Ekipi i emisionit “Kallxo Përnime” ka vizituar zyrat e ish-“ENK Invest Group SH.A” që sot quhet “Prishtina City Center”, për ta marrë komentin e tyre ne lidhje me pretendimet e dy biznesmenëve Naim Berisha dhe Azem Salihu të kanë paguar një shumë të madhe të mjeteve në xhirollogarinë e kompanisë ndërtuese të objektit shumëkatësh në Prishtinë, por aksionarët e rinj të kompanisë nuk po pranojnë t’ia japin lokalet sipas metrave katrorë që Berisha ka paguar.
Një përgjigje me shkrim e kishte kthyer drejtori Isuf Haxhiu, i cili nuk i mohon pagesat por pretendon se nuk ka lokale për dy biznesmenët.
“Lidhur me pretendimet e Paditësve, ne jemi deklaruar pranë gjykatës dhe për te ruajtur sekretin e gjykimit, nëse ju e vlerësoni mund t’i drejtoheni Gjykatës me kërkesë për marrjen e informacionit zyrtar ndër të cilat do mund të gjeni edhe deklarimet e PCC përpara Gjykatës rreth pretendimeve te paditëseve. Ne momentin e nënshkrimit te kontratës, ENK nuk ka qenë e pajisur me leje ndërtimore.
Për ketë arsye Kontrata ka qenë e lidhur me kusht qe ENK të pajiset me leje ndërtimi dhe të kryente punimet deri me date 07.09.2013.
Lidhur me këtë paditësit kanë qenë në dijeni dhe çmimin e volitshëm që e kanë marrë ka qenë i ndërlidhur me marrjen e lejes së ndërtimit. Deri me 07.09.2013 nuk është dhëne leja e ndërtimit pa faj të PCC, dhe nga Komuna leja e ndërtimit për Qendrën Tregtare është lëshuar nga Komuna Prishtinë vetëm në Janar 2018 kështu që kushti i kontratës nuk është përmbushur.
Proceset gjyqësore për të cilat ende nuk ka vendim të formës së prerë, janë mosmarrëveshje të natyrës private në mes të dy subjekteve dhe nuk është çështje me interes publik. Sipas ligjeve në Kosovë kontratat private dhe mosmarrëveshjet që lindin nga to mund te gjykohen vetëm nga Gjykatat dhe jo nga opinioni publik.
Në besojmë që nuk ka ndonjë interes publik për te ditur sesi i përmbush një palë ose një tjetër detyrimet kontraktore, prandaj involvimi i publikut në këtë çështje është tërësisht e pazakontë dhe në gjykimin tonë nuk ka asnjë shpjegim tjetër përveç se paditësit kërkojnë të përdorin median për ndikim në procesin gjyqësor”, thuhet në përgjigjen e drejtori të PCC, Isuf Haxhiu, për emisionin ‘Kallxo Përnime’.
Sipas emisionit ‘Kallxo Përnime”, Naim Berisha ka paguar shumën e mjeteve prej 652 mijë euro në xhirollogarinë e kompanisë ndërtuese por aksionarët e rinj të kompanisë nuk po pranojnë t’ia japin lokalet sipas metrave katrorë që Berisha ka paguar.
Problemin e njëjtë me Berishën e ka edhe një biznesmen tjetër, Azem Salihu, i cili ka paguar 135 mijë euro por edhe ky nuk po mund ta marrë lokalin pasi kompania ndërtuese po refuzon t’ia japë në posedim edhe këtij lokalin.
Berisha ka treguar për emisionin “Kallxo Përnime” se në vitin 2009 ka paguar mjetet dhe sipas kontratës në vitin 2014 do duhej të merrte në posedim lokalet./Media Ndërtim.