Megjithëse nga jashtë ndërtesa ruan pamje hijerëndë me fasadën e verdhë të ngrënë nga koha, brenda saj mbretërojnë heshtja e zbrazëtia. Kjo monotoni është thyer të enjten, kur zyrtarë të Komunës së Prishtinës dhe artistë kanë vizituar hapësirat e ish-bibliotekës “Hivzi Sulejmani”, në lagjen “Tophane” të kryeqytetit.
Drejtoresha për Kulturë, Blerta Basholli, ka thënë se Komuna e Prishtinës është duke hartuar detyrën projektuese për ruajtjen, restaurimin dhe adaptimin e ndërtesës së ish-bibliotekës.
Sipas saj, artistët Jakup Ferri, Driton Selmani dhe Alban Muja janë ftuar në një diskutim për gjetjen e mënyrës më të mirë për shfrytëzimin e kësaj ndërtese, transmeton KOHA.
“Në fund të fundit për artistët po bëhen këto hapësira dhe kontributi i tyre në proces është i domosdoshëm. Natyrisht edhe diskutimi me qytetarë, artistë e organizata nuk do të mungojë, sepse është me rëndësi këndvështrimi i të gjithëve”, ka thënë Basholli në një postim, në profilin e saj, në “Facebook”.
Në diskutimin për “menaxhimin efektiv të institucionit”, sipas Bashollit, është përmendur edhe shfrytëzimi i kësaj hapësire për galeri të qytetit, studio për artistë vendas, rezidenca për artistë të huaj dhe hapësira për diskutime të ndryshme.
“Të pranishëm në diskutim ishin edhe zyrtarja Lindita Cervadiku-Dibra, e cila është duke hartuar detyrën projektuese në bashkëpunim me arkitektin Nol Binakaj, asamblisti Adrian Berisha dhe zyrtarja për Kulturë, Arjona Caraku, të cilët do të jenë pjesë e projektit deri në përfundim”, ka shkruar Basholli.
Artisti vizual dhe regjisori, Alban Muja, ka thënë se në këtë diskutim janë dhënë ide se si kjo ndërtesë mund të kthehet në hapësirë të artistëve. Ka thënë se ky investim do të ishte në dobinë e artistëve në një qytet si Prishtina, që ka pak hapësira të tilla.
“Rezidencat për artistë apo edhe vetëm studiot për artistë lokalë luajnë rol të rëndësishëm në etablimin e artistëve të rinj”, ka thënë Muja, i cili në të kaluarën kishte pasur përvoja me rezidenca artistike. “Besoj se është investim i mirë nga ana e Komunës si për artistët lokalë, ashtu edhe për ata që ftohen në rezidencë”.
Në të vërtetë, Komuna e Prishtinës fillimisht e kishte menduar që këtë ndërtesë ta shndërronte në muzeun “Ibrahim Kodra”.
Me marrëveshjen e lidhur me fondacionin “Ibrahim Kodra”, në qershor të vitit 2018, ishte paraparë që kryeqyteti të kishte një muze me veprat e maestros me nam botëror.
You must be logged in to post a comment Login