Aktuale
Pas 27 vjetësh fillon mirëmbajtja e hyrjeve të ndërtesave në kryeqytet [video]
Prishtina tashmë është e stërmbushur me ndërtesa të larta. Banesat kolektive kanë zërë vend në çdo skaj të qytetit.
Kushtrim Hajzeri
Por, nuk përfundon çdo gjë vetëm me ndërtimin e tyre dhe funksionalizimin sa për të jetuar. Mirëmbajtja e tyre është esenciale për të ruajtur funksionalitetin gjatë gjithë kohës.
E, shumë banesa kolektive në kryeqytet hyrjet i kanë si mos më keq. Për mirëmbajtjen e tyre nuk ka pasur kujdes plotë 27 vjet, që nga viti 1990, ka bërë të ditur Drilon Pireva nga Ndërmarrja Publike Banesore (NPB).
Mirëpo, që nga shkurti i këtij viti Ndërmarrja Publike Banesore (NPB) po zbaton projektin e renovimit dhe mirëmbajtjes së hyrjeve të banesave, publike e private. E, për gjithë këtë projekt buxheti që NPB-ja ka ndarë kap shifrën gjysmë milion euro.
Ky projekt përfshinë rregullin, sigurinë dhe mirëmbajtjen e hyrjeve të banesave, duke bërë renovimin e tyre, vendosjen e interfonëve, ndriçimin e gjithçka që një hyrje të jetë tërësisht funksionale dhe moderne.
Udhëheqësi i këtij projekti në kuadër të NPB-së, Drilon Pireva ka treguar për Ndërtimi.info sa banesa janë të përfshira momentalisht në këtë projekt dhe për punën në to.
“Bordi i Ndërmarrjes Publike Banesore i ka ndarë gjysmë milionë euro për këtë projekt, për fazën e parë, dhe me këtë shumë llogarisim me i kry veç hyrje. 100 hyrje mesatarisht 6 katëshe me 30 metra katror për korridor, kjo është pak a shumë llogaritja që e kemi bërë. Dhe nga kjo jemi bazuar edhe të puna e çmimeve. Ne kemi planifikuar që deri në muajin korrik të vitit të ardhshëm me përfundua 100 hyrje”, ka thënë ai.
Numri më i madh i ndërtesave që NPB-ja tani ka përgjegjësi mirëmbajtjen e tyre janë në lagjet Ulpiana, Dregu i Diellit, Qendër, por edhe në lagje të reja të qytetit.
Kjo punë që bëhet nga NPB-ja nuk është krejtësisht falas për qytetarët. Ata do të nënshkruajnë një kontratë, e cila obligon ata të kryejnë një pagesë simbolike prej 6 eurove në muaj.
Renovimi dhe mirëmbajtja e hyrjeve nuk varet nga shkalla e shkatërrimit të tyre. Gjithçka është në duart e vetë banorëve, të cilët në mënyrë të organizuar duhet të bëjnë kërkesë për këtë gjë.
Megjithatë, në mënyrë që kjo të jetë më e lehtë, NPB-ja ka kontakt me banorët përmes përfaqësuesve të saj, e në raste edhe të administratorëve që ka.
Pavarësisht numrit të madh të ndërtesave, kjo ndërmarrje ka vetëm dy administratorë, të cilët sipas Pirevës mjaftojnë.
“Ne për këtë fazë i kemi dy administratorë të Ndërmarrjes Publike Banesore. Ligji nuk parasheh me pas shumë administratorë. Administratori luan rolin e lloj menaxherit të hyrjeve, ai mundet me pas shumë punëtorë në kuadër të tij që munden me realizua punët të cilat i cakton ai. Kështu që me kohën, nëse kontraktimet e reja e bëjnë të pamundshme me i kry këta dy këto punë, atëherë ne normalisht që do t’i certifikojmë administratorët e rinj. …Për momentin janë të mjaftueshëm këta dy administratorë”, ka thënë ai.
Megjithatë, ai ka potencuar se tashmë punën e lehtëson krijimi i këshillave të ndërtesave, të cilët i drejtohen ndërmarrjes për kërkesat e tyre.
Por, jo gjithçka do të shkonte mirë. Edhe pse ligji do të duhej t’i lehtësonte punët, në këtë projekt ai nuk po ndihmon shumë.
Pireva ka thënë se Ligji për Bashkëpronësi ka mangësi dhe nuk merret fort për bazë gjatë punës. Kjo, pasi sipas tij ky ligj nuk parasheh sanksione për shkelësit e tij.
Pavarësisht, se ligji nuk po del të jetë i mirë puna është duke vazhduar. Në ditët e fundit NPB-ja është duke investuar në gjashtë hyrje, të cilat pritet të përfundojnë së shpejti.
Privera ka treguar se kostoja mestarë e renovimit të një hyrje është e përshtatshme.
“ Përveç tjerash dua të shpjegoj që kostoja e shpenzimeve është mjaft e lirë, për shkak se nuk e kemi idenë që çdo sen duhet të ndërrohet, shkojmë në riparim, nëse e shohim investimin në hyrje të Ulpianës. Vlera përafërsisht është 3 mijë euro investim. Është jashtëzakonisht lirë, për shkak se do të mundemi të shfrytëzojmë materialin, mos me ndërrua pjesë dhe me riparua secilin sen dhe me ruajt origjinalitetin e hyrjes dhe me bë funksionale”, ka thënë ai.
Interesimi i qytetarëve që tashmë të kenë hyrje të rregulluara e mirëmbajtje të tyre po rritet çdo ditë. Vetëm për një muaj për këtë gjë në NPB janë adresuar 40 kërkesa.
E punët të gjitha kryhen nga punëtorët e ndërmarrjes, pa pasur nevojë për nënkotraktorë.