Në fillim të muajit gusht, u ndërpre qarkullimi i trenave në linjën e Pejës dhe atë të Hanit të Elezit, për shkak të mungesës së mjeteve financiare, të cilat është dashur të sigurohen nga Qeveria e Kosovës.

Ky kolaps i hekurudhave në Kosovë do të vazhdojë deri atëherë kur qeveria të rishikojë buxhetin për vitin 2017-të, por për të cilën nuk ka ndonjë kohë të caktuar.

E vetmja situatë që dihet për hekurudhat është projekti i Ministrisë së Infrastrukturës me BERZHIN-in për bërjen e hekurudhave nga Hani i Elezit në Leposaviq, si dhe nga Fushë Kosova në Aeroport.

Ministri i Ministrisë së Infrastrukturës, Hanefi Muharremi, është shprehur se ky projekt është projekt kapital për Kosovën, raporton Ndertimi.info.

Procedurat e kësaj marrëveshje pritet përfundojnë brenda vitit.

“Gjitha këto marrëveshje janë kryer, pritet të kuptohet që kjo punë  do të jetë me një kredi të butë dhe me përfundimin e procedurave të cilat kemi filluar atëherë do të fillojnë edhe procedurat të ndërtimit të kësaj. Ky është projekt shumë kapital për Kosovën”, tha ministri.

Në këtë projekt ministria po hasë në disa pengesa, e kjo është ndërtimi i hekurudhës nëntokësore në Ferizaj.

“Në këtë projekt që kemi ne një pengesë, është pengesa në Ferizaj që rishtas kemi kërkuar që me sugjerim të kryetarit të Ferizajt që aty të bëhet ndërtimi i hekurudhës nëntokësore në mënyrë që të largohen trenat që tash për tash qarkohen në mes të qytetit. Ajo kërkon një kosto më të madh. Por sidoqoftë besoj që do kryhet edhe kjo punë dhe pastaj fillohet edhe me zbatimin e projektit”, tregon Muharremi.

Me ndërtimin e këtyre hekurudhave, sipas Muharremit transporti do të jetë më i lehtë dhe më i shpejtë.

Muharremi ka theksuar edhe problemin e Trainkos, ku ka thënë se me këtë rast është dashur që me rishikim të buxhetit të subvencionohen mjetet me të cilat kanë nevojë.

Por e gjithë problemi tani është në duar e bërjes së Qeverisë, e cila më pas do të rishikojë buxhetin.

Megjithatë, Muharremi është shprehur i shqetësuar me këtë situatë, duke shtuar se minsitria të cilën ai drejton nuk mund të bëjë asgjë që Trainkos të vazhdoj punën sipas planit të tij.

“Trainkos nuk ka mjete të mjaftueshme për me zhvillu atë transportin deri tash që e ka pas të rregullt, për arsyeje që i mungojnë mjetet. Ne e kemi pas një marrëveshje me ta që mjetet që janë dhënë për zhvillimin e transportit të hekurudhave me subvencion ta vazhdojnë punën, ato mjete janë shpenzu, të ardhura ka më pak dhe ka mbet si ka mbet, por kjo është dashtë që në kushte normale me rishikim të buxhetit të subvencionohen me mjete që kanë nevojë. Por meqenëse është si është situata edhe rishikimi i buxhetit nuk po mund të ndodhë, janë në një problema ta por jemi edhe na të shqetësuar që nuk po mundemi me i ndihmu që të vazhdojnë punën ashtu si i kanë në planet e tyre”, është shprehur Muharremi.

Tani për tani e vetmja linjë hekurudhore që është në operim, në transportin e udhëtarëve, mbetet ajo Prishtinë – Shkup dhe anasjelltas.

Sidoqoftë, bordi i drejtorëve dhe menaxhmentit i “Infrakos”-it (që merret me menaxhimin e hekurudhave), kanë kërkuar nga institucionet kompetente shtetërore pagesën e diferencës.

Pagesa e kësaj diference, siç thonë përfaqësuesit e ‘”Infrakos”-it, është e përcaktuar me Ligjin mbi hekurudhat e Kosovës, ku në vit kap vlerën rreth 1.8 milion euro.

Por, sipas zyrtarëve të “Infrakos”-it edhe përkundër kërkesave, nuk kanë marrë asnjëherë pagesën e duhur të paraparë me ligj.

Ndalja e qarkullimit të trenave në relacionet Prishtinë – Pejë dhe Prishtinë – Han i Elezit nga kompania publike “Trainkos” ka sjellë në gjendje të rëndë edhe kompaninë publike që menaxhon me rrjetin hekurudhor, “Infrakos”. Këta të fundit ditë më parë patën deklaruar se do të kenë vështirësi në sigurimin e pagave për punëtorët gjatë muajit gusht.