Në gjykimi ndaj ish-kryetari të Komunës së Malishevës Ragip Begaj dhe të tjerëve, mbrojtësit e të akuzuarve thanë se me provat e propozuara për administrim nga ana e Prokurorisë Speciale të Republikës së Kosovës (PSRK) vërtetohet pafajësia e të akuzuarve.
Fillimisht mbrojtësi i të akuzuarit Begajt, avokati, Rrahman Kastrati tha se të gjitha provat e propozuara nga Prokuroria Speciale edhe nëse nuk do të propozoheshin nga prokuroria do t’i propozonin vetë ata pasi që të njëjtat sipas tij, provojnë pafajësinë e të akuzuarve, raporton “Betimi për Drejtësi”.
Avokati Kastrati tha se përgjimet telefonike që janë propozuar për administrim janë në total 10 orë, ku sipas tij, në ato bisedat telefonike vërehen më shumë bisedat e Begajt si kryetar asokohe i komunës me zyrtar lidhur me situatën e Covid-19, sesa për çështjen që akuzohet.
Tutje, edhe mbrojtësi i të akuzuarit Berisha, avokati Haki Kryeziu tha se prova e vetme që e inkriminim klientin e tij është kërkesa për inicim të themelimit të Zonës Ekonomike, e cilia sipas tij është e nënshkruar pikërisht me kërkesë të ish-kryetarit Begaj.
Edhe mbrojtësi i të akuzuarit Krasniqit, avokati Rrahman Paçarizi tha se klienti i tij ka vepruar në bazë të urdhrave që janë dhënë nga kryetari dhe nënkryetari i komunës asokohe dhe se sipas tij, përgjegjësit e klientit të tij kanë qenë zbatimi i kërkesave nga eprorët e tij.
Tutje, edhe mbrojtësi i të akuzuarit Krasniqit, avokati Shemdi Bunjaku tha se me asnjë nga provat e propozuara nga ana e prokurorisë nuk vërtetohet fajësia e të mbrojturit të tij, duke shtuar se me detaisht kundërshtimi i provave nga ana e tyre gjendet në shkresa që kishte dorëzuara paraprakisht.
Edhe mbrojtësi i të akuzuarit Hasanit, avokati Ymer Huruglica tha se si ministri që e ka udhëhequr Hasani kanë qenë të obliguar që të shqyrtojnë kërkesat e komunave, duke shtuar se i mbrojturi i tij nuk ka qenë person vendimmarrës.
Po ashtu edhe mbrojtësi të akuzuarit Thaqi, avokati Ymer Beka tha se nga provat që janë propozuar të administrohen nuk japin bindjen se klienti i tij ka kryer veprën penale për çka ngarkohet, duke shtuar se Thaqi si ish-zëvendësiministër nuk ka pas kompetenca vendimmarrëse.
Seanca vijoi me mbrojtësin e të akuzuarit Kafexhollit, avokatin, Arbër Shala, i cili tha se përmes provave që janë propozuar për administrim vërtetojnë pafajësinë e klientit të tij.
Dhe krejt në fund, mbrojtësi i të akuzuarit Rrahmanit, avokati, Bekim Kryeziu tha se të gjitha transaksionet lidhur me klientin e tij janë bërë pas datës së privatizimit dhe se ato janë bërë përmes transaksioneve bankare tërësisht në mënyrë të ligjshme.
Ndryshe, Prokuroria Speciale e Republikës së Kosovës (PSRK) më 1 korrik 2021, ka ngritur aktakuzë ndaj të akuzuarve Ragip Begaj, Hajdin Berisha, Bashkim Krasniqi, Malë Krasniqi, Bajram Hasani, Faton Thaqi, Nazmi Kafexholli dhe Ahmet Rrahmanaj.
Sipas aktakuzës, Ragip Begaj, Hajdin Berisha, Bashkim Krasniqi, Malë Krasniqi, Bajram Hasani, Nazmi Kafexholli dhe Faton Thaqi, akuzohen se kanë kryer veprën penale të “Keqpërdorimit të pozitës apo autoritetit zyrtarë”.
Ahmet Rrahmanaj, akuzohet për veprën penale “Shpëlarje e parave”, ndërsa Nazmi Kafexholli akuzohet edhe për veprën penale “Mashtrim”.
Sipas aktakuzës, Begaj akuzohet se në cilësinë e kryetarit të Komunës së Malishevës, në bashkëkryerje me ministrin e atëhershëm të Tregtisë dhe Industrisë, Bajram Hasani dhe zëvendësministrin e kësaj ministrie, Faton Thaqi duke shfrytëzuar pozitën e tyre zyrtare me qëllim të përfitimit të kundërligjshëm të dobisë pasurore, kanë mundësuar shpronësimin në zonat kadastrale Banjë, Bellanicë dhe Senik, duke e shpallur zonë me interes të veçantë.
Sipas aktit akuzues, Bashkim Krasniqi në cilësinë e drejtorit për Gjeodezi dhe Kadastër, Malë Krasniqi në cilësinë e shefit të shërbimeve të Gjeodezisë, Hajdin Berisha në cilësinë e nënkryetarit të komunës dhe Faton Thaqi në cilësinë e zëvendësministrit, akuzohen se në bashkëkryerje nga periudha kohore 22 maj 2018 deri më 5 qershor 2018, varësisht nga pozitat, kanë shfrytëzuar autoritetin zyrtar, duke tejkaluar kompetencat e tyre kanë mundësuar shpalljen e zonës me interes të veçantë ekonomik me qëllim të themelimit të Zonës Ekonomike në Komunën e Malishevës, në zonat kadastrale Banjë, Bellanicë dhe Senik në mënyrë që të vazhdohej me procedurat e shpronësimit.
Tutje në aktakuzë thuhet se i akuzuari Malë Krsaniqi, pasi e kishte ditur për krijimin e Zonës Ekonomike, kishte blerë pronë në zonat kadastrale Banjë dhe Lladrovc me çmim prej 25 euro për ari, duke qenë në dijeni se këto prona do të shpronësohen nga Qeveria e Kosovës, e ku çmimi do të ishte shumë më i lartë.
Sipas aktakuzës i akuzuari Nazmi Kafexholli, akuzohet se në cilësinë e inspektorit në Agjencinë e Pyjeve të Kosovës, duke qenë në dijeni për krijimin e Zonës Ekonomike, dhe me qëllim që t’i rrit vlerën tokës, kishte marrë me qera pronën e të ndjerit M.H. ku kishte ngritur pemishte për çka kishte përfituar edhe grante nga Ministria e Bujqësisë.
Tutje, sipas aktit akuzues, Ahmet Rrahmanaj nga viti 2007 deri më 2013 në vazhdimësi duke e ditur se parcelat e tokës në pronësi shoqërore janë blerë dhe krijuar me aktivitete kriminale, ka transferuar dhe njëkohësisht ka tentuar të transferojë pronat me qëllim të fshehjes apo maskimit të natyrës dhe shmangies nga pasojat juridike.
Në aktin akuzues thuhet se Rrahmanaj, ka privatizuar pronat e “Neëco Mirusha” tokë bujqësore në zonat kadastrale Banjë, Bellanicë dhe Senik në Komunën e Malishevës me çmim artificialisht të ulët 1,222,333.00 euro sipërfaqe prej 1,157 hektarë e 51 ari për 99 vite, për këtë i akuzuari më 11 korrik 2013 ka bërë bartjen e tokës në emër të personit tani të ndjerë M.H. si përfitues i tokës në sipërfaqe prej 203 hektar e 11 ari, ku për këtë transaksion, të akuzuarit i ishin transferuar 200 mijë euro në llogari bankare, mirëpo të njëjtat ia kishte kthyer të ndjerit M.H. dhe gjithë kjo ishte bërë me qëllim të kinse shitblerjes që kishte ndodhur në vitin 2007./Media Ndërtimi