Udhëheq me Komunën e Pejës, por biznesin e ka të orientuar në kryeqytet. Madje, prona me të cilën po bën biznes dyshohet se nuk është e tij. Ka më shumë se 20 vjet që Gazmend Muhaxheri është në konflikt me Ndërmarrjen Publike Banesore (NPB), për një parcelë që gjendet në qendër të Prishtinës, përkatësisht te “Qafa”, shkruan Ndërtimi.info.

Arjeta Shabani

Të dy palët po pretendojnë mbi pronësinë e kësaj parcele, e asesi nuk po mund të merren vesh për shfrytëzimin e saj.

Muhaxheri po akuzohet nga Ndërmarrja Publike Banesore, se bashkë me pronarin e Kompanisë “Riza Company”, Petrit Rizën kanë pronësuar në mënyrë të paligjshme parcelën nr. 6266, në rrugën “Hajdar Dushi”, të cilën më pas e kanë lëshuar me qira.

“Njëri nga uzurpatorët është kryetari i tanishëm i Pejës, Gazmend Muhaxheri së bashku me Petrit Rizën, pronarin e Kompanisë Riza Company. Këta të fundit kanë pronësuar në mënyrë të paligjshme parcelën 6266 të cilën i’a kanë lëshuar me qira kompanisë me karakter afarist e financiar “Money Gram” ,ndërsa pjesa tjetër shfrytëzohet si parking me pagesë për vetura”, kishin deklaruar kohë më parë nga NPB-ja në medie.

E në NPB thonë se është duke u zhvilluar një kontest gjyqësor ndërmjet Komunës së Prishtinës dhe shfrytëzuesve aktual të kësaj parcele.

Zëdhënësja e kësaj ndërmarrje, Rajmonda Ahmetaj deklaron se janë në pritje të përfundimit të këtij kontesti, i cili do t’i sqaronte pretendimet e palëve.

“Arsyeja për këtë është për faktin se është duke u zhvilluar një kontest gjyqësor ndërmjet  Komunës se Prishtinës  dhe shfrytëzuesve aktual të parcela nr. 6266 në Rr. ‘Hajdar Dushi’. Jemi në pritje të përfundimit të këtij kontesti  i cili do ti sqaronte pretendimet e palëve për pronën”, ka thënë Ahmetaj për Ndërtimi.info.

Ajo thotë se Komuna e Prishtinës me vendimin mbi shpronësimin të datës 25 tetor 1991, kishte vendosur për ekspropijimin e tokave në atë pjesë të qytetit dhe pjesë e këtij shpronësimi ka qenë edhe parcela kontestuese.

Gjersa thotë se e gjithë kjo është bërë me qëllim të ndërtimit te objekteve banesore.

“Procedura e bartjes dhe regjistrimit në kadastër sipas profesionistëve të fushës zakonisht është bërë pas përfundimit të kompensimeve të cilat janë arritur me pronaret të cilët kane qenë të këqyra në këtë proces të eksproprijimit dhe njësoj është vepruar edhe me pronaret e parcelës nr.6266”, thuhet në përgjigjet e Ahmetaj.

Në Ndërmarrjen Publike Banesore thonë se parcela 6266 është bartë në emër te NPB-së që nga vitit 1996, dhe se edhe tani parcela është në emër të ndërmarrjes.

Por, thonë se pronën  nuk e kanë në shfrytëzim pasi që është duke u shfrytëzuar nga familja Rizaj dhe Muhaxheri, të cilët pretendojnë se prona është e tyre.

Deklarojnë se kanë zhvilluar disa takime me Petrit Rizaj dhe Gazmend Muhaxheri me qellim të arritjes së marrëveshjes për lirimin e parcelës, mirëpo thonë se kjo ishte e pamundur pasi që nga ana e tyre insistohej se prona u takonte atyre dhe se asnjëherë nuk janë kompensuar për eksproprijimin.

“Pronën  nuk e kemi në shfrytëzim pasi që është duke u shfrytëzuar nga familja Rizaj dhe Muhaxhiri të cilët pretendojnë se prona është e tyre. Shtëpia e cila ka qenë e ndërtuar në këtë parcelë është rrënuar dhe tani kjo parcelë është dhënë me qira ndërsa pjesa tjetër shfrytëzohet si parking dhe qiraja merret nga të lartcekurit”, ka thënë Ahmetaj për Ndërtimin.

Muhaxheri: Pronën e ka blerë babai qysh në ‘85-ën

E të gjitha këto akuza të Ndërmarrjës Publike Banore ndaj Gazmend Muhaxherit, ky i fundit po i hedh poshtë. Ai insiston se prona i takon atij.

Muhaxheri ka thënë për Ndërtimi.info se këtë pronë e ka blerë babai i tij, qysh në vitin 1985.

“Si mundë të uzurpohet një pronë e blerë në vitin 1985 nga prindi imë?  Kurre ndermarja publike banesore nuk ka hy ne me një vendim të organeve pushtuese në vitin 1993 në mënyre arbitrare ka kaluar në bvinë e banesave”, ka deklaruar Muhaxheri.

Ndërsa, Petrit Riza i cili po akuzohet poashtu se e ka uzurpuar këtë pronë bashkë me Muhaxherin, nuk ka dashur të flasë për këtë çështje. Rizaj ka thënë se aktualisht gjendet jashtë vendit, dhe ka sugjeruar që të kontaktojmë me Gazmend Muhaxherin.

“Jam jashtë vendit, po thirreni Gazmend Muhaxherin e merruni vesh me ta”, ka thënë Rizaj për Ndërtimi.info.

E pikërisht për këtë pronë, Muhaxheri kohë më parë kishte thënë se NPB-ja po thirrej në disa dokumente të ish sistemit i cili, sipas tij me një vendim e kishte marrë pronën e tyre me një vendim të kundërligjshëm.

Kishte thënë edhe se ka vendime gjyqësore që Komuna e Prishtinës ka për obligim që t’ua kthejë shtëpinë.

“I kam dy vendime gjyqësore të cilat e obligojnë Komunën e Prishtinës të na kthejë shtëpinë, por që nuk e kanë pranuar. Tani rasti është në Gjykatën Supreme dhe presim vendimin e tyre”, kishte thënë Muhaxheri.

Gjykatat ende pa vendim për këtë lëndë

Por, edhe pse ka kohë që kjo lëndë endet nëpër Gjykatat e vendit, ende asnjëra prej tyre nuk ka dalur me ndonjë vendim për atë se kujt i përket kjo parcelë.

Ndërtimi.info ka kërkuar nga Gjykata Supreme detaje lidhur me këtë  kontest, por aty thonë se nuk kanë ndonjë lëndë të tillë, ani pse Muhaxheri kishte deklaruar se lënda është në Supreme.

“Në Gjykatë Supreme nuk ka asnjë lëndë rreth një kontesti mes këtyre palëve”, ka thënë zëdhënsja për media e Gjykatës Supreme, Antigona Uka-Lutfiu.

Por, Ndërtimi.info merr vesh se lënda për këtë kontekst gjyqësor është në Departamentin për Çështje Administrative, që funksionon në kuadër të Gjykatës Themelore në Prishtinë.

Këtë e kanë konfirmuar edhe zyrtarë nga Gjykata e Apelit.

Në këtë Gjykatë kanë thënë se lënda që ka për palë, Petrit Rizajn dhe Komunën e Prishtinës, ka arritur në Gjykatën e Apelit qysh në vitin 2014, ndërsa është kryer më 9 dhjetor të po atij viti për tu përcjellë në Themelore.

“Lënda tjetër Petrit Rizaj , Komuna e Prishtinës, baza e kontestit shpronësim ju njoftoj se kjo lënde ka arritë në Gj. E apelit me 27.08.2014 ka marë këtë numër AA.nr.315/14 është e kryer dhe me datën 09.12.2014 është përcjellë për Gj. Themelore në Prishtinë – departamentin për qështje administrative, dhe atje mund ti kërkoni të dhënat e tjera”, ka thënë për Ndërtimi.info, Nysret Arifi nga Gjykata Apelit.

E në anën tjetër në Gjykatën Themelore, përkatësisht në Departamentin për Çështje Administrative, ku po thuhet se tani ndodhet lënda e Petrit Rizajt dhe Komunës së Prishtinës, për shkak të grevës së punëtorëve të administratës nuk po kthejnë përgjigje.

Tashmë janë bërë dy javë që prej se Media “Ndërtimi.info”, i ka adresuar pyetjet në këtë institucion, por që nuk ka marrë përgjigje.

Se për këtë rast është iniciuar procedurë gjyqësore, e kishte konfirmuar edhe zëdhënsja e NPB-së, Rajmonda Ahmetaj. Por edhe ajo kishte thënë se nuk ka ndonjë vendim përfundimtar lidhur me këtë çështje.

“Familja Rizaj ka prezantuar evidenca se është iniciuar procedurë gjyqësore për vërtetimin e pronësisë, mirëpo nga dokumentacioni i prezantuar shihet se nuk ka ndonjë vendim përfundimtar lidhur me këtë çështje”, kishte thënë Ahmetaj.

Rreth 150 banesa të uzurpuara në kryeqytet

I pari i Pejës, nuk është i vetmi që gjendet në listat e uzurpatorëve të pronave të Ndërmarrjes Publike Banesore në Prishtinë, pasi të tillë janë shumë.

Një numër i madh banesash që janë në pronësi të Ndërmarrjes Publike Banesore po shfrytëzohen jashtëligjshëm nga qytetarët tash e sa kohë. Madje, për disa prej tyre kjo ndërmarrje është edhe në konteste gjyqësore, shkruan Ndërtimi.info.

Janë rreth 150 banesa e prona të ndryshme në kryeqytet që shfrytëzohen nga qytetarët pa ndonjë marrëveshje me Ndërmarrjen Publike Banesore (NPB). Këto objekte nga NPB-ja llogariten si të uzurpuara dhe kjo ndërmarrje pret që të lirohen vetëm përmes vendimit të gjykatës.

Së paku kështu ka deklaruar për Ndërtimi.info, zëdhënësja e NPB-së, Rajmonda Ahmetaj.

Numri më i madh i pronave të uzurpuara janë në lagjen “Dardania”, “Bregu i Diellit”, “Eqrem Çabej” si dhe objekte të tjera në qendër të Prishtinës.

“Është një numër i madh  pronave të uzurpuara dhe të cilat pritet të lirohen përmes gjykatës. Në Dardani kemi 131 banesa të cilat janë të uzurpuara që nga paslufta ( 24 prej tyre janë liruar )  ,Bregu i Diellit 2,  gjithsej 43 banesa ,Ecrem Cabej 7 banesa, objekti i Kino ABC në qendër të Prishtinës”, ka thënë Ahmetaj.

Ajo ka bërë të ditur se përveç këtyre banesave, ka edhe shumë lokale tjera afariste të cilat janë uzurpuar në mënyrë të jashtëligjshme ose janë marrë nën menaxhim nga Agjencia Kosovare e Privatizimit (AKP), nën pretendimin se janë prona shoqërore./Ndërtimi.info