Një hulumtim që tregon për favorizime partiake dhe familjare gjatë një procesi të tenderimit duke u bërë shkelje ligjore në vlerë prej 400 mijë eurove, është përzgjedhur të jetë fituese në ndarjen e çmimeve nga Lëvizja FOL.
“Tenderi i dyshimtë për familjen e ministrit” është titulli i shkrimit të gazetares Doruntina Kastrati që u zgjedh si më e mira në tre çmimet të cilat kanë trajtuar prokurimin publik në Kosovë gjatë vitit të kaluar .
Hulumtimi tregon se si Komuna e Malishevës, e cila qeveriste nga Nisma Socialdemokrate, ia ka dhënë tenderin për ndërtimin e një shkolle në këtë komunë, kompanisë së vëllait të ish-ministrit të Tregtisë dhe Industrisë, Vesel Krasniqi.
Ish-ministri Krasniqi ishte pjesë e stafit të kompanisë që ka ofertuar për tender dhe në të kaluarën edhe shef i Urbanizimit në Komunën e Malishevës.
“Gjatë këtij hulumtimi kemi gjet edhe shkelje tjerra ligjore”, thotë për Ndertimi Media, gazetarja Doruntina Kastrati. “Rezistenca e institucioneve e përgjegjëse në Komunën e Malishevës për të kthyer përgjigje kanë qenë pengesat kryesore të këtij hulumtimi. Kemi udhëtuar shpesh herë nga Prishtina për në Malishevë për të intervistuar palët, mirëpo dyert kanë qenë të mbyllura për sqarime. ”, thotë Kastrati.
Kompania që është zgjedhur fituese, në dosjen e tenderit e ka dorëzuar diplomën e shefit të urbanizimit të Komunës si punëtor të tyre.
“Këtë hulumtim kam nis ta realizoj në gjysmën e vitit 2020. Rasti është ende në prokurim”, shtoi ajo.
“Dallavere për hava” i gazetarit Besnik Krasniqi dhe “Komuna e Gazmend Muhaxherit kurdis tenderin për familjarët e Ramiz Kelmendit”, me autorë Valon Fana dhe Vyrtyte Gërvalla janë dy hulumtimet tjera që janë shpërblyer me çmime nga juria në përbërje: Diana Metushi Krasniqi KDI, Isuf Zena ekspert i prokurimit dhe gazetari hulumtues Besnik Boletini.
Drejtuesit e Lëvizjes FOL që për herë të parë ka ndarë për tre shkrimet më të mira të cilat kanë trajtuar temat e prokurimit publik në Kosovë gjatë vitit 2020, kanë inkurajuar gazetarët të vazhdojnë hulumtimet në prokurim publik./Ndertimi Media.
You must be logged in to post a comment Login