Lakrishtë që është objekt hetimi i Prokurorisë Speciale në kuadër të projektit të dyshimtë 120 milionësh afaristo banesor.

Lajmin e ka bërë të ditur kryetari i Bordit të Agjencisë Kosovare të Privatizimit (AKP), Nazmi Mikullovci i cili ka thënë se është njoftuar nga vartësi i tij, Jashari se është refuzuar propozimi i ri i Ndërmarrjes Publike Banesore (NPB).

Dokument vendimi për refuzim nuk është bërë ende publik.

Mikullovci:  Ai më ka tregu që ka pasë një kërkesë (nga NPB), por që është refuzu se nuk është interesi jonë tash me përcaktu aty parcelën.

Pyetje:  Kur është refuzu?

Mikullovci:  Valla nuk jam i sigurtë. Para Vitit të Ri…

Por, ndryshe prej asaj që deklaron Mikullovci, sipas burimeve të sigurta, propozimi ishte miratuar në parim si i rregullt në Agjencinë Kosovare e Privatizimit në prag të Vitit të Ri dhe festave të zgjatura të janarit dhe pritej të procedohej tutje për në Drejtorinë e Kadastrit të Komunës së Prishtinës.

Propozimi i NPB-së, ishte dorëzuar më 17 dhjetor 2021 në AKP, vetëm tri ditë pas një takimi të fshehtë për publikun mes kryeshefit ekzekutiv të NPB-së, Hajdar Hoxhaj dhe shefit të Agjencisë Kosovare të Privatizimit, Avni J. Jashari.

Përkundër faktit se kjo çështje është me interes të madh publik, dy bartësit e funksioneve publike janë dakorduar dhe kanë marr vendime në kushte të jotransparencës pa njoftim të medieve. Lidhur me këtë çështje kanë qenë të mbyllur dhe nuk nuk kanë dashur të deklarohen fare as Jashari e as Hoxhaj, që prej datës 22 dhjetor kur kanë pranuar pyetjet në e-mailin zyrtar.

Zëvendësi i drejtorit menaxhues, Avni J. Jashari nuk ka ofruar qasje në këtë dosje të AKP-së. Ai ka deklaruar vetëm se nuk ka vendime të lëshuara nga Agjencia.

Kryetari i Bordit të AKP-së insiston sërish në deklaratën e tij.

Mikullovci: Nuk u pranu për me nda mexhën bashkë. Ata kanë propozu, na kemi thonë s`jemi të interesum, qaq!.

Pyetje: Cila është arsyeja?

Mikullovci: Janë disa arsye. Unë nuk muj tash me i diskutu sepse kemi dëme nëqoftëse flas. Sepse nëqoftëse  ndërtohet një ndërtesë e lartë, atëherë hup vlerën prona jonë.

Pyetje: D.m.th, njëra prej arsyeve është kjo?

Mikullovci: Po kryesorja është. Na gjithmonë e vlerësojmë interesin e pronës së qytetarëve. Për atë edhe jemi”.

Përkundër asaj që deklaron Mikullovci, pikërisht propozimi i NPB-së ishte vlerësuar se nuk e humb vlerën e pronës së AKP-së në Lakrishtë dhe kishte kaluar në parim.

“Jo, nuk e di!  Ani de në qoftëse ke informata….. po kush je ti?…. Ani de, mirë në rregull, Paq sukses, çdo të mirë”, ka thënë Mikullovci, i cili nuk e ka vazhduar më bisedën.

Kujtojmë se vetë kreu i Agjencia Kosovare e Privatizimit, Avni J. Jashari, i kishte iniciuar procedurat për përcaktimin e kufirit kadastral mes dy parcelave në Lakrishte përkundër faktit se kjo çështje po hetohet nga Prokuroria Speciale për shkak të pretendimeve të bazuara për keqpërdorime dhe shkelje ligjore dhe se disa zyrtarë të AKP-së tashmë ishin intervistuar për këtë çështje.

Kjo çështje problematike ligjore lidhet drejtpërdrejt me tentativën për të çuar përpara projektin e dyshimtë 120- milionësh afaristo banesor të NPB-së në Lakrishtë që kulmoi me skandalin mjedisor të shkatërrimit të azbestit kancerogjen dhe ndaj të cilit projekt rëndojnë akuza serioze për dhjetëra shkelje ligjore e procedurale.

Më herët, NPB-ja nuk kishte arritur ta merrte pëlqimin nga AKP-ja për shkak të shumë parregullsive përfshirë mungesën e dokumentacionit të plotë kadastral që do ta dëshmonte sipërfaqen faktike të NPB-së në Lakrishtë.

Për këtë tentativë klandestine, përmes emaileve zyrtarë kam vënë në dijeni Bordin e AKP-së, Agjencinë Kadastrale e Kosovës, Kuvendin e Kosovës që mbikëqyrë punën e AKP-së, Kryeministrinë dhe Prokurorinë Speciale.

Deri më tash, Bordi i AKP-së nuk ka diskutuar për këtë çështje dhe nuk ka marr asnjë masë ndaj shefit të AKP-së, zëvendësit të drejtorit menaxhues, Avni J. Jashari lidhur me këtë tentativë.

Historiku i rastit

Muaj më parë, vendimi për përcaktimin e kufirit kadastral në mes të parcelave të NPB-së dhe AKP-së ishte nxjerr kundërligjshëm nga Kadastri i Komunës së Prishtinës që drejtohej nga Shpend Ahmeti, pa pëlqimin e AKP-së.

Lënda poashtu ishte miratuar nga Komuna përkundër faktit se NPB-ja kishte kontraktuar një teknik gjeodet me shkollim të mesëm, i cili jashtë kompetencave të tij kishte përcaktuar kufirin duke kryer punën e gjeodetit të licencuar në kundërshtim me legjislacionin në fuqi.

Për këto shkelje banorët e Lakrishtës e kishin njoftuar ministrin e mjedisit, Liburn Aliu i cili më pas kishte kërkuar nga Agjencia Kadastrale t`i hetonte këto pretendime.

Shkeljet janë vërtetuar dhe Drejtoria e Kadastrit në fund të qeverisjes së Shpend A. Ahmeti ishte detyruar ta anulonte vendimin që kishte nxjerr vetë dhe ta kthente gjendjen e mëparshme kadastrale.

Askush nuk ka dhënë përgjegjësi penale por as morale e profesionale për këtë çështje.

Nuk ka pasur dorëheqje e as shkarkim.

Kryeshefi i NPB-së vazhdon t’i ushtroj detyrat e tij përkundër se dyshohet që bashkë me ish qeverisjen komunale të Prishtinës dhe institucionet e tjera është i përfshirë në dhjetëra shkelje ligjore që kulmuan me rrezikimin e shëndetit të banorëve nga shkatërrimi pa kontroll me eskavator i azbestit që u konstatua nga laboratori i pavarur gjerman se i pêrket shkallës së tretë me rrezikshmëri të lartë kancerogjene.

Ekzistojnë dyshime të bazuara se në këtë projekt multi-milonësh është i përfshirë një rrjet i tërë institucional dhe jo vetëm.

Prokuroria Speciale do ta thotë fjalën e saj.

*Artikull i shkruar nga gazetari Arsim Halili./Media Ndërtimi.