Aktuale
Drejtimi i GJEODEZISË nuk akreditohet në UP
Studentët që dëshirojnë të studiojnë në Fakultetin Juridik në Universitetin e Prishtinës “Hasan Prishtina”, nëse nuk do të ketë një vendim tjetër, nuk do të kenë mundësi të doktorojnë në njërën nga lëndët bazike të Juridikut e cila është “E Drejta Kushtetuese”.
KALLXO.com ka siguruar listën e degëve, departamenteve dhe programeve të UP-së të cilat kanë dështuar t’i kalojnë kriteret e Këshillit Shtetëror të Cilësisë, organ ky i cili akrediton programet studimore.
Gjithsej 24 programe të UP-së kanë dështuar t’i kalojnë kriteret e këtij Këshilli duke e ulur kështu numrin e programeve të akredituara në vetëm 122. Rrjedhimisht kushdo që kishte planifikuar të studionte Gazetari, Shkenca Politike, Gjeodezi apo Infermieri në Universitetin e Prishtinës, në vitin e ardhshëm akademik duhet të kërkojë zgjidhje të tjera nëse vendimet e Këshillit Shtetëror të Cilësisë mbesin në fuqi.
Në listë janë 13 programe të cilat nuk e kanë përmbushur kriterin e të pasurit tre ose katër doktorë shkence të fushës së ngushtë për një program studimi në nivelin Bachelor.
Ngjashëm edhe programet të cilat nuk patën një ose dy doktorë shkence për programet Master dhe tre profesorë të asocuar për programet e doktoratës.
E në total, 24 programe të studimit në Universitetin e Prishtinës ‘Hasan Prishtina’ nuk do të mund të pranojnë studentë të rinj në vitin e ri akademik.
Fakulteti i Bujqësisë dhe Veterinarisë
Në këtë fakultet nuk është akredituar programi i “Menaxhimit të biznesit në blegtori” në nivelin Bachelor i shkencës. Poashtu nuk është akredituar programi i ri “Shkenca e Ushqimit” në nivelin Master.
Ndërsa programet që u akredituan janë; “Ekonomia bujqësore” në nivelin Bachelor i shkencës, “Ekonomia e Bujqësisë dhe Ushqimit”, në nivelin Master i shkencës, “Lavërtari me perimtari’ në nivelin Master i shkencës, “Mbrojtje e Bimëve-Fitomedicinë” në nivelin Master i shkencës, “Mjekësi veterinare”, “Pemëtari me Vreshtari” në nivelin Master i shkencës, “Prodhimtaria bimore”, në nivelin Bachelor i shkencës, “Shkencat e aplikuara në Zootekni” në nivelin Master i shkencës, “Teknologji ushqimore me bioteknologji” në nivelin Bachelor i shkencës. Si program i ri në këtë fakultet është akredituar‘Bujqësi urbane’ në nivelin Master i shkencës.
Fakulteti i Ndërtimtarisë dhe Arkitekturës
Në këtë program, Këshilli ka vendosur që t’ia tërheqë akreditimin e programit “Gjeodezi” në nivelin Bachelor i shkencës.
Këtij fakulteti iu akredituan pesë programe, bëhet fjalë për programet ‘Arkitekturë’ në nivelin Master i shkencës, ‘Hidroteknikë’ në nivelin Bachelor i shkencës dhe Master i shkencës, ‘Ndërtimtari’ në nivelin Bachelor i shkencës dhe Master i shkencës.
Fakulteti Ekonomik
Në Fakultetin Ekonomik nuk është akredituar programi i “Marketingut” në tri nivelet.
Në këtë fakultet programi i cili u akreditua në tri nivelet Bachelor, Master dhe doktoratë është programi; “Banka, Financa dhe Kontabilitet”.
Programet e reja të këtij fakulteti janë “Ekonomi e Aplikuar dhe Menaxhment” (gjuhë angleze) në nivelin Bachelor i shkencës, “Ekonomiks” (në gjuhën angleze) në nivelin Master i shkencës dhe doktoratë, “Kontabilitet” në nivelin Bachelor i shkencës, “Ekonomi” në nivelin Master i shkencës, “Menaxhment” në nivelin Bachelor i shkencës, Master i shkencës dhe doktoratë. Ndërkaq, programi “Economics” në nivelin Bachelor u shty për t’u shqyrtuar në mbledhjen e 4 shkurtit 2019.
Fakulteti i Edukimit
Në Fakultetin e Edukimit janë tërhequr akreditimet për “Pedagogji e përgjithshme” në nivelin Bachelor, “Programi fillor” në nivelin Bachelor, “Programi parashkollor” në nivelin Bachelor, “Udhëheqja në arsim” në nivelin Master, “Edukim’ në nivelin doktoratë dhe “Edukim dhe zhvillim në fëmijërinë e hershme (0-3)” në nivelin Bachelor.
KSHC akreditoi gjashtë programe të këtij fakulteti, duke filluar me programin “Master i edukimit inkluziv” në nivelin Master, “Master i mësimdhënies lëndore” në nivelin Master, “Master i pedagogjisë për shkolla profesionale”, në nivelin Master, “Mësimdhënia dhe kurrikulat” në nivelin Master, “Mësimdhënie në gjuhë dhe letërsi shqipe” në nivelin Master profesional dhe “Pedagogji” në nivelin Master i shkencës.
Fakulteti i Inxhinierisë Elektrike dhe Kompjuterike
Njëra nga fakultetet që të gjitha programet janë akredituar është ai i Inxhinierisë Elektrike dhe Kompjuterike.
Tetë programe u akredituan nga KShC-ja në këtë fakultet, pra janë programet “Automatikë e kompjuterizuar dhe Robotikë” në nivelin Bachelor i shkencës, “Elektroenergjetikë” në nivelin Bachelor i shkencës, “Elektronikë” në nivelin Bachelor i shkencës dhe Master i shkencës, “Inxhinieri kompjuterike” në nivelin Bachelor i shkencës dhe Master i shkencës, “Telekomunikacion” në nivelin Bachelor i shkencës dhe Master i shkencës.
Në këtë fakultet janë akredituar edhe programet e reja “Inxhinieri e Ambientit” në nivelin Bachelor i shkencës, “Gjeodezi’” në nivelin Master i shkencës dhe programi “Efiçienca e energjisë” në nivelin Master profesional.
Fakulteti Juridik
Njëra nga programet bazike të juridikut “E drejta kushtetuese dhe administrative” në nivelin doktor i shkencës nuk është akredituar. Poashtu “E drejta financiare” në doktoratë nuk ka kaluar filtrin e akreditimit.
Tetë programeve të Juridikut që KShC ua dha dritën e gjelbër për akreditim janë; “E drejta civile dhe pronësore”, “E drejta financiare”, “E drejta kushtetuese administrative”, “E drejta ndërkombëtare” në nivelin Bachelor i shkencës dhe doktoratë, “E drejta penale”, “Juridik’”, “Kontrata dhe e drejta komerciale”.
Si programe të reja këtij fakulteti iu aprovuan, “E drejta Penale” dhe “E drejta civile” në nivelin e doktoratës.
Fakulteti i Shkencave Matematike Natyrore
Në FShMN të gjitha programet janë akredituar:“Biologji” në nivelin Bachelor i shkencës, “Biologji e organizmave dhe ekologji” në nivelin doktoratë, “Ekologji dhe mbrojtje e mjedisit” në nivelin Bachelor i shkencës dhe Master i shkencës, “Fizikë” në nivelin Bachelor i shkencës dhe Master i shkencës, “Gjeografi” në nivelin Bachelor i shkencës dhe Master i shkencës, “Kimi” në nivelin Bachelor i shkencës dhe doktoratë, “Kimi analitike dhe mjedis” në nivelin Master i shkencës, “Kimi fizike dhe inorganike” në nivelin Master i shkencës, “Kimi Inxhinierike” në nivelin Bachelor i shkencës, “Kimi organike” në nivelin Master i shkencës, “Matematikë financiare në banka dhe sigurime” në nivelin Bachelor i shkencës, “Shkenca kompjuterike” në nivelin Bachelor i shkencës.
Programe të reja për këtë fakultet KShC aprovoi “Biologji” në nivelin Master i shkencës, si dhe programin “Matematikë” në nivelin Bachelor i shkencës dhe Master i shkencës.
Fakulteti i Inxhinierisë Mekanike
Në këtë fakultet dy programe nuk kanë kaluar filtrin e akreditimit, “Inxhinieri industriale dhe menaxhment” në nivelin Bachelor i shkencës dhe “Komunikacion rrugor” në nivelin Master i shkencës.
KShC akreditoi programet “Komunikacion dhe transport” në nivelin Bachelor i shkencës, “Mekatronikë” në nivelin Bachelor i shkencës dhe Master i shkencës, “Prodhimtari dhe inxhinieri industriale me menaxhment” në nivelin Master i shkencës, “Prodhimtari dhe automatizëm” në nivelin Bachelor i shkencës, “Termoenergjetika dhe energjia e Ripërtrishme” në nivelin Bachelor i shkencës dhe Master i shkencës.
Në këtë fakultet është akredituar programi i ri “Ndërtimi dhe mekanizmat” në nivelin Bachelor i shkencës.
Fakulteti i Mjekësisë
Në Fakultetin e Mjekësisë programet që nuk janë akredituar janë ai i “Infermierisë”, Studime të doktoratës në “Farmac” në nivelin doktoratë dhe “Mami” në nivelin Bachelor i shkencës.
Ndërsa janë akredituar dhjetë programe të këtij fakulteti në këto nivele; “Biomjekësi eksperimentale” në nivelin doktoratë, “Edukim në kujdesin shëndetësor” në nivelin Master i shkencës, “Farmaci” në nivelin Master i integruar, “Fizioterapi” në nivelin Bachelor i shkencës, “Mjekësi e përgjithshme” në nivelin Doktor mjekësor, “Mjekësi klinike” në nivelin e doktoratës, “Mjekësi paraklinike” në nivelin e doktoratës, “Shëndeti publik” në nivelin e doktoratës, “Stomatologji” në nivelin e doktoratës dhe doktor dental.
Fakulteti Filologjik
Në Fakultetin Filologjik ka ndodhur një rast interesant ku niveli bazik për Gazetari nuk është akredituar ndërsa programi për Master ka marrë akreditimin. Në proces është refuzuar edhe programi Orientalistikë: Studime kulturore orientale’ në nivelin Master.
KShC vendosi që të akreditoi këto programe; “Gjuhë dhe letërsi angleze” në nivelin Bachelor dhe Master, “Gjuhë dhe letërsi frënge” në nivelin Bachelor, “Gjuhë dhe letërsi gjermane” në nivelin Bachelor dhe Master, “Gjuhë dhe letërsi turke” në nivelin Bachelor, “Gjuhë shqipe” në nivelin Bachelor dhe Master, “Gjuhësi” në nivelin e doktoratës, “Letërsi” në nivelin e doktoratës, “Letërsi shqipe” në nivelin Bachelor dhe Master, “Orientalistikë” në nivelin Bachelor.
Në këtë fakultet programet e reja që u akredituan janë; “Gazetari dhe marrëdhënie me publikun” në nivelin Master, “Gjuhë dhe letërsi frënge” në nivelin Master, si dhe “Gjuhë dhe letërsi turke” në nivelin Master.
Fakulteti Filozofik
Në Fakultetin Filozofik programet me numrin më të madh të studentëve nuk kanë kaluar filtrin e akreditimeve. Programet që s’u akredituan janë “Psikologji” në nivelin Bachelor, dhe “Shkenca politike” në nivelin Bachelor. Akreditimin nuk e ka kaluar as programi i Masterit për “Arkivist”.
KSHC akreditoi programet “Antropologji” në nivelin Bachelor, “Filozofi” në nivelin Bachelor dhe Master, “Histori” në nivelin Bachelor dhe doktoratë, “Histori e kohës moderne” në nivelin Master, “Integrime evropiane dhe administratë publike” në nivelin Master, “Psikologji shkollore dhe këshillim” në nivelin Master, “Punë sociale” në nivelin Bachelor, “Sociologji” në nivelin Bachelor dhe Master.
Në këtë fakultet janë aprovuar dy programe të reja të këtij fakulteti, bëhet fjalë për “Marrëdhënie ndërkombëtare dhe diplomaci” në nivelin Master, si dhe “Psikologji komuniteti dhe klinike” në nivelin Master.
Fakulteti i Edukimit Fizik dhe Sportit
Programet që u akredituan janë ‘Edukim fizik dhe sport’ në nivelin Bachelor dhe Master, ‘Trajner sportiv’ në nivelin Master.
Fakulteti i Arteve – Të gjitha programet u shtynë për mbledhjen e ardhshme e cila do të mbahet me 4 shkurt.
Historia e akreditimeve
Këshilli Shtetëror i Cilësisë në kuadër të Agjencisë së Kosovës për Akreditim u mblodh në janar të këtij viti për të vendosur për akreditimin e programeve të reja, riakreditimin dhe tërheqjen e tyre në universitetet publike dhe private, e mes tyre edhe për Universitetin e Prishtinës “Hasan Prishtina”.
Gjatë kësaj mbledhje, KShC akreditoi 98 programe studimore valide dhe i tërhoqi 13 të tjera UP-së, ndërsa në fazën fillestare të vlerësimit të aplikacioneve, UP-ja kishte marrë dritën e gjelbër për 23 programe të reja, mirëpo iu refuzuan 11 të tjera.
Arsyeja e tërheqjes dhe refuzimit për akreditim të programeve studimore nga KShC-ja kryesisht ishte nga mungesa e doktorantëve të fushës së ngushtë të këtyre programeve.
Por edhe në rast mosakreditimi, universiteti mund të aplikojë përsëri për akreditimin e këtyre programeve siç thuhet tutje në Ligjin për Arsimin e Lartë, konkretisht në Nenin 15 ‘Akreditimi dhe vlerësimi i cilësisë’, pika 6 e cila thotë se “Nëse një bartës i licencuar i arsimit të lartë nuk arrin të fitojë akreditimin apo riakreditimin institucional, kjo do të rezultojë me një organizim tjetër të akreditimit jo më vonë se pas një viti.”
Agjencia Kosovare për Akreditim, kishte vendosur që t’i japë edhe dy javë kohë, 41 profesorëve të UP-së të cilët kanë pasur probleme teknike për t’u bërë pjesë e sistemit online ‘e-Akreditimi’, përmes të cilit mund të gjenden të dhëna për stafin akademik të secilit universitet publik apo privat. AKA kishte njoftuar KShC-në se problem të tillë kanë pasur vetëm profesorët e UP-së.
Sipas udhëzimit administrativ në Nenin 30 tek ‘Deklarimi i stafit akademik për angazhim’ në pikën 1 thuhet se “Institucionet e Arsimit të Lartë duhet të dorëzojnë deklaratat e stafit akademik të angazhuar jo më larg se data 31 tetor.”
Gjatë procesit të verifikimit, KShC ka shqyrtuar dokumentacionin e profesorëve të cilët kishin deklaruar të dhënat e tyre në këtë platformë sepse në Nenin 30, pika 3 thuhet se “Vetëm stafi akademik i deklaruar dhe aprovuar nga AKA, do të konsiderohet në procesin e akreditimit/riakreditimit për vitin pasues akademik dhe stafi akademik i deklaruar dhe aprovuar nga AKA për programet ekzistuese në kuadër të procesit të monitorimit”.
Shembull i tërheqjes së akreditimit si program studimor në UP është “Udhëheqja në Arsim”, në Fakultetin e Edukimit në nivelin Master dhe kjo për arsye se dy bartësit e këtij programi kishin doktoratë në fushën e “Historisë” dhe “Psikologjisë”.
Shembull tjetër është edhe programi “Pedagogji e përgjithshme” në nivelin Bachelor, të po të njëjtit fakultet, bartësit e të cilit kishin doktoratë në fushën e “Shkencave ekonomike” dhe “Shkencave të sportit”.
Programit “Shkenca politike” në Fakultetin Filozofik në nivelin Bachelor, i është tërhequr akreditimi për shkak se bartësit e këtij programi kishin doktoratë në fushën e “Historisë” dhe “Filozofisë”.
Fakulteti i Edukimit është njëri ndër fakultetet më të dëmtuara të UP-së, në këtë proces të akreditimit sepse i janë tërhequr katër programe.
Ndërsa fakultetet që në këtë proces të vlerësimit kanë hyrë dhe kanë dalur me të njëjtat programe, janë Fakulteti i Inxhinierisë Elektrike dhe Kompjuterike, si dhe Fakulteti i Shkencave Matematike Natyrore.
Këto vendime të KShC-së, shtyrën gjashtë rektorët e universiteteve publike që të dalin me një deklaratë të përbashkët, e mes tyre edhe rektori i UP-së Marjan Dema, të cilët kërkuan që të shkarkohen anëtarët e KShC-së dhe të shfuqizohen vendimet e tyre, me arsyetimin se KShC kishte favorizuar universitetet private në krahasim me ato publike, dhe se vendimet për tërheqje dhe refuzim të akreditimit kishin si prapavijë ‘politikën’ e ministrit të Arsimit, Shyqiri Bytyqi për mbylljen e universiteteve të reja publike.
Pas kësaj deklarate nga Konferenca e Rektorëve, KShC kishte reaguar ndaj tyre duke iu thënë se s’kishin plotësuar kriteret, andaj edhe kishin dhënë nga një shembull për secilin nga këto universitete se përse nuk iu ishin akredituar ato programe.
‘Lufta’ e rektorëve vazhdoi edhe më tutje në Komisionin parlamentar për Arsim në të cilin kërkuan që të plotësohen kërkesat e tyre, por nuk gjetën mirëkuptim.
Ky komision u takua edhe me KShC-në për të kërkuar sqarime rreth vendimeve të tyre, por anëtarët e KShC-së kërkuan që këto universitete të dërgojnë ankesa në Komisionin për Ankesa në AKA nëse mendojnë që janë bërë shkelje.
Pas takimit që patën KShC-ja me Shefen e Zyrës së BE-së në Kosovë, Nataliya Apostolova ku ajo u ofroi mbështetje anëtarëve të Këshillit në vendimet e tyre, Konferenca e Rektorëve njoftoi se që nga 29 janari do të jenë në grevë të përgjithshme deri në plotësimin e kërkesave të tyre, ku mes tjerash shtuan edhe kërkesën për shkarkimin e ministrit të Arsimit, Shyqiri Bytyqi.
Përveç Shefes së Zyrës së BE-së në Kosovë, Këshillin Shtetëror të Cilësisë po e mbështetë edhe ambasadori i ShBA-së në Kosovë, Philip Kosnett, i Britanisë së Madhe, Ruairi O’Connell dhe ai i Gjermanisë, Christian Heldt.
KALLXO.com ka raportuar në vazhdimësi për zhvillimet që kanë rezultuar nga mbledhja e 61-të e Këshillit Shtetëror të Cilësisë, vendimet e të cilit ngritën reagime të shumta.
Aktuale
Deodorantë, shishe uji plastike…: Çfarë nuk duhet të lini në vetura në ditët e nxehta?
Dielli dhe nxehtësia kanë një efekt shkatërrues në disa gjëra që përdorim dhe nuk është e mençur t’i lëmë në vetura.
Duket e arsyeshme të mbani një shishe me ujë në veturën tuaj gjatë një vale të nxehtë. Megjithatë, bisfenoli A dhe ftalat në plastikë, kimikate që veprojnë si lidhës dhe e bëjnë plastikën fleksibël, po shkaktojnë shqetësim tek ekspertët që studiojnë efektet e tyre në shëndetin e njeriut. Lënia e ujit në shishe plastike në një makinë të nxehtë mund të bëjë që këto substanca të lëshohen në ujë, shkruan The Sunday Times.
Nxehtësia e madhe në vetura mund të dëmtojë bateritë e të gjitha pajisjeve që i përdorin, që nga kompjuteri, celularët… Ka edhe shishe me krem kundër diellit, të cilat nuk duhet t’i lini në diell (një paradoks interesant, apo jo?) sepse në disa raste mund të shpërthejnë. Më pas janë të gjitha spërkatjet, nga deodoranti tek llaku i flokëve. Kur temperatura arrin rreth 48 gradë Celsius, presioni në rezervuar rritet mjaftueshëm për të shkaktuar një shpërthim, thonë ekspertët. Kornizat plastike të syzeve të diellit mund të shtrembërohen dhe zbardhen, dhe lentet mund të shtrembërohen.
Disa ilaçe, si antibiotikët, duhen mbajtur në frigorifer. Ilaçet në përgjithësi nuk e tolerojnë nxehtësinë dhe disa prej tyre do të bëhen të papërdorshme pas ekspozimit ndaj temperaturave jashtëzakonisht të larta. Nëse përdorni injeksione adrenaline, dobia e tyre zhduket në automjetet e nxehta. E cila, natyrisht, është çështje jete ose vdekjeje.
Buzëkuqi do të shkrihet në temperatura të larta.
Është dokumentuar se kanaçet e gazrave mund të shpërthejnë kur ekspozohen ndaj nxehtësisë ekstreme. Edhe lëngu i portokallit mund të shpërthejë nëse lihet në makinë për një kohë të gjatë, dhe kjo do të thotë një brendshme ngjitëse…
Lënia e çakmakut të disponueshëm në makina në ditët e nxehta nuk është një ide e zgjuar. Shpërthimi i tyre mund të shkaktojë dëme të mëdha dhe madje të thyejë xhamin e përparmë./Media Ndërtimi
Aktuale
Themelohet Oda e Minierave të Kosovës
Me ceremoni të mërkurën është bërë hapja e Odës së Minierave të Kosovës që u konsiderua një hap tejet i rëndësishëm për zhvillimin ekonomik, raporton Ekonomia Online.
Themeluesi, Mentor Demi, ka thënë se kjo ceremoni është një hap shumë i rëndësishëm në drejtim të zhvillimit të industrisë së minierave në Kosovë.
Alaudin Kodra, anëtar i Bordit në Odën e Minierave të Kosovës, ka thënë se gjeologjia e Kosovës, është e pasur dhe pikërisht kjo ka qenë një nga arsyet e fillimit të tij për punuar në Kosovë.
“Ligji minerar është ligj i mrekullueshëm i cilësisë së lartë për dallim nga. Pjesa perëndimore e Kosovës është një vazhdimësi e gjeologjisë së Shqipërisë. Kosovës i duhen kompani serioze, dua të iu urojë gjithë të mirat të keni suksese”, ka thënë nder tjera Kodra.
Zëvendësministri i Industrisë, Sipërmarrjes dhe Tregtisë, Mentor Arifaj, ka thënë se kontributi i madh për të ardhur deri te hapja e Odës është për tu vlerësuar.
“Do ta luajë një rol ndërmjet një katalizatori i akterëve të shumtë dhe investitorëve potencial qoftë vendor apo ndërkombëtarë. Oda do ta luajë një rol të rëndësishëm në kuptimin e avancimit duke përfshirë njësi të ndryshme në arenën ndërkombëtare në sektorin e minierave”, ka thënë ai.
Nurten Deva, Rektor i Universitetit Isa Boletini, ka thënë se zhvillimi i industrisë minerare ka një rol të rëndësishëm në zhvillimin ekonomik.
“E përgëzojë zotëri Demin për guximin që ka ndërmarrë një hap të tillë për themelimin e një odë nga privatët. Nuk e kanë pas mbështetjen e duhur për të arritur vizionin në planet e tyre strategjike”, ka thënë Deva. Andor Lips, Drejtori jo-ekzekutiv në Western Tethyan Resources, ka thënë se Osat kanë shumë të rëndësishme si një lloj urë lidhëse në mes të investitorëve të huaj dhe institucioneve shtetërore./Media Ndërtimi
Aktuale
Gjykata e Apelit anulon vendimin për ndërtimin e hidrocentralit të Poçemit në Vjosë
Pas 10 vitesh nëpër procese gjyqsore, banorët e Mallakastrës fituan të parën betejë ligjore për çështjet mjedisore në vendin tonë. Gjykata Administrative e Apelit në Tiranë anuloi të mërkurën vendimin për ndërtimin e hidrocentralit Poçem në lumin Vjosa. Gjykata i dha të drejtë banorëve dhe organizatave mjedisore, duke konfirmuar aktvendimin e plotë të shkallës së parë dhe argumentet e tij në mbështetje të pretendimeve të paditësve.
Vendimi shënon fitoren përfundimtare të çështjes së parë mjedisore të trajtuar nga Gjykata në Shqipëri.
Beteja ligjore ka nisur në dhjetor të vitit 2016 nga EcoAlbania, EuroNatur dhe Riverwatch, së bashku me 38 banorë të fshatit Kutë në Mallakastër. Ata kundërshtuan ndërtimin e hidrocentralit të Poçemit, duke pretenduar se “procedurat e ndjekura për dhënien e kontratës koncensionare si dhe procesi i konsultimeve me publikun, ishin zhvilluar në shkelje të legjislacionit shqiptar dhe të konventave ndërkombëtare”.
Banorët dhe organizatat fituan betejën e parë në maj të 2017, kur Gjykata Administrative e Shkallës së Parë vendosi në favor të tyre.
Palët e paditura janë Ministria e Mjedisit, Agjencia Kombëtare e Mjedisit, Avokati i Shtetit (në emër të Ministrisë së Energjisë) dhe shoqëria koncesionare (Kovlu Energy), të cilat apeluan vendimin e Gjykatës Administrative të Shkallës së Parë.
Pas 8 vitesh Gjykata e Apelit ka vendosur të rrëzojë padinë e tyre dhe të lërë në fuqi vendimin e Gjykatës Administrative të Shkallës së Parë.
Ndërkohë që vijonte kjo betje ligjore, banorë dhe organizata mjedisore si EcoAlbania nisën fushatën në mbrojtje të lumit Vjosa “Të shpëtojmë zemrën blu të Evropës”.
Pas një beteje të gjatë, në Mars 2023, lumi Vjosa dhe degët e tij Drino, Bënça, Shushica dhe Kardhiqi, u shpallën Park Kombëtar duke ofruar mbrojtje ligjore edhe nga 45 hidrocentralet e planifikura për t’u ndërtuar në gjithë basenin e Vjosës.
Drejtues i Eco Albania Olsi Nika në një reagim për mediat tha se “edhe pse ky vendim vjen në një tjetër realitet, pas shpalljes së Parkut Kombëtar të Vjosës, ne e konsiderojmë si një arritje për komunitetin, aktivistët dhe avokatët e angazhuar në mbrojtjen e lumit Vjosa, të cilët e kanë ndjekur këtë çështje me rigorozitet dhe vendosmëri”.
Hidrocentrali i Poçemit, ishte aktpadia e parë e një çështjeje mjedisore në Gjykatën Administrative në Shqipëri. Ajo i hapi rrugën shumë çështjeve të tjera mjedisore të ngritura nga organizatat dhe banorët për të kërkuar të drejtën për ruajtjen e pasurive natyrore të vendit.
Avokati i çështjes Vladimir Meçi tha se vendimi përfundimtar përbën një arritje në ndërtimin e praktikës gjyqësore administrative që lidhet me te drejtën mjedisore në Shqipëri.
“E gjithë ecuria e çështjes së kundërshtimit të ndërtimit të HEC-it të Poçemit në rrugë gjyqësore, është një model pioner për të gjithë ata që kanë qenë pjesë e tij, përfshirë Organizatat, komunitetin, ne avokatët por edhe vetë gjykatën”, tha Meçi./Mediqa Ndërtimi
“Kulla s’asht cool”-qytetarët e Shkodrës po protestojnë kundër ndërtimit të objektit 35 katesh
Si Vladimir Putin krijoi një ‘flluskë’ të pasurive të paluajtshme
Kinezët dhe turqit “gëzojnë” koncesionin e bakrit në Shqipëri
Deodorantë, shishe uji plastike…: Çfarë nuk duhet të lini në vetura në ditët e nxehta?
Një autostradë dixhitale do të ndërtohet mes Tokës dhe Hënës
Develon prezanton ekskavatorin tunelues DX235RTF-7
Liebherr blen 119 hektarë në SHBA për të ndërtuar një qendër logjistike
Epiroc përballet me sfida në tregun e ndërtimit
India do të shpenzojë 132 miliardë dollarë në infrastrukturë
Bulevardi i palmave dhe agrumeve në Vlorë, 3.4 milion euro për projektin
Ndërtuesi thotë se i përfundoi punët sipas kontratës te ‘Prishtina e Re’, 40 familje të një kompleksi mohojnë këtë, mbesin pa kushte jetese
Në Kosovë po prodhohen shtëpi të gatshme me beton të parafabrikuar [video]
Agroturizmi më i madh në Ballkan ndërtohet në Suharekë
Këto janë 5 kompanitë ndërtimore më të mëdha në Prishtinë, prinë Marigona Hill
Kush po i pengon hetimet në rastin “Brezovica” ku u sekuestruan 75 villa
Pa e shkatërruar natyrën, lagjja Area34 vjen me shumë kasolla në liqenin e Batllavës
Rruga A del këtë javë në tenderim, do të ketë gjashtë korsi
Lëndohen dy punëtor të ndërtimit pas rrëzimit të një plloçe në Kaçanik
Kompania kosovare “FORMON” krijon ventilatorë të frymëmarrjes
