Connect with us

Infrastrukturë

Kaosi i banimit në Prishtinë

Published

on

Rrugët e rrugicat kanë mbetur gati të njëjta. Dikur me gropa se nuk ishin të shtruara në asfalt, sot me gunga asfalti nga mjetet e rënda që kalojnë andej. Të shkosh aty me veturë të duket sikur je në garë nëpër rrugë malore. Teksa rrugët s’kanë ndryshuar shumë, shtëpitë tash janë zëvendësuar me banesa shumë-katëshe. Pozita e lakmueshme e “Lagjes së Muhaxherëve”, prej të cilës me pak hapa mbërrihet në qendër të qytetit, ka bërë që kjo zonë të jetë e dëshirueshme për banim, rrjedhimisht për ndërtime të larta.

“Lagjja e Muhaxherëve” është një prej shumë lagjeve, të cilat nuk identifikohen me emra rrugësh, por me mbiemra të familjeve që kanë migruar aty a me nacionalitetin e banorëve.

Historia e lagjes është e trishtë. Lagja u zhvillua nga familjet që u vendosën aty pas mposhtjes së Perandorisë Osmane në Luftën Ruso-Turke në vitin 1878. Si rezultat, Serbia fitoi pjesë të mëdha të asaj që njihet sot si Serbia jugore dhe më pas i dëboi shumicën e shqiptarëve që jetonin aty. Shumë nga ta përfunduan në Kosovë.

Sipas një historiku, që ndodhet në Planin Rregullues të kësaj lagjeje, familja e parë kishte në vitin 1878. Mbiemrat e tyre shpesh i merrnin në bazë të fshatit që kishin lënë pas në Serbi. Por, fjala arabe “muhaxhir” që në shqip i bie “migrant” apo “i dëbuar”, mbeti identiteti i lagjes tash e më shumë se një shekull më parë.

Në një terren të pjerrët, që në rrafsh nis tek rruga “Agim Ramadani” e ngjitet përpjetë deri te varri i ish-presidentit të Kosovës Ibrahim Rugova, “Lagjja e Muhaxherëve”, me karakteristikat e saj, është pjesë qendrore e kryeqytetit.

Dikur, shtëpitë renditeshin pas njëra-tjetrës, ndonjëra një-katëshe e ndonjëra dy, me strehët e tyre që ndonjëherë ishin aq afër, sa prekeshin me njëra-tjetrën e bashkë nxirrnin ujin e shiut nëpër rrugët e ngushta të lagjes. Ato rrugë, herë-herë dukej sikur të çonin diku, po shpesh ishin pa krye.

Në fillim të lagjes nga poshtë kishte kalldrëm, diku-diku sipas fqinjëve kishte beton, teksa një pjesë e madhe ishte e pashtruar. Deri vonë ashtu ishte lagjja. Një mish-mash, diku me kalldrem, diku kubëza, diku beton e diku asfalt. Një mish-mash që funksiononte për banorët e lagjes.

Ndërtesat e larta, në shumë lagje të Prishtinës, filluan të zinin vend menjëherë pas luftës së vitit 1999. E Arsim Gllogu, banor i “Lagjes së Muhaxherëve”, kujton se ndërtimet e larta me ritëm të shpejtë në lagjen e tij nisën në vitin 2010. Edhe pse nuk ishte muhaxhir, por nga Batllava, familja e Gllogut banoi në këtë lagje ndër breza, që nga viti 1930. Gllogu ishte fëmijë i vetëm dhe ishte lidhur me profesionin e të atit, atë të farkatarit.

“Shumë kam kujtime atje, shumë…”, pushon një grusht sekondash Gllogu dhe vazhdon. “Rrugicat e ngushta kanë qenë, por zemrat kanë qenë të gjera. Bash para shtëpisë sime ka qenë pak një hapësirë më e gjerë, e aty u bojke si stadium”.

Vite më vonë, pas luftës, ai rrënoi shtëpinë e vjetër me tulla nga balta, për të ndërtuar një të re sipas nevojave të tij, që ta kishte edhe punishten e tij afër.

“600 metra katrorë është [shtëpia]. Në katin përdhesë e kam pasë punëtorinë, në katet e sipërme kemi jetu, ku e kemi pasë edhe një terasë të madhe. Punë, muhabet, shoqëri, familje, të gjitha ty i kemi pasë”, thotë Gllogu. “Ka pasë organizim shumë të mirë shoqëror. Nëse dikush ish ngusht, krejt i bëheshim krah. Por, erdh e hini ndërtimi”.

Duke qenë se “Lagjja e Muhaxherëve” ishte e ndarë në parcela të vogla, për t’ua dhënë tokën investitorëve për ndërtim duhej dakordim mes kushërinjve dhe fqinjve. Sa më shumë tokë që mund të siguronin investitorët, aq më të larta do mund t’i ndërtonin ndërtesat.

Por, jo të gjithë u pajtuan kur në vitin 2017 iu afrua edhe atyre një kompani për t’ua kërkonte tokat për ndërtim. Gllogu tregon se në atë kohë nisi që të prishej harmonia e fqinjëve, harmonia e familjeve mes vete.

“Unë nuk kam pasë interes, sepse shtëpia ime ka pozitë të mirë”, thotë ai. “Megjithatë u takova që mos të jem unë pengesë e projektit më të madh. Por, mua m’i ofruan vetëm 315 metra katrorë dhe aty ka përfunduar gjithçka. Nuk e dhashë tokën dhe shtëpinë për ndërtim”.

Por, ndërtimi përreth nisi.

Gllogu kishte ftuar inspektorët, për t’ia konstatuar gjendjen e shtëpisë para se të niste ndërtimi, që nëse do të shkonte diçka keq, të kishte fakte. Sikur i kishte paraprirë asaj që do t’i ndodhte. Teksa ndërtohej rrëzë shtëpisë së tij gjatë vitit 2017, pilotat e sigurisë, që duhej ta ndalonin rrëshqitjen e dheut, dështuan. Komisioni i inspektorëve të Prishtinës vlerësoi se shtëpia e Gllogut ishte tashmë e pabanueshme.

Gllogum punishten e barti në mes të një lugine në lagjen “Arbëria”, ndërsa tash banon me bashkëshorten dhe dy djemtë e tyre me qira në lagjen “Kalabria”, e njohur shpesh si “Emshir”. Në këto gjashtë vite, ai ka shkuar rregullisht në shtëpinë e tij të vjetër dhe ka shënuar me marker çarjet e reja, duke ua shkruar edhe datat kur kishin ndodhur.

Artikull i botuar nga Uran Haxha dhe Halim Kafexholli në Kosovotwopointzero.com
Fotografia: Atdhe Mulla

Kaosi i banimit në Prishtinë

 

 

Infrastrukturë

Së shpejti parkim publik me energji diellore në Durrës

Published

on

Një parkim modern multifunksional po ndërtohet në Durrës, në shërbim jo vetëm të qytetarëve, por edhe në funksion të sezonit turistik.

Për të inspektuar punimet, ishte prezent në kantier Kryeministri Edi Rama i shoqëruar nga kryebashkiakja e Durrësit Emiriana Sako dhe nga drejtori i Fondit Shqiptar të Zhvillimit, Dritan Agolli. “Është një objekt i cili ndodhet në një pozicion shumë të mirë, shumë afër me qytetin.

Durrësi ka një shtim të fluksit të lëvizjes gjatë sezonit turistik dhe një nevojë të madhe për parkim dhe mendojmë që me këtë godinë, me përfundimin e saj do të japim një shërbim të mirë pasi këtu do të akomodohen 400 vende parkimi,

do të ketë poste për biçikletat, karikues elektrik për mjetet elektrike dhe nga pjesa tjetër e funksioneve të objektit kemi parashikuar edhe hapësira të tjera funksionale si zyra të cilat mund të jenë në funksion të transportit publik në qytetin e Durrësit, por edhe salla për aktivitete të ndryshme”, – u shpreh kryetarja e bashkisë së Durrësit.

Godina do të furnizohet me energji falë paneleve diellore ndërkohë që projekti është konceptuar që të funksionoj si një rampë nga hyrja, deri në katin e fundit. Kjo gjë do të bëjë të mundur uljen e sipërfaqes së qarkullimit.

“Nga pikëpamja e teknologjisë ka për të qenë e gjitha me panele fotovoltaike që do të krijojë qëndrueshmëri nga pikëpamja e eficiencës së energjisë së parkimit.

Nuk është thjesht një hapësirë parkimi, por është një hapësirë me jetë e gjallëri gjatë gjithë kohës”, – theksoi drejtori i FSHZH, Agolli. Objekti është i vendosur në një nyje strategjike të qytetit.

“Nga e djathta kemi Portin turistik që po ndërtohet dhe pjesën e portit e Durrësit ekzistues dhe në të majtë kemi godinën e hekurudhës ku ka filluar puna me shtrimin e linjës Durrës – Tiranë dhe Durrës – Aeroport dhe mendojmë se është një nyje shumë e rëndësishme strategjike dhe ky objekt është i një nevoje shumë të lartë për qytetin – tha kryebashkiakja Sako.

Ky projekt, pritet të lehtësojë trafikun në qytet sidomos gjatë sezonit veror./Media Ndërtimi

Continue Reading

Infrastrukturë

Prokuroria urdhëron ndalimin e punimeve në rrugën ‘Gëzim Sahiti’ në Ferizaj

Published

on

Pas reagimeve dhe deklaratave të organizatës AVONET dhe shqetësimeve për mos respektim të vendimit të gjykatës themelore në Prishtinë dhe gjykatës së apelit, Prokuroria Themelore në Ferizaj ka urdhëruar inspektoriatin komunal në Ferizaj që të ndalojë punimet që po zhvillohen kundërligjshëm në rrugën Gëzim Sahiti.

Reagimi i prokurorisë vie si rezulatat i takimit të përbashkët me Kryeprokurorin z. Jashari, AVONET dhe banorët e lagjes. Në takim u shtjelluan dhe u prezantuan të gjitha faktet, provat dhe gjendja faktike, e rastit në fjalë.

Prokuroria me veprimet e saja ndaloi vazhdimi e shkeljeve ligjore nga kompania e përfshirë në çështje.

Rrjeti i Organizatave Jo-Qeveritare AVONET shpreh shqetësimin e thellë lidhur me veprimet e kundërligjshme të Drejtorisë së Urbanizmit, në lidhje me zbatimin e vendimeve gjyqësore, konkretisht Aktvendimin A.nr.1365/23 të Gjykatës Themelore në Prishtinë dhe Aktvendimin AA.nr.855/23 Gjykatës së Apelit. Këto vendime kanë bërë shtyrjen e ekzekutimit të vendimit të lejes ndërtimore në rrugën Gëzim Sahiti, në Ferizaj.

Këto veprime të kundërligjshme janë duke u bërë në një amulli totale të krijuar nga Drejtoria e Urbanizmit dhe Mjedisit në Komunën e Ferizajt. Për AVONET kjo amulli e krijuar është manifestim i paditurisë ose kapjes së Komunës së Ferizajt nga mafia e betonit.

AVONET ka parashtruar kërkesa për qasje në dokumente publike në Gjykatën Supreme dhe në Gjykatën Themelore në Prishtinë ku ka kërkuar sqarime në lidhje me rastin e krijuar nga zyrtarët e Komunës së Ferizajt. Nga këto institucione kemi pranuar informacione zyrtare se vendimi gjyqësor në lidhje me rastin në fjalë ende nuk është ekspedituar (dërguar) në gjykatën e shkallës së I-rë gjegjësisht Gjykata Themelore në Prishtinë nuk e ka pranuar ende këtë vendim gjyqësor.

Nga përgjigjjet e Komunës së Ferizajt shohim se zyrtarisht organet komunale nuk kanë marr asnjë veprim, në drejtim të fillimit të punimeve në objektin banesor në rrugën Gëzim Sahiti. Kurse nga gjendja faktike në terren shohim se punimet zhvillohen pa u penguar fare, madje punëkryerësit deklarohen se kanë leje pune nga Komuna e Ferizajt. Për këtë kemi njoftuar edhe organet e rendit siç është Prokuroria Themelore në Ferizaj dhe Policia e Kosovës, por deri më tani nuk kemi parë asnjë veprim nga organet në fjalë. AVONET vlerson se me këtë mosveprim po rrezikohet rëndë siguria juridike e qytetarëve.

Continue Reading

Infrastrukturë

Rruga Kijevë – Dollc, jepen zotime se do të kryhen brenda afatit

Published

on

Kryeministri i Kosovës, Albin Kurti ka marrë pjesë në inaugurimin e nisjes së punimeve të projektit “Zgjerimi i rrugës nacionale N9-Segmenti Kijevë-Dollc”, më 19.04.2024.

Me këtë rast, ai tha se punimet e kësaj rruge do të kenë edhe mbikëqyrës të punëve të kryera.

Ndërsa zëvendësministri i Infrastrukturës, Hysen Durmishi njoftoi që janë tri llote të punimeve të kësaj rruge.

Ai tha se afati për llotin më të madh është 260 ditë, por u shpreh i bindur se punimet do të realizohen para këtyre afateve.

“E nisëm me Podujevën për të vazhduar me Mitrovicën me ritëm të lartë dhe tani po e fillojmë ndërtimin e rrugës në drejtim të Pejës. Janë tri llote. Afati më i gjatë është 260 ditë për llotin me të madh, por unë jam i bindur që do të realizohen para këtij afati të gjitha llotët”- tha ai.

Kurti dhe Durmishi u pyeten edhe lidhur me ankesat e qytetarëve që për shkak të punimeve do të mbyllen disa biznese.

Durmishi tha se devijimi i rrugës ka filluar shumë më herët.

Komplet elaborimin e studimit ua kam dhënë përfaqësuesve të bizneseve”- tha ai.

Ndërsa, kryeministri Kurti tha se kjo çështje do të diskutohet dhe se nuk dëshirojnë ta dëmtojnë askënd për shkak të këtyre punimeve.

Po ashtu, ministri i Infrastrukturës, Liburn Aliu tha se po i kushtohet rendësi që shpronësimet të kryhen në kohë në mënyrë që të mos krijojnë probleme tjera.

“Në dallim të projekteve të mëhershme ajo që i kemi kushtuar rendësi është që shpronësimet të kryhen në kohë dhe të mos kemi problem me shpronësime, të cilat pastaj na krijojnë pengesa në projekt. Ky projekt është duke u realizuar në mbikëqyrjen e një kompanie. Të gjitha këto na sigurojnë që punimet të kryhen në kohë”- tha Aliu.

Ai ka njoftuar më 25.03.2024 se është nënshkruar kontrata për fillimin e ndërtimit të rrugës Prishtinë – Pejë, segmenti Kijevë-Dollc.

Kjo kontratë, siç ka bërë të ditur ministri, kap vlerën 21 milionë euro dhe se rruga do të jetë me katër korsi./Media Ndërtimi

Continue Reading

Trending