Instituti Arkeologjik i Kosovës ka paraparë 12 projekte kapitale për këtë vit. Pos listës së këtyre projekteve – që janë të përfshira në Ligjin për buxhetin e këtij viti – ky institucion ka për detyrë që varësisht nga nevoja të bëjë edhe intervenime emergjente.

Por pavarësisht kohës së përshtatshme atmosferike gjatë muajit të kaluar, IAK-ja nuk ka nisur punën për gërmime arkeologjike e as për restaurime e konservime, shkruan sot “Koha Ditore”.

Institucioni është në hall me procedurat e pagesave ndaj furnitorëve prej të cilëve merr vegla e material tjetër për punë, por edhe ndaj punonjësve shtesë që angazhohen në projekte. Shkaku i mënyrës së kryerjes së pagesave nuk ka nisur realizmi i projekteve në terren.

IAK-ja nuk do që të përsëriten problemet e 2018-s. Deri në qershor të vitit të kaluar, institucionet e kulturës dhe ato të trashëgimisë kulturore në vartësi të Ministrisë së Kulturës kanë pasur llogaritë e veta financiare, nëpërmjet të të cilave kanë bërë pagesat për bashkëpunëtorë.

Llogaritë bankare në banka komerciale ishin cilësuar si të parregullta nga Zyra Kombëtare e Auditimit dhe ishin bllokuar atë muaj.

Shkaku i bllokimit të llogarive institucionale për dallim nga ato të kulturës, institucionet e trashëgimisë kulturore, sikurse është Instituti Arkeologjik i Kosovës, qysh prej gushtit e kanë pasur të pamundur funksionimin. Në fund të gushtit IAK-ja kishte ndërprerë punën në lokalitete të rëndësishme arkeologjike, siç janë Ulpiana e Dresniku. Ndërprerja ishte bërë në pamundësi për të paguar me kohë punonjësit e angazhuar. Në shtator ishte vendosur që të gjitha pagesat të bëheshin direkt nga Thesari, dhe procedura kërkon kohë më të gjatë.

Kalaja e Prizrenit, Kalaja e Harilaqit, Lokaliteti Ulpiana, Kalaja e Dardanës, Lokaliteti Dresnik, Kalaja e Novobërdës, Kalaja e Keqekollës, Kalaja e Marecit, Kalaja e Vuçakut, Kalaja e Korishit, Lokaliteti Arkeologjik në Barilevë e ai në Gllamnik, janë projektet për të cilat IAK-ja pret të nisë punën.

“Po presim një takim me ministrin e Kulturës, Kujtim Gashi, për të gjetur zgjidhje. Mendimi i arkeologëve dhe i imi është që derisa ne nuk e gjejmë mundësinë që të kompensojmë shpenzimet e terrenit për arkeologë dhe të paguhen njerëzit që angazhohen, të mos punojmë. Për këtë kemi bërë edhe shkresa”, ka thënë drejtori i Institutit Arkeologjik të Kosovës, Enver Rexha.