Në gjykimin ndaj ish-drejtorit të Inspektoratit në Komunën së Fushë Kosovës dhe inspektoreve të ndërtimit, Valbona Ferati, Doruntina Dumani dhe Mobere Hyseni, të cilët po akuzohen për dallavere me leje ndërtimore, është aprovuar propozimi  i prokurores Merrushe Llugiqi, që të dëgjohen eksperti i ndërtimtarisë, Lulzim Dema dhe eksperti i gjeodezisë Ahmit Basholli.

Këtë propozim prokurorja LLugiqi e bëri gjatë seancës së të martës pasi që nga gjykatësja Naime Jashanica palëve në procedurë i dorëzoi nga një kopje të raportit ekspertizë nga fusha e ndërtimtarisë dhe gjeodezisë, raporton “Betimi për Drejtësi”.

“Propozoi që të ftohen ekspertët në një shqyrtim të radhës për të dhënë mendimin  e tyre dhe për të sqaruar gjetjet në këtë  ekspertize”, deklaroi prokurorja Llugiqi.

Paraprakisht gjykatësja Krasniqi- Jashanica njoftoi se, gjykata ka marrë një vendim për angazhim të ekspertëve të fushës së ndërtimtarisë  Lulzim Dema dhe Hamit Basholli për gjeodezisë për të marrë mendimin e tyre lidhur me objektin  e shqyrtimit në këtë çështje penale, ngase nga palët në procedurë ka munguar raporti i ekspertimit.

Andaj, sipas gjykatës Krasniqi-Jashanica  në fazën për plotësim të provave në vështrim të dispozitave ligjore gjykata ka siguruar një raport ekspertizë.

Ndërsa, avokatja Merita Stublla-Emini, e cila zëvendëson me autorizim mbrojtësen e Dorutina Dumanit, avokaten Albana Kelmendi  ka thënë se nuk po e sheh të arsyeshme që të ftohen ekspertët sepse të njëjtët i kanë dhënë sqarimet e tyre në aspektin profesional sipas profilit të tyre të ekspertizës dhe pikërisht në bazë të aktvendimit të nxjerrë nga kjo gjykatë me detyra të sakta për të njëjtit .

Ndërsa e njëjta tha sa i përket ekspertizës së gjeodezisë nuk e kanë për të cilën gjykatësja Krasniqi-Jashanica tha se eksperti i gjeodezisë do ta sjellë ose nëse ka dilema do të vij personalisht.

Po ashtu,  të akuzuarit Krasniqi, Ferati dhe Hyseni deklaruan se nuk janë që të ftohen ekspertët.

Në fund, trupi gjykues i udhëhequr nga gjykatësja Naime Krasniqi-Jashanica aprovuan propozimin për dëgjimin e ekspertëve, Lulzim Dema për fushën e ndërtimtarisë dhe Hamit Basholli për fushën e gjeodezisë.

Seanca e radhës pritet të mbahet më 4 maj 2022.

Sipas aktakuzës së ngritur më 14 dhjetor 2016, të akuzuarat Mobere Hyseni dhe Doruntina Dumani, në cilësinë e inspektoreve të ndërtimit, në Drejtorinë e Inspeksionit në Fushë Kosovë, përgjegjëse për rrugën “Shefki Kuleta” dhe “Nëna Terezë”, në Fushë Kosovë, nuk e kanë përmbushur detyrën e tyre zyrtare që kanë qenë të obliguara ta kryejnë në bazë të detyrave të tyre zyrtare.

Dumani dhe Hyseni, gjatë vizitës së punishtes më 30 maj 2014, kanë marrë pjesë në vendosjen e pikave të ndërtimit për ndërtimin e objektit numër l, sipas lejes ndërtimore të “Princesha Construstion”, dhe kanë bërë zhvendosjen e këtij objekti nga pikat e parapara sipas lejes dhe vijës ndërtimore të lëshuar nga Drejtoria për Planifikim Urban e Komunës së Fushë Kosovës.

Ndërsa, Valbona Ferati, Doruntina Dumani si inspektore të ndërtimit dhe Afrim Krasniqi në cilësinë e drejtorit të departamentit të ndërtimit, gjatë periudhës kohore 2015-2016, nuk i kanë ndërprerë punimet kundërligjore dhe nuk kanë nxjerrë vendim për rrënim, duke i mundësuar në këtë mënyrë “Princesha Construction”, të përfitojë nga ndërtimet kundërligjore në dy objekte banesore tetë katëshe, i cili ka pasur tejkalimit të lejes ndërtimore.

Si rrjedhojë e kësaj, të akuzuarat Hyseni, Dumani dhe Ferati, thuhet se i kishin mundësuar investitorit të vazhdojnë ndërtimin e objekteve me tejkalim të lejes, t’i përfundojnë ndërtimet dhe të pajisen me leje plotësuese, duke mos respektuar lejet ndërtimore, për të cilin tejkalim ka qenë në njohuri edhe i akuzuari Krasniqi, mirëpo i njëjti nuk ka ndërmarrë asgjë për të parandaluar këtë ndërtim.

Po ashtu, në aktakuzë thuhet se të akuzuarat Ferati dhe Dumani kanë hartuar edhe procesverbale dhe vendime për rrënim edhe atë jo në fazën e hershme të ndërtimit, por këtë e kanë bërë në kohën kur objektet ishin në fazën e avancuar të ndërtimit.

Prokuroria katër të akuzuarit i ngarkon me veprën penale “Keqpërdorimi i pozitës apo autoritetit zyrtar”./Media Ndërtimi.