Banorët e fshatit Shipitullë të Obiliqit po ankohen se KEK-u nuk ua ka kompensuar objektet nga të cilat duhet të largohen për shkak se nga aty do të nxirret thëngjill për prodhim të rrymës. Ata kanë edhe ankesa të tjera për të cilat presin zgjidhje.

Përveç kësaj, banorët që kanë mbetur ende pa u zhvendosur nga fshati Shipitullë të Obiliqit, janë në hall edhe me pronat, raporton RTKlive.

Ata pretendojnë se ndryshe nga pronat, KEK-u nuk ua ka kompensuar edhe objektet. Nga kjo zonë do të nxirret thëngjill për prodhim të rrymës.

Përveç kësaj, shqetësim tjetër kanë edhe rrugën që i lidh me komunën e Obiliqit për të cilën ankohen se pritet të mbyllet.

“Ju kemi drejtuar KEK-ut, ministrit, kryeministrit, gjithkund jemi ankuar, nuk kemi marrë asnjë përgjigje deri sot. Kjo rrugë që na lidh me Obiliq parashihet me u mbyll, për t’i kryer shërbimet na ose duhet të shkohet në Fushë Kosovë ose në Prishtinë. Çka o tu ndodh këtu është tmerr”, tha Fatmir Mjekiqi.

Një banor tjetër thotë se nuk po i lejohet të ndërtojë shtëpi në pronën e tij në këtë zonë. Xhemil Mjekiqi, tha se ata nuk i kanë lanë të ndërtojnë shtëpi aty për shkak se i kanë thënë se është zonë me interes./Media Ndërtimi

Anëtarët serbë të Këshillit Komunal të Srebrenicës kanë votuar për riemërtimin e shumë rrugëve të qytetit, për t’i nderuar viktimat serbe të luftës, por duke e injoruar njëkohësisht masakrimin e 8.000 burrave dhe djemve boshnjakë më 1995.

Me gjithë kërkesat ndërkombëtare për ta rishqyrtuar planin dhe pas bojkotit nga anëtarët boshnjakë të këshillit, propozimi për riemërtimin e 25 rrugëve në Srebrenicë dhe fshatin fqinj, Skelani, u miratua më 15 prill.

Ky vendim është cilësuar nga kritikët si tentim i radhës për ta fshirë historinë e mizorisë më të madhe në Evropë prej Luftës së Dytë Botërore.

Sipas planit, një shesh dhe një pjesë e një rruge është riemërtuar “Republika Sërpska”, për nder të emrit të entitetit serb të Bosnjë e Hercegovinës. Një rrugë tjetër do të riemërtohet në emër të një komandanti kontrovers serb nga Lufta e Parë Botërore.

Muajin e kaluar, misioni i OSBE-së në Bosnjë e Hercegovinë e mirëpriti Projektin Rrugët për Paqe, një nismë nga të rinjtë e qytetit për t’i riemëruar rrugët duke përdorur emra gjithëpërfshirës dhe neutral, si “Rruga e së Ardhmes”, “Rruga e Tolerancës” dhe “Fëmijët e Srebrenicës”.

Ky vendim vjen në prag të një debati të Asamblesë së Përgjithshme të OKB-së më 17 prill, ku do të diskutohet një rezolutë e OKB-së për shpalljen e 11 korrikut si Ditë Ndërkombëtare të Kujtimit të Gjenocidit në Srebrenicë në vitin 1995, e cila pritet të votohet më 2 maj.

Rezoluta është pjesërisht e ngjashme me rezolutën për gjenocidin e Ruandës, ku rreth 800.000 tutsi dhe hutu ishin vrarë. Drafti i saj është zhvilluar nga një grup vendesh, përfshirë Ruandën, Gjermaninë, Francën dhe Shtetet e Bashkuara./Media Ndërtimi

Të hënën nisin punimet për vazhdimin e ndërtimit të rrugës Prishtinë-Pejë, përkatësisht segmentit Kijevë-Dollc.

Lajmin për Indeksonline e kishte konfirmuar, zv/ministri i Infrastrukturës, Hysen Durmishi.

“Po, është e vërtetë. Të hënën nisin punimet nga kompanitë që kanë fituar tenderin” kishte thënë Durmishi.

Mirëpo, situata krejt ndryshe është në terren. Kompanitë që kanë fituar tenderin ende nuk kanë filluar punimet në ndërtimin e këtij segmenti që është i ndarë në katër llote, ndërsa vlera e kontrata të nënshkruara është 21 milionë euro.

Kontratat e kompanive fituese të tenderit tashmë janë publike.

Loti 1 do të ketë vlerën e 7.3 milionë eurove dhe do të ndërtohet nga Rukolli, Saba Belca dhe Elmazaj Konstruksion.

Loti 2 ka vlerë mbi 6 milionë euro dhe do menaxhohet nga Empreus, Jaha Compani, Premium, Toifor, NNT ABC SHPK dhe Metag Insaat Ticaret.

Loti 3 është me vlerë më të ulët me 5.4 milionë euro dhe do të punohet nga kompania Lika.

Loti 4 ka vlerën më të madhe me mbi 9 milionë euro. Kompanitë fituese janë Famis CO-HC, SH.A KIT-AK, Gradnje, KAG-Asphalt Company./Media Ndërtimi