Emri i arkitektit Përparim Rama u lakua javën që lamë pas si kandidat i mundshëm që do t’i hyjë garës për kryetar të Komunës së Prishtinës.
U raportua se Rama do të vijë pas 35 vitesh në Kosovë, bashkë me një ekip profesionistësh nga Londra, duke synuar kështu udhëheqjen me kryeqytetin.
Kandidatura e artistit konceptual për të parin e kryeqytetit po vlerësohet të jetë që në fillim të jetë e vështirë për të triumfuar në garën e zgjedhjeve komunale që pritet të mbahen në pjesën e dytë të këtij vitit.
Arkitektët dhe planerët urban janë një nga profilet që kane rol të veçantë në zhvillimin e qyteteve dhe përmirësimin e kushteve te jetesës për banore, thotë për Media Ndertimi, arkitekti Nol Binakaj.
Sipas tij, jo gjithmonë këtë kontribut mund ta japin duke qenë në pozicionin e të parit të qytetit.
“Të jesh udhëheqës i qytetit duhet me pas njohuri të gjerë të administrimit publik dhe të problemeve tjera sektoriale me rendësi vitale për qytetarët.”, thotë Binakaj.
“Personalisht mendoj qe Prishtina nuk është në pozicionin që të eksperimentohet. Ta kemi parasysh që sfidat e menaxhimit të qytetit dhe kërkesat e banoreve dita ditës po shtohen, dhe mendoj që një punë të tillë do duhej ta bënte dikush që është shumë më shumë i mishëruar më Prishtinën e jo nga dikush që pa marr parasysh se kush është apo çfarë përfaqëson politikisht, ne variantin me te mire është pjesërisht i njoftuar me këto sfida dhe realitetin.”
Kryetari i Lidhjes Demokratike të Kosovës, Lumir Abdixhiku ende nuk ka specifikuar se Rama do të jetë kandidat për kryetar të Prishtinës.
“S’kam koment. Ju lutem prisni edhe pak.”, ka thënë drejtuesi i LDK-së.
“Tani ne jemi në proces të vlerësimit të gjendjes së LDK-së nëpër degë që nënkupton ndarjen e anëtarëve të kryesisë së grupeve punuese për të bërë analizën e gjendjes strukturore për gjendjen partisë, për fatin e mirë apo të keq testi i parë vjen nga zgjedhjet lokale që vijnë shpejt dhe në këto zgjedhje LDK do të dalë e përgatitur në aspektin organizativ të brendshëm jo duke përjashtuar njerëz por duke përmirësuar nivelin e organizimit por edhe përfaqësimit politik qendror”, tha ai në ATV.
Arkitekti Bekim Ramku theksoi për Media Ndertimi se kandidatëve potencial iu duhet një analizë e mirë për Prishtinën në mënyrë që t’i futen garës për ta menaxhuar kryeqytetin.
“Prishtinës i vyn menaxher i mire, nuk ka lidhje kjo me profilin profesional te kandidatit, edhe programi (zotimet) i kryetarit te fundit ka qenë i mirë por ka munguar realizimi. Sidoqoftë Përpës (Përparim Ramës) i uroj suksese nëse do kandidohet…”, thotë Ramku.
Përparim Rama është drejtor dhe themelues i 4M Group. Puna e tij është botuar në disa revista ndërkombëtare të dizajnit përfshirë London Building Design Magazine dhe është intervistuar nga BBC, CNN, BLOOMBERG, RAI, The Times Neëspaper mbi Arkitekturën dhe Urbanistikën.