“O Danjel, o hero, gjithë unaza ty të do”, kështu ka nisur edhe protesta pasditen e djeshme në Unazën e Re, ku qindra banorë brohorisnin për Danjeli Drobaj, 18-vjeçarin i cili akuzohet se gjymtoi efektiven e policisë.

Ata i bënë thirrje kryeprokurores Arta Markut që të bëjë drejtësi për këta fëmijë, pasi u ndëshkuan dhe u dhunuan nga policia, vetëm se po mbronin banesat e tyre. Kështu është shprehur një banorë në protestë mbrëmë.

“Danjeli është një fëmijë vetëm 18 vjeç, por policia kriminale i kishte thyer gishtat e dorës. Turp, turp, turp! I bëj thirrje kryeprokurores, që të bëjë drejtësi për ata fëmijë që janë të pafajshëm, që po mbrojnë folenë e tyre. I bëj thirrje qeverisë, që për 40 milionë euro, po flakë 2 mijë banorë, po flakë ato dallëndyshet tona që kemi nëpër shtëpi. Kurrën e kurrës nuk ka për t’ia arritur këtij qëllimi. Shtëpitë tona do t’i mbrojmë me gjak”, ndërsa njëzëri protestuesit brohorisnin: “Danjel, t’i je hero, gjithë unaza ty të do”.

Po ashtu, protestuesit e revoltuar i bënë thirrje qytetarëve të Unazës së Madhe, që të mos mashtrohen nga premtimet boshe të grupeve të ARRS-së, të cilat drejtohen me urdhrat e Afrim Qendros dhe Edi Ramës, pasi kanë qëllim për të përçarë këta banore, dhe se nuk kanë asnjë lekë për t’ju ofruar, asgjë në këmbim.

“Kam një thirrje për të gjithë banorët e Unazës së Re: ju lutem shumë, mos pranoni grupet e ARRSH-së nëpër shtëpi. Mos ua hapni dyert, janë grupe të mashtrimit! Sot kishin ardhur të shoqëruar me qindra policë. Mos ua hapni dyert. Vetëm tradhtarët e kauzës tonë hapin dyert për njerëz të tillë. Ato grupe kanë qëllim për të na përçarë. Asnjë lekë nuk kanë Afrim Qëndro dhe Edvin Rama për t’i dhënë askujt. Prandaj mos u mashtroni”, tha një tjetër banor i Unazës së Madhe.

Së fundmi, njëri prej 11 protestuesit e arrestuar gjatë fjalës së tij, tha se është e kotë që t’i bëjmë thirrje kryeministrit apo kryebashkiakut Veliaj për ndihmë, pasi ata nuk e duan popullin e tyre, por e urrejnë dhe e diskriminojnë atë.

“Unë jam njëri prej 11 të arrestuarve. Nuk besoj se ka kohë për të folur për politikë. Është një moment, që të gjithë e dimë që nesër familja do të dalë në rrugë. Është shumë e thjeshtë: Më mirë t’i nxjerrim familjet në rrugë, para se të na nxjerrin. Unë nuk e di, sesi njerëzit i bëjnë thirrje një kryebashkiaku, që mbjellë urrejtje për popullin, nga jugu apo nga veriu. Nuk e di, sesi një kryeministër i thotë popullit, se ju nxjerr në rrugë familjarisht, dhe nuk iu jap asnjë kokërr leku. Kjo është një masakër, që bëhet ditën për diell”.

Peticioni Kryeprokurores

Banorët që preken nga projekti i ‘Unazës së Madhe’ nënshkruan dje, gjatë protestës një peticion për t’ia dërguar kryeprokurores Arta Marku dhe Presidentit Ilir Meta. Ata shprehen të shqetësuar për vendimin që ka marrë bashkia dhe qeveria në lidhje me fatin e këtyre banorëve, prandaj shumë të tensionuar i bënë thirrje që të ndërpresë punimet në këtë aks rrugë, ku prekën ndërtesat dhe bizneset e tyre.

Po ashtu mësohet se banorët në peticionin e tyre kanë kërkuar lirimin e personave të arrestuar gjatë protestës që ndodhi para Kuvendit. Banorët edhe dje, në ditën e 23 të protestës kanë kundërshtuar projektin për ndërtimin e Unazës së Madhe, duke bllokuar edhe rrugën.

Largimi i ARRSH

Kujtojmë, se një protestë agresive e banorëve të “Astirit” paraditen e djeshme ka agravuar deri në përleshje mes protestuesve dhe policisë bashkiake, pasi këta të fundit kanë hequr ndriçimin publik. Por tentativat e tyre kanë dështuar, pasi banorët janë vërsulur për t’i ndaluar ata në vijimin e aktivitetit të tyre keqbërës, siç ata e konsiderojnë gjithë projektin. Ndërkohë, që policia ka nisur rrethimin dhe është munduar që të ndalojë protestuesit që të mos pengojnë policinë bashkiake të vijojë punën e urdhëruar nga ARRSH-ja. Mes protestuesve janë dëgjuar thirrje “Turp, turp!”, drejtuar punonjësve të bashkisë. Gjithçka ka ndodhur në mes të shiut dhe një trafiku rrugor të rënduar.

Prishen natën dy shtëpi tek Unaza e Re

Mbrëmë ka nisur prishja e shtëpive të para në Unazën e Re nga Inspektorati i Mbrojtjes së Territorit dhe Bashkia Tiranë. Njoftimin e ka bërë të ditur kryebashkiaku i Tiranës, Erion Veliaj, i cili deklaron se familjet janë larguar me dëshirë. “Mirënjohje 2 familjeve të para që pranuan sonte prishjen e 2 banesave pa leje në ‘Unazën e Re’ në shkëmbim të banesave sociale. Më mirë për ato të 2-ja e më mirë për 200 mijë shoferë që do kenë ‘Unazën’. Një qytet që s’ka të humbur e që s’e lejon politikën të përdorë! FORCA!”, shkruan kryebashkiaku Veliaj në postimin e tij. Ndërkaq, IKMT ka shpërndarë fotot ku duken makineritë e rënda duke shembur ndërtimet dhe duke zhvendosur atë që mbetej pas prishjes. Ndërkaq, Autoriteti Rrugor Shqiptar ishte dje, në terren për vlerësimin e banesave të atyre që kanë depozituar tanimë dosjet dhe dokumentet e pronësisë pranë këtij institucioni. Sipas ARRSH, gjatë ditës së djeshme, u bë e mundur që në të tre lotet të kryhet verifikimi i 17 objekteve, ose thënë ndryshe 31% e totalit të atyre që deri më tani kanë dorëzuar dokumentet në ARRSH. Ndërkaq, ARRSH deklaron se në ditët e ardhshme do të vazhdojë ky proces verifikimi për të gjithë banorët që kanë depozituar dosjet në këtë institucion. “U bëjmë thirrje edhe banorëve të tjerë që disponojnë dokumente pronësie t’i depozitojnë ato sa më shpejt pranë zyrave përkatëse në Autoritetin Rrugor në mënyrë që të vazhdohet pa vonesa me vlerësimin, evidentimin, bërjen gati të Vendimit të Këshillit të Ministrave për procedurën e shpronësimit të tyre. Procesi i verifikimit dhe vlerësimit të pronave për procedurën e shpronësimit është një detyrim ligjor i Autoritetit Rrugor Shqiptar. Rrjedhimisht, çdo përpjekje për të penguar këtë proces përbën pengim të punonjësve shtetërore në ushtrimin e detyrës ashtu sikurse mohim të së drejtës së pronarëve të objekteve për vlerësimin e shpronësimin e drejtë të tyre”, deklaroi pasditen e djeshme ARRSH.

“Rama urdhëroi gjyq me dyer të mbyllura”

Deputetët e LSI-së dëmuan dhunën e ushtruar ndaj protestuesit 18 vjeçar, që doli para gjykatës për masën e arrestit. “Rama urdhëroi që gjyqi të bëhej me dyer të mbyllura. Është tipi gjyq politik që bëhej në kohën e diktaturës. E urdhëroi për një arsye, që opinioni publik mos njihet me realitetin e ushtrimit të dhunës ndaj Danjelit”, tha Brahimllari i LSI-së. Ndërkohë, deputetja e LSI-së Kejdi Mehmetaj përmes një postimi në “Facebook”, shkruan se dhuna është fytyra e vërtetë e qeverisë kriminale. “Dhuna është fytyra e vërtetë e qeverisë kriminale “Rama”. Danjeli që protestonte për banesën dhunohet barbarisht në furgonin e policisë së shtetit. Askush të mos ia falë Edi Ramës, dhimbjen e këtij djali dhe të gjithë familjeve të “Unazës së Re”!”, shkruan Mehmetaj.