Connect with us

Aktuale

‘Është ajo koha e vitit (kur nuk mund të frymojmë) sërish!’

Published

on

Jemi pothuajse në atë pjesë të vitit përsëri! Dhe, nuk është fjala për ardhjen e Vitit të Ri, me të gjitha dhuratat dhe festat që i sjell. Po flasim për rikthimin e ajrit të tmerrshëm që vjen për çdo dimër, posaçërisht në Prishtinë, ku ndotja e ajrit shpesh mund të krahasohet me atë të megalopoleve si Pekini, Mumbai dhe New Delhi.

Deri tani, e dimë se kush është shkaktari kryesor i problemit: djegia e lëndëve djegëse të ngurta (drurit dhe qymyrit) për t’i ngrohur shtëpitë dhe për të siguruar energji për sektorin e tregut.

Për qytetarët e Kosovës, energjia dhe ngrohja kanë çmim të lartë, me rreth 760 njerëz që vdesin para kohe çdo vit si pasojë e infeksioneve të frymëmarrjes, sëmundjeve pulmonare, llojeve të ndryshme të kancerit, sëmundjeve të zemrës dhe sulmeve në tru të shkaktuara nga ndotja e ajrit (sipas një hulumtimit analitik të vitit 2019 të Bankës Botërore). Në ditët e sotme këto rreziqe po rëndohen nga COVID-19, i cili ndërvepron me sëmundjet e tjera për të prodhuar efekte dobësuese, shpesh herë edhe fatale.

Përpos tjerash, ndotja e ajrit vjen me një kosto të madhe ekonomike si rezultat i shpenzimeve shëndetësore dhe humbjes së produktivitetit në punë. Kostoja e vlerësuar lidhur me dëmin shëndetësor nga ndotja e ajrit në Kosovë është mesatarisht 207 milionë euro, ekuivalente me 3.6% të BPV në vitin 2016.

Me dimrin që po vije si test për qeverinë e re që u formua në shkurt, kjo pjesë e vitit paraqet ballafaqimin e saj për të parën herë me problemin e kahmotshëm, që shqetëson prej kohësh qytetarët e Kosovës.

Një projektligj kundër ndotjes së ajrit është miratuar tre muaj më parë në Kuvend duke marrë mbështetjen e të gjitha grupeve parlamentare. Çfarë përfshin ky ligj? A do t’i vendosë themelet për ta zgjidhur përfundimisht, ose të paktën për ta zbutur problemin? Apo një zgjidhje efektive është veç një ëndërr gjersa e kalojmë edhe një tjetër sezon të vështirë ngulfatjeje? Çfarë ka në plan Ministria e Mjedisit? Dhe çfarë mendojnë ekspertët e fushës për këto plane?

Për të diskutuar kemi ftuar:

– Letafete Latifi, Kryeshefe e Agjencisë për Mbrojtjen e Mjedisit të Kosovës

– Besfort Kosova, hulumtues në Balkan Green Foundation

– Granit Gashi, kontakt për Kosovë i Heinrich Böll Foundation

Biseda do të moderohet nga redaktorja e K2.0, Aulonë Kadriu.

Diskutimi do të mbahet në Hub 2.0 më 21 dhjetor prej orës 17:30./Media Ndërtimi.

Aktuale

Sot përfundon faza e dytë e aplikimit për subvencionim të efiçiencës së energjisë

Published

on

Ministria e Ekonomisë (ME) njofton të gjithë qytetarët se sot, më 9 dhjetor 2022 në ora 23:59 përfundon Faza e dytë e thirrjes për subvencion të efiçiencës së energjisë.

Në Fazën e dytë për subvencion të drejtë aplikimi kanë të gjithë aplikuesit që janë kualifikuar në Fazën e parë, pra që i kanë plotësuar kriteret në thirrjen publike të ME-së për subvencionim të efiçiencës së energjisë.

Sqarime shtesë:

Faza II

Pas kualifikimit në Fazën e parë qytetarët duhet të blejnë pajisjen e përzgjedhur sipas kritereve të specifikuara në thirrje, dhe më pas mund të aplikojnë për Fazën II përmes platformës e-Kosova që t’ju mundësohet përfitimi nga ky subvencion, duke ngarkuar dokumentet në vijim:

  1. Faturën e rregullt apo kuponin fiskal të blerjes së pajisjes (fatura duhet të jetë jo më e vjetër se nga data e shpalljes së thirrjes së parë të datës 06.10.2022);
  2. Vërtetimin e xhirollogarisë bankare apo kopjen e kartelës bankare;
  3. Fotografi të pajisjes së blerë ose instaluar sipas kritereve të specifikuara në thirrje (pajisja duhet të jetë e instaluar dhe e gatshme për inspektim nga data 10.01.2023);
  4. Fotografi të numrit serik të pajisjes;
  5. Fotografi të etiketës së performancës së pajisjes (opsionale për stufa individuale me biomasë);
  6. Për nënat vetushqyese për përfitim të subvencionit prej 90% për stufën individuale me biomasë dhe 60% për pompën termike ajër-ajër inverter (kondicioner/ klimë efiçiente) kërkohet të ngarkohet një dëshmi që konfirmon statusin e nënës vetushqyese.
  7. Marrëveshja për Subvencionim duhet të shkarkohet në ueb faqen e Ministrisë së Ekonomisë, e cila pas plotësimit në mënyrë elektronike (direkt në dokument në hapësirat e hijezuara) duhet të ngarkohet nga ana e Palës në platformën e-Kosova në formatin (PDF), në kuadër të Fazës II të aplikimit. Marrëveshjen mund ta gjeni në këtë link: https://me.rks-gov.net/sq/shpallje

Faza II  – Aplikimi nga përfituesit e skemës sociale (kategoria I & II)

Për aplikuesit që janë përfitues të skemës sociale (kategoria I & II), faza II është e ndarë në dy hapa:

Hapi 1: Aplikanti duhet të ngarkojë në platformën e-Kosova, dokumentet në vijim:

  1. Profatura – do të mundësohet vetëm për stufat individuale me biomasë dhe pompën termike ajër-ajër inverter (kondicioner/ klimë efiçiente);
  2. Vërtetimin e xhirollogarisë bankare apo kopjen e kartelës bankare;
  3. Dëshmi që vërteton mbështetjen e skemës sociale (kategoria I & II).

Për përfituesit e skemës sociale, ME do të transferojë mjetet financiare të subvencionit para blerjes apo instalimit së Stufës individuale me biomasë ose Pompës termike ajër-ajër inverter (kondicioner/ klimë efiçiente).

Hapi 2: Pas pranimit të subvencionit dhe blerjes së pajisjes duhet të përcillen përmes email adresës: [email protected] dokumentet në vijim:

  1. Faturën e rregullt apo kuponin fiskal të blerjes së pajisjes (fatura duhet të jetë jo më e vjetër se nga data e shpalljes së thirrjes së parë të datës 06.10.2022);
  2. Fotografi të pajisjes së blerë ose instaluar sipas kritereve të specifikuara në Thirrje; (pajisja duhet të jetë e instaluar dhe e gatshme për inspektim nga data 10.01.2023);
  3. Fotografi të numrit serik të pajisjes;
  4. Fotografi të etiketës së performancës së pajisjes (opsionale për stufa individuale me biomasë).

Ministria e Ekonomisë fton të gjithë qytetarët që janë parakualifikuar në Fazën e I-rë, që brenda afatit të përfundojnë të gjitha procedurat e cekura më lartë dhe në thirrjen publike në mënyrë që të jenë përfitues të subvencionit./Media Ndërtimi

Continue Reading

Aktuale

Katër komunat veriore kanë shpenzuar 51 milionë euro energji elektrike brenda 10 muajve

Published

on

Sipas të dhënave zyrtare prej muajit Janar deri në Tetor të këtij viti, katër komunat veriore kanë shpenzuar 51 milionë euro energji elektrike.

Deputetja e Kuvendi te Kosovës, Hykmete Bajrami ka deklarura se për herë të gjashtë me propozim të Qeverisë, mazhoranca në Kuvend i votoj “masat emergjente për furnizim me energji elektrike”.

“Qeveria asnjëherë nuk ka raportuar në Kuvend se për çka i shërbejnë këto masa:

– Për blerje të energjisë elektrike, duke mos respektu rregullat e Ligjit të prokurimit?

– Për kontraktimin e kompanive për investim/remonte në KEK duke anashkaluar të gjitha procedurat e prokurimit?

– Për legjitimim të reduktimeve? – apo çfarë?”, deklaroi deputetja nga radhët e LDK-së.

Herën e parë Qeveria ka shpallur  “masat emergjente për furnizim me energji” me 21.12.2021, sot është data 08.12.2022, Qeveria ende me masa emergjente.

“Krejt çka ka ndodhë gjatë kësaj periudhe është se kostoja e energjisë elektrike për katër komunat veriore 51 milionë euro, vitin e kaluar ka qënë 33 milionë euro. Mos të harrojmë se gjatë kësaj periudhe ka ndodhë edhe rritja e çmimit të energjisë elektrike për 100%.

51 milionë euro Janar-Tetor përkundër “shtrirjes së sovranitetit, ndalesës se aktiviteteve të mihjes së kriptovalutave, luftimit të krimit dhe kontrabandës e mos ta përmend këtu situatën e rënduar të ditëve të fundit”, shtoi Bajrami./Media Ndërtimi.

 

Continue Reading

Aktuale

BERZH miraton kredinë prej 28 milionë euro për ndërtimin në Karavasta të impiantit fotovoltaik më të madh në Shqipëri

Published

on

Banka Europiane për Rindërtim dhe Zhvillim (BERZH) aprovoi pak ditë më parë kërkesën e kompanisë Voltalia për një financim 28 milionë euro lidhur me projektin e impiantit fotovotlaik të Karavastasë.

Në faqen e bankës statusi i kërkesës tashmë është “aprovuar” duke hapur kështu më pas rrugën për vijimin e hapave të tjerë deri në disbursimin e kësaj shume. Në disa dokumente të publikuara në shtator të këtij viti BERZH jepte detaje mbi kërkesën e kompanisë e cila është angazhuar në Shqipëri me dy projekte fotovoltaikë atë të Karavastasë dhe Spitallës.

Impianti fotovoltaik i Karavastasë i pari në këto dimensione që doli përmes procedurës së ankandit shpallur nga qeveria shqiptare parahsikohet të ketë një kosto 125 milionë euro. Banka ka qenë e angazhuar më herët në procedurën e ankandeve me qeverinë duke e asistuar për ecurinë e procesit që në fazat fillestare të tij dhe duket se kjo është edhe një nga arsyet pse kompania Voltalia ka parë të arsyeshme kërkesën e financimit pranë këtij insitucioni.

Në përshkrimin e projektit BERZH më herët nënvizoni se kërkesa e kompanisë lidhej drejtpërdrejt me një kredi afatgjatë për financimin e ndërtimit dhe funksionimit të centralit diellor të Karavastasë një impiant me fuqi të instaluar prej 140 MWp që ndodhet në bashkinë e Fierit.

“Projekti është rezultat i një tenderi konkurrues ndërkombëtar të mbështetur nga Banka dhe do të zbatohet nga Karavasta Solar, 100% në pronësi të Voltalia SA, një kompani ndërkombëtare e energjisë së rinovueshme e listuar në Euronext Paris” thuhet në dokument.

Projekti për Karavastanë dhe Spitallën

Kompania Voltalia në korrik të këtij viti mbajti ceremoninë për nisjen e punimeve në parkun fotovoltaik të Karavastasë.

Projekti 140 megavat ju dha Voltalia-s me vendim të Këshillit të Ministrave të Shqipërisë më date 21 janar 2020, sipas një procedurave dhe procesit konkurrues të tenderit të hapur nga Ministria e Infrastrukturës dhe Energjisë me mbështetjen e Bankës Evropiane për Rindërtim dhe Zhvillim – BERZH.

Sipas termave të tenderit, Parku i Karavastasë do t’i shesë operatorit publik shqiptar 50% të energjisë elektrike nëpërmjet një kontrate shitjeje 15-vjeçare, ndërsa pjesa tjetër do t’i shiten me kontrata afatgjata operatorëve privatë. Impianti pritet të vihet në punë në gjysmën e dytë të vitit 2023.

Impianti i ri i Energjisë do të mbulojë konsumin vjetor të energjisë elektrike të rreth 220 mijë banorëve, dyfishi i konsumit të qyteteve shqiptare si për shembull Vlora apo Kamza. Në mars të vitit të shkuar Voltalia fitoi një tjetër garë për projektin që do të zbatohet në Spitallë me një çmim 29.89 euro/MWh.

Parku Fotovoltaik i Spitallës do të ketë një kapacitet të instaluar prej 100 MWp nga të cilat 70 MW do të blihen nga Operatori i Shpërndarjes së Energjisë Elektrike nëpërmjet një kontrate për blerjen e energjisë me çmim të paracaktuar dhe 30 MW do të tregtohen në treg të lirë.Revista Monitor/Media Ndërtimi

Continue Reading

Trending