Kreu i AKP-së paguhet 4 mijë euro në muaj nga qytetarët, refuzon t’u ofrojë qasje atyre në dokumente publike

Kreu i Agjencia Kosovare e Privatizimit (AKP), Avni J. Jashari, po refuzon kundërligjshëm t’u ofrojë qytetarëve qasje në informacion dhe në dokumente publike, ndonëse paguhet prej taksave të tyre 4 mijë euro neto në muaj.

Tash e disa javë, Jashari nuk po pranon të deklarohet lidhur me dokumentet e prodhuara dhe të pranuara pas një takimi të fshehtë për publikun që ka mbajtur më 14 dhjetor 2021, me kryeshefin e Ndërmarrja Publike Banesore SH.A. Prishtinë (NPB), Hajdar Hoxha.

Sipas burimeve nga NPB-ja, takimi është realizuar në kuadër të përpjekjeve për të shtyrë përpara çështjet që lidhen me realizimin e projektit të dyshimtë 120-milionësh afaristo-banesor në Lakrishtë, që u ndërpre fundvitin e kaluar si rezultat i reagimit të banorëve pas skandalit mjedisor të shkatërrimit të azbestit kancerogjen që nxori në shesh dhjetëra pretendime të bazuara për shkelje dhe keqpërdorime të tjera. Rasti po hetohet nga Prokuroria Speciale.

I kontaktuar përmes telefonit disa ditë pasi i kishte pranuar pyetjet me e-mail, zëvendësi i drejtorit menaxhues që aktualisht drejton AKP-në, Avni J. Jashari, duke përdorur qasje diskriminuese e selektive nuk ka pranuar të ofrojë informacion që i garantohet sipas ligjit secilit qytetar, pavarësisht profesionit ose statusit të tij.

“Pyetjet i keni dërgu si qytetar e jo si gazetar i RTK-së. Nëse i dërgon si gazetar i RTK-së me kopje qysh i kini po besoj që dikush prej AKP-së ju përgjigjet”, ka deklaruar Jashari më 31 dhjetor 2021 ndërkohë që më nuk është lajmëruar në thirrjet telefonike. (VIDEO)⤵️

Përgjigjja e Jasharit është në kundërshtim të plotë me ligji nr. 06/l-081 për qasje në dokumente publike që specifikisht në nenin 1  “garanton të drejtën e secilit person, pa diskriminim mbi çfarëdo baze, për të pasur qasje në dokumente publike, të prodhuara, pranuara, mbajtura apo kontrolluara nga institucionet publike, si dhe të drejtën për ripërdorimin e dokumenteve të sektorit publik”.

Neni 4 paragrafi 5 i këtij ligji poashtu specifikon se “e drejta për qasje në dokumente publike i takon secilit person në mënyrë të njëjtë dhe të barabartë. Institucionet publike nuk favorizojnë askënd në ushtrimin e të drejtës për qasje në dokumente në krahasim me të tjerët”.

Lidhur me takimin e mbajtur pa njoftim të medieve, nuk ka pranuar të deklarohet as kryeshefi ekzekutiv i Ndërmarrjes Publike Banesore, Hajdar Hoxhaj.  Sikurse çdo herë tjetër kur është i është kërkuar të përgjigjet rreth projektit të dyshimtë afaristo-banesor, Hoxhaj edhe kësaj radhe ka refuzuar të deklarohet me arsyetimin se është i zënë teksa e ka mbyllur telefonin. (VIDEO)⤵️

Kujtojmë se telefonatat janë realizuar 9 ditë pasi në e-mailet zyrtare të Jasharit e Hoxhajt dhe të agjencive që drejtojnë u janë dërguar pyetjet në formë të shkruar.

Dy drejtuesit e agjencive nuk  janë përgjigjur brenda afatit ligjor as pas kërkesave të tjera për qasje në dokumentet publike, drejtuar përmes e-mailit më 05 janar 2022.

Ligji për qasje në dokumente publike, specifikon se institucioni publik detyrohet që brenda shtatë (7) ditëve prej kohës së regjistrimit të kërkesës, të nxjerrë vendim për lejimin e qasjes në dokumentin e kërkuar ose të nxjerrë vendim të arsyetuar për refuzimin e plotë apo të pjesshëm dhe informon kërkuesin për të drejtën që ai ka për të kërkuar rishqyrtimin e kërkesës si dhe kur dhe ku të paraqitet kërkesa e tillë.

Në shkrimet e radhës:

Si po tentojnë AKP-ja dhe NPB-ja ta ndryshojë gjendjen kadastrale në terren ku planifikohet ndërtimi i projektit afaristo- banesor përkundër parregullsive pronësore dhe faktit se kjo lëndë po hetohet për keqpërdorime dhe nuk ka marr epilog nga Prokuroria Speciale.

(Artikull i shkruar nga gazetari Arsim Halili)./Media Ndërtimi.