Qeveria e Kosovës ka anuluar vendimin e qeverisë së kaluar për ndërtimin e dy kyçjeve dhe një mbikalimi në Autostradën “Arbën Xhaferi”, me vlerë rreth 50 milionë euro, raporton Ndërtimi.info.
Ministri i Infrastrukturës dhe Ambientit, Lumir Abdixhiku në mbledhjen e qeverisë, tha se vendimi i qeverisë së kaluar e obligon diskutimin për marrëveshje me “Bechtel & Enka”-n.
“Sipas këtij vendimi përveç që zgjatet afati i përfundimit të autostradës ‘Arbën Xhaferi’ e obligon ministrinë të diskutojë me ‘Bechtel & Enka’ për dy kyçje dhe një mbikalim. Bëhet fjalë për punë të reja”, tha ai.
Abdixhiku tha se “Bechtel & Enka” kërkon nga ministria 1.18 milionë euro në muaj.
Pasi që Abdixhiku propozoi shfuqizimin e këtij vendimi, ai u përkrah nga kryeministri Albin Kurti.
“Vendimi yt personal që e paraqite për opsionin e dytë, është edhe mendimi im. Ne duhet ta ndalim këtë gjakderdhje financiare”, tha kryeministri Kurti.
Vendimi ishte marrë për ndërtimin e kyçje së Ferizajt dhe Vitisë në autostradë si dhe ndërtimin e një mbikalimi.
Pas shfyqizimit të vendimit të qeverisë së kaluar, ministri Lumir Abdixhiku ka thwnw se ky vendimi ishte i paprecedentw.
“Në maj të vitit të shkuar, Qeveria e kaluar, kishte marrë vendim – të paprecedentë – t’i zgjasë afat dhe t’i shtojë punë në mënyrë arbitrare konsorciumit ‘Bechtel & Enka’. Pa tender, pa konkurrencë, pa ofertë – thjeshtë me një vendim. Konsorciumi ndërsa, i kishte kërkuar Kosovës plot 49.6 milionë euro shtesë për tri punë shtesë”, ka shkruar ai nw Facebook.
Sipas tij, ka kaluar koha kur Kosova ka dhwnw miliona euro pa bazw.
“Koha kur Kosova jep miliona pa bazë – 49.6 milionë euro më saktësisht – është e shkuar. Ministria e Infrastrukturës dhe Ambientit ka ngritur këtë çështje urgjente në Qeveri. Qeveria ndërsa, sot, me të gjitha votat për e asnjë kundër, anuloj vendimin për këtë angazhim. Nga koha e vendimit të shkuar e deri më sot mund të jenë shkaktuar dëme financiare të cilat do t’i trajtojmë si shtet me ligj e dinjitet. Bechtel-Enken, ndërsa, e falenderojmë për punët e bëra deri më tani. Rrugëtimi ynë me dy autostradat e deritanishme përfundon sot. Për çdo angazhim tjetër në të ardhmen janë të mirëseardhur të konkurojnë – barabartë me secilën palë tjetër”, ka shtuar ai.
You must be logged in to post a comment Login