Në këtë kontest të njohjes së rrethanave dhe fisnikërisë së njerëzve, Ismail Arsllani shpalon vlerat dhe angazhimet e qytetarisë, të relikteve autoktone, ose dukurive të tjera tipike shoqërore që kanë mbetur si organizëm i fuqishëm dhe i trashëguar nga e kaluara historike

Një prurje e re në prozën shqipe, dhe stil të veçantë, vjen këtyre ditëve nga publicisti, romansieri dhe gazetari i mirënjohur tetovar, Ismail Arsllani, me titull “Gurë mbi Kala”. Autori ngrihet si një figurë krijuese në letërsinë e sotme bashkëkohore me vlera të mirëfillta dhe shpalos ngjarje reale të së kaluarës historike në këtë trevë të kasabasë së dikurshme te këmbët e Sharrit plak, i cili ruan kujtimet e asaj kohe përmes relikteve, të cilat edhe sot e kësaj dite i shohim syhapur te Kalaja mbi vetull të Tetovës, te rrjedha e lumit Shkumbin, te vreshtat me rrush të zi e gjetiu.

“Gjuha dhe stili i shkrimtarit është gërshetuar përgjatë gjithë mbarështimit të romanit, me një formë të butë letrare dhe të kuptueshme për gjithsecilin lexues. Si e tillë ajo të tërheq e të bën për vete, në çdo moment, me një qartësi që e lehtëson mënyrën e të kuptuarit të ngjarjes, andaj nuk është aspak e vështirë edhe në rastet kur autori i romanit përdor edhe orientalizma të shumtë, për ta bërë më interesante ngjarjen e të folmes së asaj kohe, por edhe për t’i përdorur, aty ku ka nevojë, metaforat dhe sintagmat e shumta që me aq mjeshtri stilistikore i vë në funksion, si një mjeshtër i mirë, thotë recensenti i librit”, Zeqir Kadriu.

Në këtë kontest të njohjes së rrethanave dhe fisnikërisë së njerëzve, Ismail Arsllani shpalon vlerat dhe angazhimet e qytetarisë, të relikteve autoktone, ose dukurive të tjera tipike shoqërore që kanë mbetur si organizëm i fuqishëm dhe i trashëguar nga e kaluara historike. “Kështu duke vizatuar karakteret e personazheve, qoftë ato pozitive apo negative, autori kërkon me zgjuarsi të vendos fakte historike të një etnie ekzistuese, në përputhje me njohuritë e tij artistike e estetike të kursyera dhe të grumbulluara me vëmendje, kryesisht për një të kaluar ndikuese kulturore, me tradita e zakone të bartura edhe në kohën tonë. Duke shfaqur vazhdimisht ngjarje dhe karaktere egosh të theksuara, me mjeshtëri narrative, autori, Ismail Arsllani, harmonizon lirinë shpirtërore të tij me mentalitetin e trashëguar nëpër rrjedhat e historisë së kësaj ane”, konsideron kritiku letrar, Remzi Salihu.

Romani më i ri “Gurë mbi kala” i Ismail Arsllanit, ka në brendi një lëmsh ngjarjesh të ndërlidhura njëra me tjetrën, të cilat ndërtojnë kompozicion formal të tërësisë, në strukturën e të rrëfyerit. Kemi të bëjmë me një model merceologjik, mal njohurish me informacion të duhur dijesh, kryesisht duke i lidhur ngjarjet e shumta me tërësinë, vëren kritiku Remzi Salihu, për të shtuar se këtu kemi të bëjmë me një ngjarje që ka ndodhur në të kaluarën, e cila del në skenë nga ditari i gjetur apo i fshehur në muret e kullës, e që bie në duart e narratorit Malësor Deda. Sipas tij, kemi të bëjmë me një parafiguracion, që ngërthen në vete dokumente letrare, burime historike apo edhe ndonjë rrëfim familjar, por nuk mbetet aty pa u ndërthurur edhe elementi i figuracionit artistik të rrjedhshëm gjuhësor, që ka të bëjë me botëkuptimin dhe fiksimin e autorit për këtë gjini letrare./Media Ndërtimi.

Nga data 7 Korrik deri më 9 Shtator 2023, në Prizren, Prishtinë dhe Mitrovicë do të mbahet edicioni i katërt i Autostrada Biennale.

Ekipi i Autostrada Biennale së bashku me kuratoret dhe artistët vizituan hapësirat potenciale për ekspozim, zhvilluan takime me komunitetin dhe u njoftuan me kontekstin lokal.

Gjatë javës është organizuar edhe një program i pasur publik në Autostrada Hangar ku artistët pjesëmarrës së bashku me kuratorët nga CuratorLab zhvilluan diskutime dhe prezantime të cilat ishin të hapura për publik.

Programi u zhvillua në bashkëpunim me Universitetin Konstfack – CuratorLab Stockholm dhe me përkrahjen e Allianz Foundation.

Autostrada Biennale si Ekspozitë Ndërkombëtare e Artit Bashkëkohor mbahet çdo dy vjet që nga viti 2017./Media Ndërtimi.

Arti është forma më e mirë për të bashkuar një komb. Më shumë se 400 punime të 100 artistëve nga e gjithë Shqipëria dhe Kosova do të ekspozohen në ambientet e Expocity për pesë ditë nga data 23-27 shkurt.

Me sloganin “Me përulësi për artistët”, Expocity Albania, së bashku me Galerinë e Arteve, çelën panairin e arteve pamore “Tirana Art”.

Në dekadat e fundit ka pasur shumë përpjekje për të krijuar një event të tillë por pa sukses, por tashmë vendi ynë ka panairin e tij të përvitshëm në artet vizuale, pasi “Tirana Art” është panairi i parë i arteve pamore në Shqipëri.

Synimi i këtij panairi është të sjellë pranë publikut të gjithë përfaqësuesit e arteve vizuale që operojnë në vend, si dhe të konsolidojë traditën për vazhdimësinë e aktivitetit.

Ceremonia e hapjes nisi me një risi, me një ankand për tre vepra të artistëve të mëdhenj si Guri Madhi, Fatmir Haxhia dhe Arben Bajo. Ankandi do të mbahet në ditën e fundit të panairit ku do të shiten edhe piktura të tjera.

Gjatë fjalës së hapjes, drejtori i Galerisë së Tiranës, Abaz Hado, shprehet se ky panair është një natë historike dhe e merituar për artistët e vendit.

“Tirana, ku çdo gjë po përjetohet ndryshe dhe po perceptohet ndryshe, po krijon një ndikim të ndryshëm social në të gjitha aspektet, si dhe në art, dhe kjo sot është një ngjarje e madhe.

Ne do të vazhdojmë të luftojmë fort për të përparuar këtë vend sepse vetëm përmes artit dhe këtyre artistëve mund të shihemi, mund të konkurrojmë me Europën. Me këto nisma ia dolëm, arritëm të mbledhim këtu disa nga artistët më të mirë të vendit dhe kjo falë Expocity”.

Aulona Hoxha, drejtoresha ekzekutive e Expocity, tha se kjo ngjarje është një moment i rëndësishëm për kulturën dhe artin shqiptar, pasi artistët kanë mundësinë të shfaqin së bashku veprat e tyre për publikun e gjerë.

Ajo tha gjithashtu se do të vazhdojnë traditën e panairit të artit dhe shpreson që në edicionin e ardhshëm të ketë përfaqësues edhe nga Ballkani..

“Në këtë panair, ku kemi punime edhe nga Kosova dhe trevat e tjera shqipfolëse, shpresojmë që në edicionin e dytë të kemi përfaqësues nga rajoni, Ballkani, Europa dhe më gjerë”- u shpreh znj. Hoxha

Genc Përmeti, një nga organizatorët e eventit, shprehet se në këtë panair do r’i jepet një hapësirë e konsiderueshme artistëve të retrogardës, me gjithë kulturën dhe traditën që ata përfaqësojnë, përkrah artistëve më alternativë që janë në procesin e sfidimit të konvencioneve artistike për krijimin e një dinamike të re artistike.

Të rinjve, si nga vendi ynë ashtu edhe nga Kosova, u është ofruar një hapësirë e veçantë për të ekspozuar punimet e tyre në bashkëpunim me Universitetin e Arteve./Media Ndërtimi