Aktuale
Fushë Kosova kundër ndërtimit të deponisë në Harilaq

Në Harilaq të Fushë Kosovës, qeveria ka vendosur që ta ndërtoi një deponi mbeturinash. Por, kundër këtij projekti janë banorët e fshatit.
Zona prej 17 hektarësh tashmë është rrethuar, e pjesëtarët e FSK-së po kujdesen për deminimin e saj.
Plani i Qeverisë për ndërtimin e kësaj deponime të mbeturinave të rrezikshme po has në kundërshtim të banorëve të Harilaqit si dhe Komuna e Fushë Kosovës. Zyrë të kësaj të fundit thonë se kryeministri nuk e ka idenë se ku gjenet parcela.
Nënkryetari i Komunës së Fushë Kosovës, Fadil Krasniqi thotë se ka vende tjera për ndërtimin e kësaj deponie.
“ Ka vende tjera që Qeveria mund të caktojë ndërtimin e kësaj deponie, por jo në Fushë Kosovë, sepse dihet që Fushë Kosova me Komoranin dhe këto llogaritet si zemra e Kosovës. E, në zemër të ndërtohet një deponi me materiale të rrezikshme është e papranueshme”, tha ai për Klan Kosovën.
Njëjtë po mendon edhe opozita në këtë Komunë, e cila tashmë ka thirrur senacë të jashtëzakonshme.
“ Grupi Parlamentar i VV-së tashmë ka nisur mbledhjen e nënshkrimeve për mbajtjen e një seance të jashtëzakonshme dhe në atë seancë të diskutohet për mënyrën se si është marrë ky vendim nga Qeveria. Mendojmë që përmes kësaj seancë të kundërshtojmë këtë vendim të Qeverisë”, tha Durim Hajra, asamblist i VV-së.
Me mbledhje dhe peticione kanë filluar edhe banorët e kësaj zone.
“Peticioni veç është bërë. Por, të vendoset edhe për hapat e mëtejshëm , çka do të ndërmarrim sepse një gjë e tillë nuk do të lejohet”, u shpreh banori i Harilaqit, Jeton Zogjani.
Por, Qeveria është e vendosur që deponinë ta ndërtojë në këtë zonë.
“ Ne jemi duke përcjellë me vëmendje të gjitha rekomandime dhe shqetësimet për këtë projekt, përfshirë edhe ato të Komunës së Fushë Kosovës. Ju kujtojmë se secili projekt i kësaj fushe është planifikuar duke u bazuar në parametra të ligjeve evropiane dhe duke iu përshtatur normave ekzistuese në vend, të dedikuara në këtë fushë”, thuhet në përgjigjen e Zyrës për Informim të Qeverisë së Kosovës.
Zona e caktuar për deponi rrethohet nga pjesa e banuar e Harilaqit dhe nga fshatrat Korroticë dhe Sllatinë.
