Një parecelë nuk është kthyer në gjendjen e mëparshme sipas vendimit nga Agjencia Kadastrale e Kosovës. Dyshohet se dikush nga Kadastri i Komuna e Prishtinës ka ndërhyrë kundërligjëm. Komuna e Prishtinës dhe Agjencia Kadastrale e Kosovës duhet të japin sqarim e Prokuroria ta hetojnë këtë rast.

Një vështrim i kujdesshëm i gjendjes kadastrale në disa muaj kohështrirje, nxjerr një pah një varg parregullsish dhe manipulimesh me pronën publike komunale në Lakrishtë.

Në Gjeoportalin Shtetëror që mundëson qasje online në gjendjen kadastrale, kam përcjellë dhe fotografuar prej muajsh ndryshimet që janë bërë kundërligjëm në kuadër të tentativës së Ndërmarrjes Publike Banesore dhe ish-qeverisjes Komunale të Prishtinës për të realizuar projektin e dyshimtë 120 milionësh afaristo-banesor, i cili është shoqëruar me dhjetëra pretendime të bazuara për shkelje ligjore që kulmuan me skandalin mjedisor të shkatërrimit të azbestit, që u konstatua nga një laborator i pavarur gjerman se i përket shkallës së tretë (nga 1-5) me rrezikshmëri të lartë kancerogjene.

FOTO 1, e skanuar më 08 nëntor 2021, dëshmon sesi Drejtoria e Kadastrit e udhëhequr nga ish drejtoresha, Valbona Osmani Mehmetaj në kohën ish qeverisjes komunale të Shpend Ahmetit kishte ndryshuar gjendjen kadastrale në pronën publike që është në emër të Ndërmarrjes Publike Banesore në Lakrishtë.

Përvec përcaktimit të paligjshëm të kufirit mes parcelës së NPB-së të regjistruar si N.SH. BVI për Banim ( Sipërfaqja me ngjyrë të verdhë) dhe të parcelës N.SH. Industria e Naftës  të menaxhuar nga AKP-ja, (sipërfaqja me ngjyrë të kaltër), nga parcela e përgjithshme e NPB-së ishin ndarë 10 parcela të tjera me numra të rinj. (10392-1, 10392-2, 10392-3, 10392-4, 10392-5, 10392-6, 10392-7, 10392-8, 10392-9,10392-10).

Siç shihet në FOTO 1, pacelat e identifikuara me shigjeta të kuqe, është shumë e çuditshme sesi kishte arritur të zyrtarizohej kjo ndarje mini-parcelash. Me çfarë vendimi e qëllimi, me forma të tilla të çrregullta nëndarjesh.

Ndryshimet ishin bërë në bazë të matjeve nga një teknik me shkollim të mesëm i kontraktuar nga Ndërmarrja Publike Banesore, i cili kishte kryer punën e gjeodetit të licensuar në kundërshtim me legjislacionin në fuqi përderisa lënda ishte miratuar dhe zyrtarizuar nga Komuna e Prishtinës pa pëlqimin e AKP-së.

Për miratimin e vendimit nga Komuna pa pëlqimin e AKP-së banorët e Lakrishtës e kishin njoftuar ministrin e mjedisit, Liburn Aliu i cili më pas i kishte kërkuar nga Agjencia Kadastrale e cila mbikëqyrë punën e zyrave komunale kadastrale, t`i hetonte këto pretendime.

Shkeljet janë vërtetuar dhe Drejtoria e Kadastrit e Prishtinës, në fund të qeverisjes së Shpend A. Ahmeti ishte detyruar ta anulonte vendimin që kishte nxjerr vetë dhe ta kthente gjendjen e mëparshme kadastrale, ndonëse për këtë çështje zyrtarët komunalë kanë qënë totalisht të mbyllur në komunikim me publikun.

Por, ajo që bie në sy dhe që paraqet skandalin e radhës është se gjendja kadastrale nuk ishte kthyer si ka qenë më parë.

Sipas FOTO  2, që paraqet gjendjen e skanuar më 24 nëntor 2021, në fund të ish qeverisjes komunale shihet se dikush nga zyrtarët përgjegjës të Kadastrit Komunal të Prishtinës ka ndërhyrë në një parcelë.

(Shih hapësirën e rrethuar në foton 1 dhe krahaso me foton 2)

Ky ndryshim dyshohet se është bërë kundërligjëm dhe pa vendim. Komuna e Prishtinës dhe Agjencia Kadastrale e Kosovës duhet të japin sqarim dhe ta hetojnë këtë rast.

Kjo gjendje vazhdon të jetë e njëjtë edhe sipas gjendjes së skanuar sot, më 19 janar 2022. FOTO 3

Kujtojmë se së fundmi një tentativë e re për përcaktimin e kufirit problematik mes dy parcelave N.SH. BVI për Banim  dhe të parcelës N.SH. Industria e Naftës u iniciua nga Ndërmarrja Publike Banesore dhe u tentua të shtyhej përpara  me ndihmën e shefit të AKP-së, Avni J. Jashari përkundër hetimit të lëndës nga Prokururia Speciale. Por, pasi kjo çështje u bë publike propozimi u anulua pasi ishte miratuar në parim në AKP.    FOTO 4

P.S. Ndërhyrjet me ngjyrat, shigjetat e kuqe dhe rrathët janë bërë me qëllim të sqarimit.

*Artikull i shkruar nga gazetari Arsim Halili./Media Ndërtimi.