Analiza e kontratave publike gjatë vitit 2022 tregon se bizneset e grave mbeten të nënpërfaqësuara në fushën e prokurimit publik në Kosovë. Ndonëse Ligji për barazi gjinore obligon të gjitha institucionet publike përfshirë ministritë, komunat dhe çdo autoritet tjetër kontraktues të përfshijë pikëpamjen gjinore në veprimtarinë e tyre, zbatimi i këtij ligji stagnon në procedurat e prokurimit publik.
Hendeku gjinor në prokurim është dukshëm i pranishëm tek institucionet e nivelit qendror dhe lokal. Në nivelin qendror të qeverisjes, operatorët ekonomikë në pronësi të burrave kanë përfituar 79% të vlerës së kontratave në krahasim me operatorët ekonomikë në pronësi të grave të cilat kanë përfituar vetëm 4% të vlerës së kontratave, shkruan në raportin “Prokurimi publik në Kosovë dhe fuqizimi ekonomik gjithëpërfshirës” të publikuar nga Instituti GAP.
Ngjashëm, edhe në nivelin lokal të qeverisjes, operatorët ekonomikë në pronësi të burrave kanë përfituar rreth 79% të vlerës së kontratave në krahasim me operatorët ekonomikë në pronësi të grave të cilat kanë përfituar 5% të kontratave.
Bizneset e grave mbeten të nënpërfaqësuara në fushën e prokurimit publik në Kosovë.
🔘Nga 9,673 kontrata të prokurimit publik (2022), bizneset në pronësi të burrave kanë përfituar 81.1% të kontratave, ndërsa ato në pronësi të grave kanë përfituar 10.3% të kontratave.
🔘Nga gjithsej 514.5 milionë euro, bizneset në pronësi të burrave kanë përfituar 405 milionë euro (78.7%), ato në pronësi të grave kanë përfituar 25.4 milionë euro (4.9%).
Duke u bazuar në gjetjet e kësaj analize, Instituti GAP rekomandon: • Të integrohen kritere dhe specifikime të ndjeshme gjinore në proceset e prokurimit publik. Kjo mund të përfshijë vlerësimin e ofertuesve bazuar në angazhimin e tyre për barazinë gjinore, si p.sh. politika për fuqizimin e grave, trajtimi i drejtë i punonjëseve gra dhe ofrimi i mundësive për bizneset në pronësi të grave.
Kjo qasje siguron që aspekti gjinor të përfshihet në vlerësimin e ofertave.
- Të caktohen objektiva dhe/ose kuota për pjesëmarrjen e bizneseve në pronësi të grave në proceset e prokurimit përkitazi me Ligjin për barazi gjinore, saktësisht neni 6, masat e veçanta21.
- Të bëhet mbledhja sistematike e të dhënave të ndara sipas gjinisë për të gjurmuar pjesëmarrjen e bizneseve në pronësi të grave, punonjëseve gra brenda organizatave ofertuese dhe ndikimin e vendimeve të prokurimit në barazinë gjinore.
Këto të dhëna do të ndihmojnë në identifikimin e hendeqeve dhe monitorimin e progresit, duke lehtësuar politikëbërjen.
▶Për më shumë detaje raportin mund ta gjeni këtu 👉https://bit.ly/46zeLza