Kryetari i Prishtinës, Përparim Rama ka prezantuar Raportin e punës së kryeqytetit për gjashtë mujorin e parë të këtij viti.

“Si rezultat i gjashtë muajve të angazhimit në shërbim të qytetit dhe të fshatrave të Komunës së Prishtinës, po ju prezantojmë raportin e plotë të gjashtë muajve të parë të punëve dhe projekteve të përmbyllura, të atyre që janë në stade të ndryshme të zhvillimit, si dhe të planifikimit.

Raporti ndahet në dy pjesë: në të parën, të ndara sipas sektorëve përkatës, prezantojmë arritjet kryesore të këtij gjashtëmujori në nivelin e Institucionit të Kryeqytetit, kurse të dytën paraqiten projektet dhe planet e mëtejme sipas drejtorive përkatëse.”, ka thënë Rama.

Rama mburret me projektin e ndërtimit të Rrugë A.

“Kemi përcjellur materialin ofertues për projektin e ndërtimit të “Rrugës A” (ku përfshihet kolektori dhe rruga). Në kuadër të këtij projekti përfshihet rruga me të gjitha instalimet nëntokësore.

Rruga do të jetë me tri korsi në një drejtim. Për autobus do të ketë korsi të veçantë, ndërsa dy korsitë tjera do të shfrytëzohen për vetura. Rruga do të ketë shtegun e biçiklistave dhe trotuarin afër saj. Po ashtu, do të ketë tre shtigje të hapësirave gjelbëruese. Rruga “A” do të ndihmojë dukshëm në shkarkimin e trafikut të Prishtinës së Re,në të cilën ndërtimi i segmentit të parë do të kushtojë rreth 8 milionë euro.”, thotë Rama.

Pjesa e parë e rrugës do të përfshijë segmentin nga “Veterniku” deri tek vazhdimi i “Rrugës B”.

Kemi përfunduar projektin e Rrugës “Muharrem Fejza”! Në vetëm 40 ditë efikase të punës, ashtu siç edhe kemi premtuar, ka përfunduar asfaltimi i kësaj rruge! Përveç infrastrukturës së duhur, jemi kujdesur që kësaj rruge të mos i mungojë as gjelbërimi përreth!

Kemi nënshkruar “Marrëveshjen e Bashkëfinancimit” me Millennium Foundation Kosovo për rinovimin dhe përmirësimin e furnizimit me energji të ripërtërishme në Prishtina Kryeqytet i Investimeve e mirëfilltë të projekteve rrugore, për një Prishtinë sa më të qasshme për të gjithë!

Me Bankën Evropiane për Rindërtim dhe Zhvillim kemi nenshkruar kredi të butë, për herë të parë në Komunën e Prishtinës, në shumën prej 5 milion EUR, të komplementuar nga një grant investimi në shumën prej 1 milion EUR, për të asistuar në implementimin e projektit “Korniza e Qyteteve të Gjelbra – Efiçienca e Energjisë në Ndërtesa Publike në Prishtinë”.

Projekti ka për qëllim investimin në masat për efiçiencën e energjisë në ndërtesat publike (kopshte, shkolla dhe qendra të kujdesit shëndetësor primar) duke përmirësuar dhe ndërruar sistemet e ngrohjes, izolimin termik të ndërtesave dhe instalimin e dyerve dhe dritareve më efiçiente. Jemi tejet të përkushtuar për të shtyrë përpara projekte të cilat janë në harmoni me ruajtjen e ambientit, zhvillimin e qëndrueshëm dhe promovimin e energjisë efiçiente, për të zvogëluar nivelin e ndotjes së ajrit në Kryeqytet dhe më gjerë.

Është asfaltuar rruga “1 Tetori”! Kjo rrugë, duke qenë ndër ato më të qarkullueshmet dhe që mundëson lidhjen me disa lagje, po lehtëson qasjen e qytetarëve në kryeqytet. Kemi nënshkruar Marrëveshjen e Mirëkuptimit mes Kryeqytetit dhe Ministrisë së Mjedisit, Planifikimit Hapësinor dhe Infrastrukturës.

Kryeqytetit për realizimin e projektit “Unaza e Mesme e Prishtinës”, i cili është shumë i rëndësishëm për rregullimin e mobilitetit dhe lirimit të trafikut në Kryeqytet.

Me partnerët e KFW jemi duke punuar intensivisht në zhvillimin e projektit “Solar for Kosovo”, i cili projekti ngrit kapacitetet e ndermarrjes “Termokos” edhe për 50 MW të reja. Po investojmë vazhdimisht në ndriçim publik! Kemi nënshkruar kontratën e re për mirëmbajtjen e sistemit, ndërsa jemi në proces të vlerësimit të kontratës përmes së cilës do të bëjmë zgjerimin e mëtutjeshëm të sistemit të ndriçimit publik, në mënyrë që asnjë lagje e Prishtinës të mos mbetë pa ndriçim.

Hapësirat publike tani e tutje do të jenë nën vëzhgimin e kamerave! Kemi finalizuar marrëveshjen me Policinë e Kosovës për sistemin e kamerave në hapësirat publike.

Tash e sa kohë jemi në bashkëpunim të ngushtë me Policinë e Kosovës për hartimin e marrëveshjes për vendosjen e sistemit të kamerave dhe mënyrën e mirëmbajtjes së rrjetit të kamerave në hapësirat publike të Kryeqytetit, marrëveshje te cilën e kemi nënshkruar.

Bashkë me Policinë e Kosovës u zotuam se do të koordinojmë aktivitete të përbashkëta për përmirësimin e sigurisë në hapësirat publike të Kryeqytetit. Jam i lumtur që projekti i financuar nga Millennium Challenge Corporation – MCC, për instalimin e njehsorëve të Termokos-it po shkon mbarë./Media Ndërtimi.

Linku i Raportit:

https://prishtinaonline.com/uploads/raporti_i_punes_se_kryeqytetit_janar_-_korrik_2022.pdf?fbclid=IwAR3Xm-eQUbb878IzQ3W1Um4ERTFFriukYN23BlYWh8AzVXamSu-rTsPs20o