Për shkak se i akuzuari Driton Muharremi mungoi për shkaqe personale, ka dështuar të mbahet gjykimi për keqpërdorimin e fondeve të kompanisë “Llamkos”, ku po akuzohen Luan Berisha, Driton Muharremi, Ilir Pushka dhe Mehmet Sunguri.
Mungesën e të akuzuarit Muharremi e ka arsyetuar mbrojtësi i tij, avokati Florent Latifaj, i cili më 27 janar kishte paraqitur një parashtresë duke njoftuar gjykatën që i mbrojturi i tij nuk mund të jetë prezent në seancë për shkaqe personale, raporton “Betimi për Drejtësi”.
Në këto rrethana, gjykatësi i rastit Arben Hoti konstatoi se nuk janë plotësuar kushtet për mbajtjen e shqyrtimit gjyqësor. Andaj, seanca e së hënës u shty për 1 mars 2022.
Ndryshe, në këtë rast, akuzuar kanë qenë edhe Remzi Podvorica e Ramush Muli, si dhe A.K, mirëpo për ta është pushuar procedura.
Sipas prokurorisë, sipas urdhrit të të akuzuarit Luan Berisha, si drejtor i “Llamkos”, gjatë vitit 2005 kompanisë “Gani Trade”, në periudha të ndryshme i ishin paguar 172 mijë e 312 euro e 89 centë, si dhe në vitin 2006, të gjitha pagesat në shumë prej 125 mijë e 430 euro ishin paguar në para të gatshme nga arka e ndërmarrjes “Llamkos”, personit Venhar Jonuzi, duke paguar shumën prej 297 mijë e 742 euro.
Për këto veprime, Berisha po ngarkohet me veprën penale “Pastrimi i parave”.
Tutje, Luan Berisha, Driton Muharremi, A.K dhe Ilir Pushka thuhet se më 25 shkurt 2007, në këtë ndërmarrje kanë faturuar shitjen e mallit- llamarinë e zinkuar në ndërmarrjen fiktive “Shen”, si blerës, në vlerë të përgjithshme prej 487 mijë e 176 euro e 9 centë, ku pastaj një pjesë e mallit në shumë prej 224 mijë e 820 euro e 72 centë, me urdhrin e të pandehurit Berisha, është transportuar në depon e fabrikës së vajit “Alcon” në Ferizaj, me bashkëpronarë të pandehurit Muharremi, A.K dhe Pushka, të cilin mall ata asnjëherë nuk e kanë paguar dhe ende figuron si borxh ndaj “Llamkos”, me të cilat veprime të pandehurit Berisha, Muharremi, A.K dhe Pushka e kanë dëmtuar këtë ndërmarrje, në vlerë prej 224 mijë e 820 euro e 71 centë./Media Ndërtimi.