Plani Zhvillimor Komunal (PZhK) është një dokument strategjik multi-sektorial që e harton Komuna me të cilin i përcakton caqet afatgjata të zhvillimit ekonomik, social dhe hapësinor në komunë. PZhK-ja pastaj zbërthehet në planin zhvillimor urban (PZhU) dhe rural (PZhR) për një periudhë së paku tetë (8) vjeçare. Para se të përfshihen në Ligjin e Buxhetit, projektet duhet të përfshihen në PZhK, përkatësisht PZhU dhe PZhR.

Projekti “Bashkimi i qytetit të Ferizajt” ngërthen tre projekte të cilat janë përfshirë në Ligjin e Buxhetit të vitit 2018, e pastaj janë definuar me një Memorandum Mirëkuptimi në mes të Komunës së Ferizajt (tutje Komuna) dhe Ministrisë së Mjedisit, Planifikimit Hapësinorë dhe Infrastrukturës (tutje Ministria). Ministria e ka përfshirë projektin në tabela të buxhetit të vitit 2018 pa kërkuar detaje nga Komuna.

Në PZhK-në 2017-2025 është e vështirë të identifikohet ky projekt, sepse nuk ka përshkrim që përputhet me projektin. Ekziston vetëm përshkrimi “ndërtimi i parkingjeve nëntokësore” që përbën vetëm një pjesë të projektit.

Në foto është identifikuar parcela ku do të ndërtohej parkingu nëntokësorë (pjesa e hijezuar me ngjyrë vjollcë).

Sipas zyrtarëve të komunës, kjo pjesë paraqet edhe projektin “Bashkimi i qytetit të Ferizajt”.

Komuna nuk ka PZhU, ku për “Bashkimin e qytetit të Ferizajt” do të mund të gjendeshin më shumë detaje.

Me PZhU-në komunat dokumentojnë të ardhmen e planifikuar të qytetit, orientimet e saj zhvillimore të zbërthyera në objektiva të matshme dhe specifike.

Po ashtu, PZhU-ja duhet të përmbajë edhe vlerësimin Strategjik Mjedisor dhe Vlerësimin e Ndikimit në Mjedis. Përveç që Komuna nuk e ka PZhU-në, nuk i ka as këto dy vlerësime.

Sipas zyrtarëve, Komuna është në proces të hartimit të PZhU-së, prandaj Komuna nuk e ka përfshirë projektin në këto plane.

Në mungesë të PZhU-së, “Bashkimit të qytetit të Ferizajt” i mungojnë vlerësimet, shumë të nevojshme para fillimit të punimeve/investimeve në komunë. Për më tepër, projekti nuk ka kaluar për shqyrtim dhe miratim në kuvend komunal.

Meqë projektet nuk kanë derivuar nga një analizë e mirëfilltë e rrethanave dhe nuk ishin përfshirë në dokumentet strategjike komunale, vendimi i Komunës për investim ishte vendim arbitrar. Komuna ka përgatitur vetëm një dokument ekspertize, i cili përmban rekomandime por pa detaje specifike dhe kritere të matshme.

Për më tepër, dokumenti është hartuar pasi që Ligji i Buxhetit për vitin 2018 ishte miratuar në Kuvendin e Kosovës.

Dokumenti nuk është as i protokolluar. Kjo mënyrë e marrjes së vendimeve për investime e bën Komunën jo transparente dhe të hapur ndaj qytetarëve të saj për projektet në të cilat investon.

Në korrik të vitit të kaluar kryetari i Ferizajt, Agim Aliu përuroi nënkalimin “Bashkimi i qytetit”.

Duke falënderuar të gjithë bashkëpunëtorët dhe kontributdhënësit për këtë nënkalim, Aliu potencoi se ferizajasit padrejtësisht janë ndarë përmes hekurudhës dhe, sipas tij, nuk e meritonin një gjë të tillë.

“E bëmë këtë sepse Ferizaj pati një borxh: të mos ndajë qytetarët dhe ekonominë në dy krahët e tij. E për këtë u desh punë e përkushtim, u desh dija profesionale”, kishte deklaruar Aliu.

Tenderi i këtij projekti ishte shpallur më datën 20 korrik të vitit 2018, dhe kishte një kosto prej 6 milionë euro./Media Ndërtimi.