Drejtori i Urbanizmit në Komunën e Obiliqit, Arben Berisha, i cili kishte pranuar fajësinë për korrupsion, nuk do të shkojë në burg gjashtë muaj dhe as nuk do t’i ndalohet ushtrimi i funksioneve publike sipas aktgjykimit të Gjykatës së Apelit.
Kjo pasi që Gjykata Supreme e Kosovës, pas aprovimit të kërkesës për mbrojtje të ligjshmërisë ka kthyer në rigjykim rastin ndaj Berishës, i cili kishte pranuar fajësinë për akuzën se në prill të 2019-ës kishte lëshuar një leje për ndërtimin e një fabrike në tokë bujqësore dhe në kundërshtim me ligjin, raporton “Betimi për Drejtësi’.
Sipas aktakuzës, Arben Berisha si drejtor në Drejtorinë për Planifikim Urban, Pronë, Gjeodezi dhe Kadastër në Komunën e Obiliqit dhe Merita Simninca shefe në këtë drejtori, me qëllim që t’i sjellin çfarëdo dobie pasurore vetes apo tjetrit, në këtë rast Blerim Krasniqit, pronar i fabrikës së mobileve “Berto”, kishin keqpërdorur pozitat e tyre zyrtare.
Sipas prokurorisë, të akuzuarit e kishin bërë një gjë të tillë pasi kishin lëshuar leje ndërtimore më 3 prill 2019 për ndërtimin e fabrikës së mobilieve “Berto”, në kundërshtim me udhëzimin administrativ nr.41/2006 dhe Ligjit për tokën bujqësore.
Sipas aktakuzës, të akuzuarit kanë qenë në dijeni se Ministria e Bujqësisë, Pylltarisë dhe Zhvillimit Rural e kishte refuzuar kërkesën e Blerim Krasniqit për ndërrimin e destinimit të tokës në fjalë nga bujqësore në jo bujqësore.
Me rastin e kërkesës për mbrojtje të ligjshmërisë të mbrojtësit të të dënuarit A.B. e detyrimisht aktgjykimi i Gjykatës Themelore në Prishtinë – Departamenti për Krime të Rënda PKR.nr.896/2020 i datës 15.02.2021 dhe aktgjykimi i Gjykatës së Apelit të Kosovës, PAKR.nr.94/2021 i datës 31.03.2021, anulohen dhe urdhërohet mbajtja e rishqyrtimit gjyqësore në Gjykatën Themelore në Prishtinë”, thuhet në aktgjykimin e Supremes.
Berisha ishte shpallur fajtor nga Gjykata Themelore në Prishtinë, pas pranimit të fajësisë për keqpërdorim të pozitës zyrtare më 15 shkurt 2021.
Ndaj tij kjo gjykatë kishte shqiptuar dënim me burgim në kohëzgjatje prej 6 muaj, i cili dënim me pëlqimin e të dënuarit i ishte zëvendësuar me dënim me gjobë në shumë prej 3 mijë e 600 euro.
Vendim i Gjykatës së Apelit është anuluar nga Gjykata Supreme e Kosovës, e cila ka aprovuar kërkesën për mbrojtje të ligjshmërisë së ushtruar nga mbrojtësi i të akuzuarit Berisha, avokati Florin Vërtopi.
Në vendimin e Supremes thuhet se kjo gjykatë me rastin e vendosjes mbi kërkesën për mbrojtje të ligjshmërisë ka konsideruar të dyshimtë saktësinë e fakteve vendimtare të vërtetuara me vendimet e instancave më të ulëta.