Aktuale
Për Sallën Koncertale, ishte menduar edhe rrënimi i TEATRIT KOMBËTAR

Mbi 12 lokacione ishin shikuar si mundësi se ku të ndërtohet Salla Koncertale. Dhe pas eliminimit të shumë lokacioneve, si përfundim i gjithë kësaj mbeti objekti i Qeverisë së Kosovës dhe ish-Gërmia, që tani është nën shfrytëzimin e Administratës Tatimore të Kosovës. Por përfundimisht, u vendos që objekti i ish-Gërmisë të shndërrohet në Sallë Koncertale. Nuk përfundoi gjithçka këtu. Tani ky objekt po rrezikon edhe të shembet.
Në “bombardimin” e ideve se ku t’i bëhet vendi ndërtesës 15 milionëshe e financuar nga Komisioni Evropian, u dha edhe rrënimi i Teatrit Kombëtar. Por që kjo del të jetë eliminuar qysh në fillim, meqë ky objekt është pjesë e Trashëgimisë Kulturore.
Kështu ka treguar përfaqësuesja e komitetit artistik, Besa Luzha, e cila është ndër të rrallat që në këtë debat ka përkrahur idenë e rrënimit të objektit të ish-Gërmisë dhe aty më pas të zë vend Salla Koncertale. Luzha në një debat ku ishte edhe arkitektja Eliza Hoxha dhe Shkelzen Maliqi në klankosova ka thënë se ishte dhënë ideja që të rrënohet Teatri Kombëtar dhe aty të ndërtohet komplet Teatri i Operës dhe Baletit.
“Edhe ajo ishte në listën e objekteve. Ne e kemi propozuar edhe atë, pra me rrëzu teatrin dhe me ndërtu komplet Teatin e Operës dhe Baletit në një këndë. Qaty është mbyll debati. Në momentin që thuhet ky është në listën e objekteve të Trashëgimisë më nuk po mundesh me fol. Ky nuk është, okej pra hajde pra po shohim çka po mundemi me bo. Unë nuk kam faj”, ka thënë Luzha.
E gjitha çka ka rëndësi për Luzhën është ndërtimi i Sallës Koncertale kudo qoftë lokacioni. Qefi nuk do t’i prishej nëse përfundimisht vendoset që kjo sallë të jetë pikërisht në Qendër të qytetit, përballë Teatrit Kombëtar, pra në ish-objektin e “Gërmisë”.
“Kisha pas qef me ruajt por nuk kemi zgjidhje tjetër. Kur më pyet dikush se a ë më mirë me rrëzu atë me bo një sallë e cila mbetët në memorien kolektive për krejt gjeneratat e ardhshme? Unë jam për me rrëzu” ka potencuar Luzha.
Ideja për rrëzimin e objektit të ish-Gërmisë nxiti edhe reagimin e Organizatës për Mbrojtjen, Promovimin dhe Konservimin e Lëvizjes Moderne “DoCoMoMo Kosova”, e cila organizoi një peticion që kundërshton rrënimin e këtij objekti. Peticion ky që më pas do t’i dërgohet Ministrisë së Kulturës, Rinisë dhe Sportit (MKRS) për të kërkuar nga ta, që sa më parë ta mbrojë ligjërisht këtë objekt dhe kështu të arandalojnë demolimin e tij.
Ku në MKRS i kanë thënë Ndërtimi.info se kanë kërkuar nga Qendra Rajonale e Trashëgimisë Kulturore në Prishtinë dhe Instituti i Kosovës për Mbrojtje të Monumenteve të angazhojnë njësitet dhe punonjësit e tyre të specializuar për të analizuar me konsistencë profesionale dhe ligjore të gjithë debatin e ngritur. Ku kanë shtuar se sigurojnë opinionin publik se do të analizohen të gjithë faktorët dhe kriteret relevante dhe do të vendoset në të mirë të ruajtjes dhe mbrojtjes së çdo aseti apo ndërtese që bartë në vete tregim.
Kurse, në anën tjetër pas shumë debateve në rrjetet sociale, i fundit por jo pak i rëndësishëm u shfaq edhe deklarata e të parit të Prishtinës, Shpend Ahmeti. I cili po ashtu përmes një postimi në profilin e tij Facebook ka thënë se ende nuk është marrë ndonjë vendim për rrënimin e ish-objektit “Gërmia”.
Kryetari Ahmeti thotë se Komisioni Evropian është interesuar të investojë me 15.4 milionë euro por me kushtin që salla të ndërtohet në një lokacion në qendër dhe se këtë objekt e ka parë si objekt që i përmbush kërkesat.
Gjithsesi, Ahmeti thotë se është kundër rrënimeve të objekteve kulturore, por “Gërmia”, nuk është përfshirë tek Instituti për Mbrojtjen e Trashëgimisë Kulturore.
Tutje Ahmeti ka thënë se do mbahet një debat publik, dhe e ka përmendur si lokacion të mundur Kino Armata, por ka thënë se nuk do të lejohen sulmet e fyerjet, e madje ka thënë se ata që e kundërshtojnë duhet të japin arsye të forta, se pse një gjë e tillë nuk është e mundur.
Derisa vazhdon debati për rrënimin apo konservimin e objektit, i cili tani është nën shfrytëzimin e Administratës Tatimore të Kosovës e dikur ishte ish-qendra tregtare “Gërmia” reagimi erdhi edhe nga publicisti Shkelzen Maliqi i cili ndër të tjera ka treguar edhe për idenë e tij rreth këtij objekti.
“Ideja e ime ka qenë që aty të themelohet Muzeu i arteve bashkëkohore, kurse për donacionin e BE- së të caktohet një lokacion tjetër në qendër të Prishtinës. Kështu kultura do të fitonte gati njëkohësisht dy objekte kapitale për kulturën deri sot të neglizhuar. Se voni mu kujtua edhe një vend në qendër, përpara shtypshkronjës se Rilindjes, besoj se është pronë publike, ky do të mund të ndërtohej salla e koncerteve. Është e vërtetë se ajo hapësirë i shkon mirë godinave ekzistuese e edhe është si një park i vogël me bustin e Ismaili Qemalit, por nëse aty do të ndërtohej një objekt reprezentativ i Sallës së koncerteve dëmi do të ishte shumëfish me i vogël… Dhe edhe në atë udhëkryq, që tani është pa identitet të formësuar, urbanizimi i Prishtinës do të pasurohet…Dhe të gjithë do të ishim të kënaqur”, ka shkruar Maliqi.
Ndërkohë, Media Ndërtimi ka shpurdhur në arkiva duke gjetur këtë tekst të 3 shkurtit të vitit 1973 nga Shtëpia e Mallrave “Gërmia”. Teksti thotë se “Gërmia” u hap më 28 dhjetor, prag të festave të fund vitit. Për ndërtimin e saj thuhej se “sipas llogarisë jodefinitive janë shpenzua afro 5 miliardë (dinarë). Nga këto 30% të mjeteve janë tonat e 70% janë kredi nga Banka e Kosovës”, thuhej në tekst, ku fliste drejtori i atëhershëm Rushit Selimi.
Ndërtesa ishte projektuar nga arkitektja Liljana Rashevski dhe kishte dashur dy vite për ta ndërtuar, hapësirën prej 8.500 metrash në total, duke përfshirë pjesën administrative ku sot është Ministria e Infrastrukturës.
