Bekim Pireva, një biznesmen i arrestuar të enjten nga Policia e Kosovës nën dyshimet për përfshirje në aferën “Brezovica”, është liruar nga mbajtja policore.
Vendimi është nxjerrë sot nga Gjykata Themelore në Ferizaj, mbështetur në kërkesën e prokurorit të rastit, Rasim Maloku.
Lajmin për Paparacin në një bisedë telefonike e ka konfirmuar Arber Shala, avokati i biznesmenit Pireva.
“Klienti im ka qenë në ndalim me vendim të Prokurorisë edhe sot është mbajtur seanca dëgjimore dhe me vendim të gjykatës është liruar”, tha shkurtimisht ai për Paparacin.
Pireva dyshohet për “dhënie të ryshfetit”, por ai ka pranuar fajësinë për këtë vepër penale dhe bashkëpunimin me Prokurorinë.
Sipas Prokurorisë Themelore të Ferizajt, Bekim Pireva dyshohet se më 2017-n i ka dhënë ryshfet Bratislav Nikoliqit – “Braçës”, ish-kryetarit të Komunës së Shtërpcës.
“Ekziston dyshimi i bazuar se në vitin 2017, në mënyrë të tërthortë i ka dhënë para personit zyrtar që të veprojë në kundërshtim me detyrën e tij zyrtare në atë mënyrë që përmes një personi tjetër i ka dhënë 10 mijë euro të pandehurit Bratisllav Nikoliq për të ia mundësuar marrjen e lejes ndërtimore në vikend-zonën e Brezovicës, të Parkut Kombëtar “Sharri” i cili ka ndërtuar në kundërshtim me ligjin për ndërtim, ligjin për ujërat e Kosovës, ligjin për mbrojtjen e mjedisit dhe ligjin për planin hapësinor të Parkut Kombëtar “Sharri”, shkruhet në dosjen e Prokurorisë.
Bekim Pireva sipas të dhënave agjencinë e regjistrimit të bizneseve në Kosovë (ARBK) është bashkëpronar i kompanisë “Premium Bau” Sh.P.K..
Policia e Kosovës ka vazhduar dje aksionin “Brezovica” ku ka arrestuar katër persona, në mesin e të cilëve edhe Xhelil Bekteshi, ish-sekretari i ministrisë së Infrastrukturës.
Kurse, dy të tjerët e arrestuar janë I.F. dhe Xh.Sh., raporton Paparaci.
Siç njoftoi Prokuroria, gjatë kontrollit në disa objekte janë gjetur dhe dhe konfiskuar: pushkë e gjuetisë, revole, telefon celular, laptop dhe dokumente të ndryshme.
Ndryshe, që nga dhjetori i vitit të kaluar, Policia e Kosovës së bashku me Prokurorinë Themelore të Ferizajt kanë nisur aksionin “Brezovica”, ku deri tani nën pranga janë vënë më shumë se 30 persona, përfshirë këtu ish kryetarin e komunës së Shtërpcës, Bratislav Nikoliq, zyrtarë tjerë të kësaj komune, e po ashtu zyrtarë të lartë të Ministrisë së Infrastrukturës./Media Ndërtimi.