Nënkryetari i Komunës së Podujevës, Nexhmi Rudari, ka kërkuar nga drejtorët komunalë që t’i nisin procedurat e prokurimit për projektet e parapara për sivjet.

Në takimin e Bordit të drejtorëve, Rudari ka thënë se pasi Komisioni Rregullativ i Prokurimit Publik të Kosovës ka lejuar hapjen e ofertave, shërbimi i prokurimit duhet të vazhdojë zhvillimin e procedurave.

Në njoftimin për media thuhet se Nexhmi Rudari, i cili e ushtron edhe detyrën e kryetarit, ka thënë se për shkak të vonesave si pasojë e pandemisë, tash duhet të ketë dinamikë më të shtuar për realizimin e projekteve të parapara.

“Në mbledhjen e Këshillit të Drejtorëve të Komunës së Podujevës, të cilën e udhëhoqi nënkryetari Nexhmi Rudari, u diskutua lidhur me zhvillimin e procedurave të tenderimit dhe dinamikën e procedurave për projektet kapitale. Në takim u tha se tash pasi Komisioni Rregullativ i Prokurimit Publik të Kosovës ka lejuar hapjen e ofertave, shërbimi i prokurimit të vzhdojë me zhvillimin e procedurave për projekte të ndryshme. Drejtorët e drejtorive raportuan lidhur me projektet e planifikuara për realizim gjatë këtij viti buxhetor”, thuhet në njoftimin për media të Zyrës për informim.

Bëhet e ditur se nënkryetari Rudi ka kërkuar përshpejtim të procedurave.

“Meqenëse situata e krijuar nga shpallja gjendjes së emergjencës shëndetësore dhe marrjes së masave të tjera kufizuese nga Qeveria, si pasojë pandemisë COVID-19, nënkryetari Rudari kërkoi nga drejtorët përshpejtim të dinamikës për inicimin e procedurave në harmoni me Ligjin e Prokurimit Publik për realizimin e projekteve të planifikuara”, thuhet tutje në njoftim.

KOHA ka raportuar në muajin prill se shumë projekte të parapara për sivjet rrezikojnë të mos realizohen dhe rrjedhimisht nuk do të mund të shpenzohet buxheti i paraparë për to. Deri më tash asnjë projekt i paraparë për sivjet nuk ka filluar në Komunën e Podujevës. Ndërkohë, kishte pasur ndërprerje të punimeve edhe në ato projekte që kishin nisur vitin e kaluar. Një shqetësim të tillë e kishin ngritur edhe zyrtarët opozitarë në këtë komunë. Kryetari i Qendrës së Lëvizjes Vetëvendosje, Bajram Ajeti, ka thënë se përveç pandemisë pasojë e dështimit të projekteve është edhe keqmenaxhimi dhe keqeverisja nga ekzekutivi komunal. Sipas tij, edhe në të kaluarën janë treguar dobësi të tilla dhe se tash në këtë kohë të vështirë për tërë vendin, rreziqet janë edhe më të mëdha. Edhe këshilltari komunal nga radhët e PDK-së, Rafet Llapashtica, ka theksuar se pret vonesa të realizimit të projekteve dhe suficit buxhetor. Sipas tij, qytetarët do të përballen me problemet me të cilat janë përballur edhe deri më sot.

Në anën tjetër, edhe nënkryetari Nexhmi Rudari, kishte thënë se nëse kjo pandemi do të zgjasë edhe në qershor apo në fillim të korrikut rrezikojnë të të mos mund t’i shpenzojnë mjetet për projekte kapitale dhe në kët rast suficiti buxhetor do të ishte i pashmangshëm.

Në mbledhjen e Bordit të drejtorëve të Komunës është trajtuar edhe çështja e dëgjimeve publike për Qarkoren Buxhetore 2021 dhe Kornizën Afatmesme Buxhetore 2021-2023.
“Për shkak të masave të kufizimit të lëvizjes dhe shmangies së grumbullimit të qytetarëve, si pasojë e pandemisë, në takim u bisedua edhe për mundësinë e organizimit përmes platformës online të dëgjimeve publike për Qarkoren Buxhetore për vitin 2021 dhe Kornizën Afatmesme Buxhetore 2021/23, thuhet në njoftim.