Hashtagët me temë karantine kanë shënuar rritje në rrjete sociale, sepse pothuajse e gjithë bota po kalon në trajtim të njëjtë. Një kërkim i thjeshtë me # të dërgon në shaka të ndryshme, video me një këngë “Bored in the house” (shq. “I bërë bajat në shtëpi”), dikush duke përformuar në një instrument muzikor e disa edhe duke pikturuar.

Reportazh nga Uran Haxha

Në grupin e këtyrë të fundit mund të të kapin sytë gjithëfarë lloj pikturash. Por, piktura po i kthen në gjirin e saj shumë të apasionuar që koha nuk i lejonte të kishin pikturën impenjimin e tyre kryesor të ditës. E gjitha kjo duke iu falenderuar karantinës, që erdhi si rezultat i pandemisë COVID-19.

Këtë fat pati edhe arkitektja pejane Teuta Kelmendi. Kush e ka pasë rastin që ta vezhgat gishtin mbi ‘touch screen’ për të lëvizur në rrjetet sociale të saj, e di se arkitektja ia ka dorën bukur shumë vizatimit. Një kolanë të tërë me skica të ndejës së përditshme prishtinase, ajo i ka vizatuar e ngjyrosur. Si rezultat, do të ketë edhe një libër me këto skica si fituese e konkursit ndërkombëtar “The Book Contest”, në nëntor të 2019-s.

Por, të kthehmi tek karantina e arkitektës së gjatë e plot stil nga Peja, që ritmi i tanishëm i jetës i dha kohën që mes rreshtash edhe gjatë ditëve jashtë-karantinore e ka dashur.

“Për mua kjo kohë ishte shumë e përshtatshme që t’i përkushtohem më shumë pasionit tim për pikturën, vizatimin e skicimin – gjë që në të kalurën e kam bërë vetëm në kohën e lirë”, tregon ajo, në një bisedë virtuale.

Mirëpo, zgjedhja e saj është mjaft e veçantë. Pikturon skena filmi. Nëse ke parë “The Fall” rasisht në ecjen tuaj nëpër kanale filmash, Teuta zgjedhi ta ketë gjithmonë një skenë të këtij filmi në mur.

“Duke e marrë parasysh që në këtë kohë të qendrimit të vazhdueshëm në shtëpi, angazhimet janë të pakta dhe ne thjeshtë qendrojmë më gjatë para televizionit, unë vendosa që të rishikoj disa filma dhe seriale që në ndonjë periudhë të jetës time ishin frymëzues. Nga kjo lindi edhe ideja e skicimit të skenave të cilat vendosa t’i ndaj me të tjerët, me shpresën që edhe të tjerët do të gjejnë frymëzimin dhe pozitivitetin, që nga njëherë po na mungon në këtë kohë kaq sfiduese”, na thotë Kelmendi.

Megjithatë, talenti i saj i ka dhënë ekskluzivitetin që të përzgjedh filmat dhe skenat, që ne mund t’i shijojmë veç të vendosura në pëlhurë.

“Nga njëherë është thjesht skenari të cilin e pëlqej shumë, nganjëherë është edhe mënyra se si regjisori e manifeston me ngjyra dhe detaje të gjithë filmin. Thjeshtë janë skena që mua për ndonjë arsye më kanë lënë mbresë dhe më janë dukur të veçanta për t’u skicuar”, rrëfen ajo, teksa tregon për filmat, kuadrat e të cilëve tashmë janë pikturuar, “Deri më tani skenat e pikturuara janë nga filmat “The Fall”, “The Grand Budapest Hotel”, “Sleepless in Seattle”, “La Vita e Bella” si dhe “Erin Brockovich”. Këta janë nga kinematografia Hollywood-iane por në listën e gjatë që dua t’I skicoj janë edhe disa filma shqiptar të cilët ishin filma të preferuar të prindërve të mi”.

Arkitektura nuk e lë që Teuta t’i ikë nga dora. Edhe piktura e saj ndikohet mjaft nga arkitektura, për të mos thënë që është baza. Detajet, vijat, mënyra e të menduarit nga arkitektura e mbajnë fort afër.

“Arkitektura për mua është insipirimi kryesor që më bëri të jem më konstruktive dhe më mësoi disiplinën për shumë sfera të jetës. Para se të studioja arkitekturën, artin dhe pikturën e shikoja me një sy më amator dhe jo aq kritik. Mund të them me plot kuptimin e fjalës që piktura ime ndikohet nga arkitektura duke filluar nga idetë fillestare e deri te detajet më të vogla që janë te dukshme në të gjitha punimet e mia”.

Koha e saj tashmë mbushet përveç pikturave që mund t’i shihni në YUGEN – by teutakelmendi, edhe me librat që ishin në listën e librave “për t’u lexuar”, mësimi online dhe projektet ku ajo është e angazhuar, siç është Autostrada Biennale.

“Ndërkohë vazhdoj të jem e angazhuar me projekte të vazhdueshme që kam me Autostrada Biennale, të cilët gjatë vitit të kaluar kanë bërë një punë të jashtëzakonshme, përfshirë mbrojtjen dhe vetëdijesimin mbi trashëgiminë kulturore. Kështu mu dha mundësia të kontriboj me punën time në vetëdijësimin e fëmijëve mbi vlerat e trashëgiminë kulturore për mes skicave dhe ligjeratave, diçka që rezultoi të jetë shumë e pëlqyer nē qytetin e Prizrenit, dhe që e vazhduam edhe në Prishtinë”, thotë Teuta për fund të kësaj bisede, që në kushte tjera ndoshta do të ishtë më e detajuar nga biseda direkte.

Por, projektet e saj lëjnë të kuptohet se tekste tjera do të shkruhen për punët që do të bëjë.

Biografi e shkurtër e Teuta Kelmendit

Teuta Kelmendi është e lindur në Pejë, ku kaloi fëmijërinë e rrethuar me libra, muzikë e filma nga kultura të ndryshme, gjë që e bëri atë të influencohej nga arti botëror. Teuta u zhvendos me banim në Prishtinë në moshën 18 vjeçare ku edhe filloi studimet e Arkitekturës.

Gjatë studimeve, Teuta themeloi dhe organizoj takimet ne Meetings of Design Students (MEDS) – Kosova gjatë viteve 2010- 2014 (MEDS është platformë e shkëmbimit të njohurive për studentë të arkitekturës e dizajnit nga mbarë bota, të cilët ndjekin çdo vit shkollë verore në vendet e ndryshme të botës). Që nga koha e studimeve, Teuta u angazhua profesionalisht në fushat e dizajnit të brendshëm, mbrojtjes së trashëgimisë kulturore në projekte të ndryshme të fokusuara në qytetin e Prishtinës.

Teuta është në përfundim të studimeve Master në Fakultetin e Arkitekturës në Universitetin e Prishtinës. Ajo tani po punon si arkitekte freelance dhe poashtu ndjek pasionin e saj për pikturën dhe trashegiminë kulturore.

Në vitin 2011 dhe 2019 ishte pjesë e ekspozites globale See.Me në të dy edicionet e të cilit punimet e Teutes u ekspozuan në platform digjitale në Times Square në New York, SHBA. Në nëntor të vitit 2019, në një konkurs ndërkombëtar, ajo fitoi çmimin The Book Contest, që i mundësoi të botojë librin me 30 skica të bëra për 30 ditë radhazi – skica këto të shkoqitura nga përditshmëria e saj në Prishtinë.