Arkitekturë
Dy studente ridizajnojnë sheshin e Ferizajt

Një pamje krejt tjetër e sheshit të Ferizajit, është paraqitur në një projekt ideor nga dy studentet e arkitekturës, Elsa Kameri dhe Elira Hadergjonaj.
Ato kanë finalizuar një projekt i cili parasheh një ndryshim të sheshit të tanishëm të qytetit të Ferizajt, në një hapësirë shumë më funksionale, por duke ruajtur elementet karakteristike të të vjetrës.
Për Ndërtimi.info, ato kanë treguar më detajisht për projektin, për të cilin punuan për 16 javë.
“Dizajni dhe organizimi i hapësirave të lira (gjelbërimi, shëtitoret etj., dhe definimi i funksioneve të ndryshme qe zhvillohen në hapësira te lira, u bënë gjithmonë duke ruajtur karakteristikat e të vjetrës duke i dhënë më shumë gjëra funksionale, dhe më shumë jetë, gjallëri”, thanë ato.

Projektin e bën të veçantë ndërlidhja e parkut me sheshin gjithashtu edhe dizajni i pllakave që ato kanë përdorur, në përpjekje që ta ndërlidhin me psikologjinë e njeriut, mënyrën se si njeriu ndjehet, përgjatë shëtitores.
“Për pllakat që kemi përdorur në objekt kemi studiuar edhe psikologjinë e figurave. Për shembull: Përdorimi i pllakave në formë të trekëndëshave na sugjeron paqëndrueshmëri por siguron drejtim. Katrorët japin një ndjenjë të stabilitetit dhe sigurisë”, shprehet Kameri.
Ajo shtoi se ky projekt synon të krijojë koncepte alternative që eksplorojnë përvojat estetike dhe imagjinative dhe marrëdhëniet midis njerëzve dhe hapësirave urbane.
“Vizioni është një hapësirë ë mire publike, ajo që pasqyron shumëllojshmërinë dhe inkurajon njerëzit të jetojnë së bashku, duke krijuar kushte të domosdoshme për qëndrueshmëri. Është vitaliteti i hapësirës që tërheq njerëzit, ajo që garanton këtë vitalitet dhe është mundësia për të shijuar hapësirat urbane në mënyra të ndryshme”, tha ajo.
Për finalizimin e projektit studentet si fillimin kemi analizuar gjendjen ekzistuese, kemi bërë edhe anketa me qytetarët me qëllim që t’i njohim problemet që hasin, me qëllim që kërkesat e tyre t’i paraqesin në projekt.
Projekti është menduar që t’i paraqitet Komunës ë Ferizajit në një të ardhme të afërt.





