Tre persona përfunduan në pranga për trafikim të veprave të artit, ku njëri prej tyre i vidhte dhe dy të tjerë siguronin klientët për t’i shituar. Ato merreshin nga parku i Apolonisë dhe shiteshin për 18-25 mijë euro secila.

Pas një hetimi disa javor të këtyre trafikantëve nga Policia e Durrësit, u bë i mundur arrestimi në flagrancë i tyre ditën e djeshme në zonën e Currilave.

Sot janë zbardhur detaje të reja nga policia në lidhje me operacionin e koduar “Antikat”, ku u vunë në pranga 49-vjeçari Altin Veizaj, banues në Fier, si dhe Alban Vrapi, 37 vjeç e Roland Zaimaj, 48 vjeç, të dy banues në Tiranë.

Po si bëhej trafikimi i veprave të artit? 49-vjeçari Altin Veizaj, nga Fieri u arrestua në flagrancë në zonën e Currilave, duke drejtuar automjetin tip “Toyota”, ku u gjetën veprat e artit, një statujë antike dhe një vazo amfora. Sipas policisë, Veizaj siguronte veprat e artit nga Parku Arkeologjik i Apolonisë, ndërsa dy shtetasit e tjerë, Alban Vrapi dhe Roland Zaimaj siguronin dhe gjenin klientelën për shitjen e tyre.

Veprat e artit të sekuestruara gjatë operacionit i përkasin periudhës së antikitetit, pjesë e trashëgimisë kulturore dhe do shiteshin kundrejt shumës 18 deri në 25 mijë euro secila.

Ditën e djeshme Report Tv siguroi në mënyrë ekskluzive foton e statujës dhe vazos amfora, që ishin vjedhur në parkun monumental të Apolonisë në Fier. Të dyja këto vepra antike do të trafikoheshin në drejtim të Italisë, ku koleksionistë të ndryshëm janë të gatshëm për të paguar mijëra euro, për të pasur në koleksionin e tyre vepra arti dhe me vlerë të lartë monumentale, të epokën antike/Shqiptarja..