Aktuale
Reagon Komuna e Ferizajt: MMPH kërkoi vetëm harmonizim të vendimit për lokacionin e spitalit të ri

Komuna e Ferizajt ka reaguar pasi Ministria e Mjedisit dhe Planifikimit Hapësinor e vlerësoi si të jashtëligjshëm vendimin për ndërrim të lokacionit për ndërtimin e spitalit të qytetit.
Sipas kësaj komune, “MMPH ka kërkuar vetëm harmonizim të vendimit të Kuvendit për parcelën ku do të ndërtohet spitali i ri rajonal dhe nuk paraqet kundërshtim të plotë të vendimit”
Në njoftim të kësaj komune theksohet se “shkresa është dërguar pas tejkalimit të afatit ligjor 15 ditor dhe sipas Rregullores së Qeverisë së Kosovës për shqyrtimin administrativ të akteve të komunave, mos-përgjigjja në afat ligjor nënkupton miratimin e aktit, apo hyrjes në fuqi”.
“Kryetari i Komunës së Ferizajt, Agim Aliu është i vendosur në mbrojtjen e interesit publik lidhur me vendimin e Kuvendit të Komunës, dhe zbatimit dhe mbrojtjes së parimit të ligjshmërisë, shembujt e së cilës janë të njohura për qytetarët si standard që bën diferencën e kësaj qeverisje nga qeverisja e kaluar. Qytetarët ferizajas janë të vetëdijshëm për rëndësinë e këtij projekti strategjik dhe vështirësitë përmes së cilave ka kaluar ky proces”, thuhet më tej në reagim, transmeton KP. “Thirrjet e tjera dhe kauzat personale nga opozita jo konstruktive dhe e papërgjegjshme karshi interesave qytetare, që la pa realizuar këtë projekt tejet të rëndësishëm duke e bastarduar atë si projekt dhe ide, janë thirrje të dëshpëruara, dashakeqe të interesit qytetar dhe të ngutshme, kur kemi parasysh faktin se gjithë ky proces nuk ka marr epilog përfundimtar dhe se do të procedohet nga ana jonë sipas parashikimeve të ligjeve në fuqi”.
Pavarësisht se komuna e Ferizajt thotë se MMPH ka kërkuar vetëm harmonizim të vendimit për ndryshim lokacioni, në letrën e MMPH-së thuhet se “MMPH pas shqyrtimit të përmbajtjes së aktit të komunës, vlerëson se akti i komunës është në kundërshtim me dispozitat e legjislacionit në fuqi”.
Aty po ashtu theksohet se “Vendimi i Kuvendit të Komunës së Ferizajt 01 Nr.61 datë 30.03.2018 për anulimin e vendimit të kuvendit komunal 01 Nr.73 të datës 30.04.2014 është në kundërshtim sepse Preambulës i mungon baza ligjore në bazë të cilave dispozita është anuluar i njëjti”.
Në fund të letrës, MMPH i ka propozuar MAPL-së që të kërkojë nga Kuvendi i Komunës të ndërmarrë veprime konkrete që aktin e komunës ta harmonizojë me dispozitat ligjore në fuqi, brenda 30 ditësh nga data e pranimit të kërkesës për rishqyrtim të aktit.
