Komuna e Ferizajt nuk ka njohuri se a i ka arritur objektivat e projektit sepse nuk ka hartuar një metodë për të matur ndikimin që do të ketë projekti.

“Komuna nuk ka të dhëna paraprake për numrin e aksidenteve në zonën e hekurudhës dhe në mungesë të tyre s’ka mundësi të masë efektin e projektit.”, shkruan në raportin e auditimit të performancës “Bashkimi i qytetit të Ferizajt”.

Komuna as nuk kishte hartuar projeksione paraprake lidhur me të hyrat nga qiratë e lokaleve ndërsa ka pasiguri lidhur me mbledhjen e tyre për shkak të kontestit pronësor me INFRAKOS-in.

Komuna ka lëshuar parkingjet nën tokësore në përdorim me anë të Kompanisë Publike Komunale “Ambienti”, mirëpo tarifat ende nuk janë aprovuar në Kuvendin Komunal prandaj aktualisht Kompania operon me tarifa që i cakton vet.

Bazuar në çështjet e identifikuara gjatë auditimit rezulton se ka nevojë për përmirësime në procesin e zhvillimit të projekteve të tilla në secilën fazë të tyre.

Për të eliminuar mangësitë e identifikuara Zyrës Kombëtare të Auditimit ka dhënë 13 rekomandime, dy për Ministrinë e Mjedisit Planifikimit Hapësinorë dhe Infrastrukturës dhe 11 për Komunën e Ferizajt.

Përgjigja e palëve të përfshira në auditim Ministria e Mjedisit Planifikimit dhe Infrastrukturës dhe Komuna e Ferizajt janë pajtuar me gjetjet e auditimit si dhe janë zotuar se do t’i adresojnë të gjitha rekomandimet e dhëna.

Komuna nuk kishte marrë të gjitha masat për të siguruar parakushte për ndërtim të papenguar të projektit. Komuna e kishte ndërtuar projektin në parcela mbi të cilat INFRAKOS-i, ka pretendime pronësore. Kjo ka ndikuar në zgjatjen e kryerjes së punëve dhe ndërprerje të shumta të punimeve gjatë ekzekutimit.

Kjo për shkak se ka munguar koordinimi në mes Komunës dhe INFRAKOS-it. Komuna kishte aplikuar për pëlqim për ndërtim nga Kompania Regjionale e Ujit dhe Kanalizimit Bifurkacioni në Ferizaj përderisa kjo e fundit ka lëshuar dy pëlqime për të njëjtën kërkesë.

Komuna ka kontraktuar shërbime/punë me çmim shumë më të lartë se vlera e parashikuar e kontratave duke e kufizuar konkurrencën mes operatorëve ekonomik.

Vlera e kontraktuar për konkurs të projektimit ishte katërfish më e lartë apo për 61,500 euro më shumë se vlera e parashikuar.

Për kontratën Ndërtimi i nënkalimit për vetura vlera e parashikuar e kontratës ishte tejkaluar për 1.9 milion euro apo për 47% më shumë se vlera e kontraktuar.

Për kontratën Ndërtimi i nënkalimit shkak ishte mos analizimi i duhur i vlerës së parashikuar të kontratës.

Komuna nuk e kishte menaxhuar ndërtimin e projektit si duhet sepse i kishte paguar operatorit ekonomik punë të cilat ende nuk janë përfunduar dhe në anën tjetër operatori ekonomik ka përfunduar punë për të cilat ende nuk është paguar.

Kjo për shkak se menaxherët e kontratave nuk kishin menaxhuar në mënyrë aktive kontratat e ndërtimit, nuk kishin raportuar në mënyrë sistematike dhe të detajuar dhe nuk kishin plotësuar librin ndërtimor siç duhet, andaj ne nuk kemi marrë siguri që shumat e paguara përputhen me punët që janë kryer.

Komuna nuk ka bërë ende pranim teknik të projektit, për shkak se nuk janë përfunduar të gjitha punët në projekt, mirëpo i njëjti është inauguruar dhe është lëshuar në përdorim.

Përdorimi i nënkalimeve pa pranim teknik, rrezikon sigurinë e përdoruesve dhe në rast dëmtimi, është e vështirë të identifikohet kush e ka shkaktuar dëmin./Media Ndërtimi.