Aktuale

Prona (pjesërisht) e avulluar, qytetari s’mund ta vë pronën në emër të tij

Published

4 years ago

March 14, 2020

A ju ka ndodhur ndonjëherë të blini një pronë, të jetoni apo punoni në të. Dhe vetëm kur doni ta rindërtoni atë ta kuptoni që në fakt keni paguar mijëra euro kot, pasi tërësia e pronës është avulluar.

Kjo, në fakt, është ajo që i ka ndodhur Gazmend Bucollit nga Drenasi, i cili pagoi 161 mijë euro për një lokal që tërësinë e përgjithshme e pati vetëm në kontratën e shitblerjes, raporton Koha.net

Gazmend Bucolli vendosi ta blinte edhe një lokal, madje ngjitur me lokalin që tashmë e kishte, në Drenas.

Lokali kishte 87 metra katrorë dhe më 2010 kishte kaluar nga prona shoqërore e ish-ndërmarrjes së ëmbëlsirave Kosovarja tek Azem Bytyqi, i cili arriti ta privatizojë nga Agjencia Kosovare e Privatizimit për 121 mijë euro.

Por, pikërisht këtu filluan misteri dhe beteja për ta zbuluar të vërtetën e tërësisë së kësaj prone. Bazuar në një vendim nga 18 prilli 2017, lokali ka hiç më shumë se 70.8 metra katrorë.

Bucolli, në fakt, ende nuk ka arritur që këtë pronë ta vërë mbi emër të tij pikërisht shkaku i zhdukjes së këtyre metrave katrorë.

Komuna e Drenasit nuk i ka dhënë asnjë përgjigje, duke u arsyetuar se aktualisht sektori i Gjeodezisë e ka të pamundur që ta caktojë kufirin e parcelave pasi nuk ka harta kadastrale dhe se planet origjinale ishin marrë nga “okupatori” serb.

Por, në fakt, komuna del ta ketë mashtruar atë, pasi pas shqyrtimit të dokumentit është vërejtur që ajo përgjigje nga Drejtoria e Kadastrit, Gjeodezisë dhe Pronës është lëshuar në vitin 2017 e jo më 2010, siç na është prezantuar atë ditë.

Ani pse kërkesa mbante datën e 8 dhjetorit 2010 kur pronari i ri Azem Bytyqi kishte kërkuar nga Komuna e Drenasit që të përcaktonte kufirin e pronës së privatizuar, përgjigjen e kishte marrë saktësisht më 24 prill të 2017, pra 7 vjet më vonë dhe atë duke mos i sqaruar se përse i mungojnë 16 metra katrorë të lokalit.

Bucolli thotë se përgjigjen e tij e kishte kërkuar edhe në AKP, e cila i kishte thënë se gabimet mund të ishin milimetrike, por asnjëherë me metra katrorë.

AKP-ja i është përgjigjur edhe Kohavisionit, duke na njoftuar se lokali në fjalë është tenderuar në shitjen e aseteve me likuidim nr.3 dhe se sipërfaqja e lokalit ishte 61 metra katrorë lokal dhe 26 depo, apo në një total prej 87 metrave katrorë. Po ashtu, AKP-ja ka bërë të ditur se palët kanë pasur mundësinë dhe të drejtën për verifikimin, inspektimin dhe hulumtimin e të gjitha informacioneve, si në terren ashtu edhe në dokumentacion.

Por, pronari që realisht figuron në dokumentacion, Avni Bytyqi, nuk ka folur për KTV-në. Ishim dakorduar me pronarin e ri që ta takonim ne Drenas, por ai nuk erdhi me arsyetimin që është në Malin e Zi.

Milaim Ahmeti, për 24 vjet kishte punuar në atë vend dhe e di mjaft mirë se si u tjetërsua një pjesë e kësaj prone. Sipas tij, ajo është shitur te një person me emrin Ismet Elshani nga Krajkova, e shitja e pronës është bërë nga Shemsi Elezi.

Vetë Elezi e ka mohuar një gjë të tillë.

Ai ka insistuar se prona e shitur i takonte të atit të tij, se nuk ka tjetërsuar asnjë gjë dhe se posedon dokumentacion adekuat për pronësinë e tokës.

Për Kohavisionin ka refuzuar të flasë edhe Ismet Elshani, i cili bazuar në deklarimet e pronarit të ri, Bucollit, është i gatshëm të bashkëpunojë me të për t’ia kthyer lokalin nëse ai e paguan, shumë që ky e kishte dhënë kur e ka blerë atë.

Në fakt, Elshani ka një kontratë të rregullt të shitblerjes mes tij dhe Shemsi Elezit, i cili kishte qenë asamblist i PDK-së në Drenas, deri sa më 2017-n ishte edhe kandidat për kreun e komunës nga radhët e Vetëvendosjes.

Në prillin e 2006-s ai ia kishte shitur Elezit një pronë me sipërfaqe prej 0.00.62 hektarëve, me një çmim prej 17 mijë e 800 eurosh.

Por, Milaimi Ahemti thotë se kishte paralajmëruar Elezin që po shiste tokën e huaj.

Sidoqoftë, Milaim Ahemti është i bindur se përveçqë një pjesë e lokalit u tjetërsua, ai e gëzon të drejtën e atij lokali pasi thotë se e privatizoi më 1997 nga “ZitoKondita”, madje insiston se ka edhe dokumentacioni valid për këtë privatizim.

Lëndën e tij thotë se e ka në Dhomën e Posaçme të Gjykatës Supreme dhe është i bindur se do ta fitojë.

Aktuale

Publikohet platforma digjitale për historinë e Prishtinës

Published

7 hours ago

May 16, 2024

Ndertimi Media

Historia qindravjeçare e Prishtinës tash e tutje do të mund të njihet edhe përmes platformës digjitale “Prishtina në histori”.

E krijuar nga “Trembelat”, kjo platformë prezanton qindra dokumente origjinale për Prishtinën, që nga shekulli i 13-të.

Përmes një komunikate për media, “Trembelat” kanë bërë të ditur se platforma digjitale (qerthulli) “Prishtina në histori” përmbledh një grumbull digjital të teksteve, hartave, gravurave, fotografive dhe punimeve rreth historisë së qytetit të Prishtinës që kapin kohën prej fundit të shekullit 13-të deri në vitete e para të shekullit 20-të.

Në Arkivin e Prishtinës, pjesë e Komunës së Prishtinës, rishtazi janë sjellë rreth 38,598 dokumente osmane, të cilat dokumentojnë historinë e Prishtinës prej shekullit të 15-të deri në shekullin 20-të, shumica prej tyre, siç thuhet në komunikatë janë krejt të pastudiuara dhe të panjohura për publikun.

Në anën tjetër, po sipas komunikatës, shumë studime të cilat janë bërë bazuar në arkivat e Romës, Venedikut dhe Dubrovnikut mbesin në sirtarë të bibliotekave dhe njihen vetëm prej një grupi të vogël specialistësh.

“Këto të dhëna, por dhe të tjera që kanë të bëjnë me të kaluarën e Prishtinë, nga arkiva, biblioteka e koleksione janë mbledhur dhe do të vazhdojnë të mblidhen në fazat e tjera të këtij projekti (Prishtina në histori)”- thuhet në komunikatën e ‘Trembelave”.

Po siaps komunikatës, në mesin e materialeve të botuara janë edhe rreth 100 dokumente origjinale të përkthyera, si shtesë për tekstet e shkruara enkas, e artikuj të rëndësishëm nga e kaluara që meritojnë të lexohen më gjerësisht, pjesa më e madhe e tyre, sic thuhet më tej në komunikatë, janë botuar në këtë fazë fillestare.

Platforma është iniciativë e “Trembelave” me siglën botuese “Varg” e mbështetur financiarisht nga Komuna e Prishtinës, në partneritet të ngushtë edhe me Arkivin e Prishtinës, të cilët edhe kanë mundësuar qasjen në dokumentet nga arkivat osmane, që në vitin 2018 janë sjellë në kopje digjitale te ky arkiv./Media Ndërtimi

Aktuale

Asociacioni i Arkitektëve të Kosovës organizon kuvendin zgjedhor

Published

1 day ago

May 15, 2024

Ndertimi Media

Të nderuar anëtarë të Asociacionit të Arkitektëve të Kosovës, duke u bazuar në Ligjin Nr. 06/L-043, për Lirinë e Asocimit ne Organizata Joqeveritare dhe Nenit 26, të Statutit të Asociacionit të Arkitektëve të Kosovës, të vitit 2022, shpallë Zgjedhjet e rregullta për Kryetarin e a-a-k.

KUVENDI ZGJEDHOR i a-a-k, do të mbahet:

Datë: 23.05.2024 (E Enjte)

Ora: 17:00 h

Vendi: MODELARIUMI në Fakultetin e Arkitekturës në UP-ë.

Ftohen, të gjithë anëtarët e Asociacionit të Arkitëktëve të Kosovës që të marrin pjesë në kuvendin zgjedhor, dhe në frymën e konkurencës së lirë dhe kandidimit, të shprehin vullnetin e tyre për tu kandiduar për pozitën e kryetarit të a-a-k, duke u mbështetur në nenin 32, të Statutit./Media Ndërtimi

Aktuale

“Reagim ndaj shkrimeve të pasakta dhe tendecioze rreth nënshkrimit të kontratës me Arkitektin e Qytetit”

Published

2 days ago

May 14, 2024

Ndertimi Media

Komuna e Prishtinës ka reaguar ndaj shkrimeve rreth nënshkrimit të kontratës me Arkitektin e Qytetit”

Me datën 13 maj 2024 është publikuar një shkrim me titull “Tre muaj para se të regjistrohej në ARBK, kompania Shërbimi i Arkitektit të Kryeqytetit nënshkroi kontratën me Komunën e Prishtinës” nga një prej portaleve lokale, dhe po të njëjtat informata të pasakta e tendencioze janë shpërnda nga eksponentë politik të caktuar.

Kryeqyteti informon qytetarët se ky artikull dhe shkrimet pasuese janë të pasakta dhe se:

Konsorciumi i kompanive fituese kanë qenë të regjistruara pranë ARBK shumë kohë më parë
Procesi i tenderimit të Shërbimit të Arkitektit të Kryeqytetit është vlerësuar tri (3) herë nga OSHP, si proces i rregullt dhe në përputhje me ligjin.
Procesi i tenderimit është zhvillu përmes sistemit elektronik “EPROKURIMI” dhe të gjitha të dhënat digjitale janë në dispozicion për të vërtetuar rregullsinë e procesit

Më poshtë është shpjeguar në hollësi procesi.

Aktiviteti i prokurimit me titull “Konsulencë për themelimin e Shërbimit të Arkitektit të Kryeqytetit për nevojat e Komunës së Prishtinës” me nr. të prokurimit 616-22-7431-3-1-2, është publikuar me datën 21.07.2022. Pra aktiviteti ka filluar në korrik të vitit 2022 dhe ka përfunduar rreth 1 vit më pas apo më 27.06.2023 kur është nënshkruar kontrata, ndërsa kontrata e nënshkruar si e tillë përmes kësaj procedure aktualisht është në zbatim e sipër. Procedura si e tillë është zhvilluar në dy faza, ku kanë marrë pjesë gjithsej 6 tenderues (operatorë ekonomik ose grupe të operatorëve ekonomik). Gjatë aktivitetit të prokurimit janë shtjerrë të gjitha procedurat sipas mjeteve juridike në dispozicion. Mbi të gjitha kjo lëndë është trajtuar tri (3) herë nga OSHP dhe nënshkrimi i kontratës është manifestuar vetëm pas rikonfirmimit përmes vendimit të tretë të Panelit Shqyrtues në OSHP.

Sa i përket pretendimit se është nënshkruar kontratë me një operator ekonomik që nuk ka qenë i regjistruar në ARBK, duhet theksuar faktin që kontrata është nënshkruar me datë 27.06.2023 nga të dy palët kontraktuese dhe jo me datë 27.03.2023 sikurse është pretenduar. Kontrata është nënshkruar në tri kopje origjinale, por në njërën kopje të kontratës me rastin e nënshkrimit të kontratës, operatori ekonomik ka bërë gabim teknik ku në vend të numrit 6 ka shënuar numrin 3. Megjithatë ky gabim menjëherë është reviduar ndërsa data e nënshkrimit është evidentuar saktë (27.06.2023). Pra data e nënshkrimit të kontratës është 27.06.2023 dhe ky fakt është i pakontestueshëm për cilëndo palës me interes juridik. Data e nënshkrimit 27.06.2023 mund të konfirmohet edhe nga sistemi elektronik EPROKURIMI. Vlen të shtohet po ashtu se njoftimi për dhënie të kontratës është publikuar me datë 27.06.2023 ndërsa njoftimi për nënshkrim të kontratës është publikuar me datë 29.06.2023. Pra thjesht ka qenë e pamundur që të nënshkruhet kontrata në muajin mars 2023 sikurse pretendohet. Me këtë rast duhet kuptuar faktin që procedura e prokurimit zhvillohet hap pas hapi në përputhje me dispozitat ligjore në fuqi. Pra nuk mund të kalohet në hapin e radhës pa përmbushur me sukeses hapi paraprak. Gjithashtu, siç u tha më sipër, ky aktivitet është trajtuar tri (3) herë nga OSHP ku vendimi i parë nga OSHP është marrë me datë 02.02.2023, vendimi i dytë me datë 22.05.2023 ndërsa vendimi i tretë dhe i fundit me datë 26.06.2023 me ç’rast është mundësuar edhe nënshkrimi i kontratës me datë 27.06.2023.

Më tutje, grupi i operatorëve ekonomik të kontraktuar “Anarch Sh.P.K. & Ardi CC L.L.C.” kanë qenë të regjistruar kohë më parë. “Anarch” Sh.P.K. si anëtar i konsorciumit ekonomik është themeluar 17.10.2018 ndërsa anëtari tjetër i konsorciumit “Ardi CC” Sh.P.K. është themeluar me datë 29.04.2008. Pra, që të dy kompanitë kanë vite përvojë pune dhe nuk janë regjistruar tre muaj para nënshkrimit të kontratës siç pretendohet në shkrimet tendencioze. Pas shpalljes fitues në procesin e tenderimit, dy kompanitë kanë krijuar shoqërinë me përgjegjësi të kufizuar “Shërbimi i Arkitektit të Kryeqytetit” për zbatim të kontratës dhe këtë e kanë regjistruar në ARBK me 27.06.2023, si një subjekt i përbashkët për qëllime të zbatimit të kësaj kontrate. Edhe nga të dhënat publike të ARBK mund të konfirmohet se shoqëria e konsorciumit “Shërbimi i Arkitektit të Kryeqytetit” përbëhet nga dy operatorët ekonomik tenderues që janë “Anarch” Sh.P.K. dhe “Ardi CC” L.L.C.

Pra nuk qëndrojnë aspak pretendime sipas të cilave kinse është nënshkruar kontratë me një operator të paregjistruar në ARBK.

Bashkëngjitur do të gjeni disa kopje të dokumenteve që i faktojnë të dhënat e mësipërme, të cilat edhe janë në dispozicion publik në EPROKURIMI dhe në ARBK./Media Ndërtimi