Ditë më parë Ministria e Bujqësisë, Pylltarisë dhe Zhvillimit Rural ka njoftuar se janë ndarë 1 milionë euro për ndërtimin e një objekti të ri për këtë Ministri.
E në një përgjigje për Ndërtimi.Info, nga kjo Ministri thonë se ky investim pritet të hyjë në projekt buxhetin e vitit 2023.
Përpos MBPZhR-së, në objektin e ri planifikohet të akomodohen edhe dy agjenci që funksionojnë në kuadër të kësaj Ministrie.
“Ministria e Bujqësisë, Pylltarisë dhe Zhvillimit Rural ka kërkuar projekt të ri kapital me emërtimin “Ndërtimi i objektit të MBPZhR” gjatë përgatitjes së projekt-buxhetit për vitin 2023. Në kuadër të këtij projekti është planifikuar ndërtimi i objektit të MBPZhR-së në të cilin planifikohet të sistemohen zyrtarët e MBPZhR-së, përfshirë edhe ata nga dy agjencionet të cilat funksionojnë nën kuadrin e MBPZhR-së siç është Agjencia e Pyjeve të Kosovës, si dhe Agjencia për Zhvillimin e Bujqësisë.”
Për ndërtimin e këtij objekti, po punohet ngushtë me Komunën e Prishtinës, për pajisjen me dokumentet e nevojshme që i paraprijnë ndërtimit të këtj objekti.
“Aktualisht jemi në fazën fillestare të planifikimit për ndërtimin e objektit në fjalë. Ky objekt është planifikuar të ndërtohet në pronën e MBPZhR/IBK-së. Në bashkëpunim me Komunën e Prishtinës jemi duke zhvilluar procedurat për pajisjen me të gjitha dokumentet e nevojshme të cilat i paraprijnë ndërtimit të këtij objekti. Këtu nënkuptojmë edhe vendin adekuat për ndërtimin e tij, lejen e ndërtimit, si dhe të gjitha dokumentet e nevojshme për realizimin e këtij projekti. Qëllimi kryesor i këtij projekti është akomodimi i përhershëm i zyrtarëve të MBPZhR-së në objekt publik duke kursyer kështu pagesa të përvitshme të qirasë nëpër objekte private”.
Kjo Ministri është e vendosur në kompleksin “Ramiz Sadiku” në lagjen Lakrishte në Prishtinë, duke pasur kështu një kontratë me kompaninë “A2 Group” për marrjen me qira të tre kateve të këtij kompleksi, për një shumë mujore prej 28,080.00 euro.
Por kontratën e qirasë e cila skadonte me 31 gusht, kjo Ministri thonë se janë detyruar ta vazhdojnë edhe për një vit.
“MBPZhR në vazhdimësi ka drejtuar kërkesa në Ministrinë e Punëve të Brendshme për akomodimin e zyrtarëve të MBPZhR-së dhe AZhB-së në ndonjë objekt publik me qëllim të ruajtjes së parasë publike të shpenzuar në qira. Mirëpo, pasi MPB nuk kishte mundësi të siguronte hapësirë për të dyja këto institucione dhe të gjendur para një situate të tillë, MBPZhR nuk kishte mundësi tjetër, pos që të vazhdonte kontratën edhe për një vit tjetër me kompaninë “A2 Group”.
E në kontratën tre vjeçare e cila ka skaduar në fund të muajit gusht, Ministria kishte arritur marrëveshje me kompaninë “A2 Group” që të paguante 18 euro për metër katror.
“MBPZhR me dt. 01.09.2019 ka lidhur kontratë me qiramarrësin A2 Group për hapësirat e saj në objektin e ish-kompleksit “Ramiz Sadiku” i cili ndodhet në Rr.”Ukshin Hoti” në Prishtinë, e cila kontratë do të ishte e plotfuqishme deri me dt. 31.08.2022. Në kuadër të kësaj kontrate, MBPZhR-ja kishte marrë me qira sipërfaqen prej 1560m2 me çmim prej 18€ për m2 (për tri kate III, IV dhe VI) për nevoja të akomodimit të personelit të MBPZHR-së në shumën mujore prej 28,080.00€”.
Por duke mos pasur një vend akomodimi, Ministria u detyrua të vazhdojë kontratën me këtë kompani, kësaj radhe me një çmim më të lirë.
“Me dt. 21.04.2022, MBPZHR me qiradhënësin nënshkroi një Deklaratë zotimi për vazhdimin e kontratës bazë deri në shfuqizimin e kontratës bazë, duke ofruar me të njëjtin çmim sipërfaqen prej 200m2 për nevoja të Arkivimit të dokumentacionit të MBPZHR-se dhe AZHB. Gjithashtu, pa kompensim qiradhënësi ofroi 45 parkingje për parkim të automjeteve zyrtare nga 21 sa ishin në fillim. Gjithashtu, palët kontraktuese janë pajtuar që të lidhin Aneks kontratë me datën 30.08.2022 për vazhdimin e kontratës bazë edhe për një vit duke filluar nga data 01.09.2022 deri me 31.08.2023 për sipërfaqeen prej 1560m2 me çmim prej 17,50€ për m2, që nënkupton çmim më të lirë se në kontratën paraprake. Tani, MBPZHR paguan në muaj për shfrytëzimin e tri kateve III, IV dhe VI shumën e mjeteve financiare në muaj prej 27,300.00€, si dhe ka në shfrytëzim 200m2 dhe mbi 65 parkingje në nën-katet përdhesë të I dhe II të kësaj ndërtese”.
Sipas buxhetit i cili është ende draft, dhe pritet të marr dorën e fundit nga Kuvendi i Kosovës, ku veçse është miratuar në parim nga deputetet në seancën e mbajtur më datë 17 nëntor 2022, ndërtimi pritet të filloj në muajin janar të vitit 2023 dhe të përfundoj me 31 dhjetor të vitit 2024./Media Ndërtimi