Bahçet e vogla mbesin shkëndijë nostalgjike në kujtesën kolektive. Dikur pjesë e pandashme e oborrit të pothuajse çdo dytës shtëpi, bahçet po shuhen çdo ditë e më shumë.
Pandemia dhe izolimi nëpër shtëpi ka sjellë një hov të madh në rikthimin e këtij aktiviteti.
Kultivimi i pemëve dhe perimeve nëpër bahçe përgjatë historisë ka qenë jo vetëm aktivitet agrar, por edhe mënyrë jetese e mbijetese. Modernizimi i prodhimit dhe krijimi i familjeve bashkëkohore ka bërë që bahcet të shuheshin dalë ngadalë si fenomen shoqëror.
Por, perimet shumëngjyrëshe në këndet e vogla e në bahçe i rimugulloi pandemia.
Me lockdown-in u krijuan dhe rikrijuan qoshe të tilla nëpër oborre të shtëpive, të cilat aq sa konsiderohen remishente aq edhe ndihmuan njerëzit që ta tejkalojnë izolimin.
Për të ‘thyer’ karantinën, për të siguruar ushqim të shëndetshëm si masë parandaluese ndaj infektimit dhe për të shmangur kontaktin me gjësende nga jashtë, familja Shala nga Treboviqi i Pejës në oborrin e tyre kanë ngritur një strehë najloni për perimet, raporton Kallxo.com.
Prej kur kanë vënë farën e bahçes në mars të vitit 2020, familja Shala vazhdon që burimin kryesor të ushqimeve në tavolinën e tyre t’i kenë nga ‘krijesa e karantinës’, bahçja.
Që nga fillimi i pranverës deri në fund të vjeshtës ata kultivojnë shumicën e perimeve që i përshtaten klimës kontinentale të Kosovës: domate, speca, patate, karrota, tranguj, qepë, kunguj e majdanoz. Ndërsa gjatë dimrit veçse i kanë të gatshme për përdorim.
Edhe pse është pothuajse fillimi i dimrit, bahçja e familjes Shala ende është e gjelbër e prej të cilës ende po këputin perime.
“Ne kemi pas fatin që izolimin e kemi shndërruar në diçka pozitive, që të bënë të ndjehesh mirë. 10 minuta të kaluara në bahçe të largonin 10 minuta nga shqetësimi, dezinformimet, teoritë konspirative mbi virusin, realitetin e kohës e shumë gjëra tjera” tha Medina, njëra nga anëtaret e familjes.
Sipas një ankete për ekonominë bujqësore nga ASK për vitin 2020, nga gjithsej tokë e punueshme prej 188 371,71 hektarë në Kosovë, rreth 10 mijë hektarë janë të mbjellura me perime në fushë të hapur, në serra dhe kopshte.
Megjithatë, agronomi konstaton se numri i familjeve që merret me bujqësinë tradicionale ka shënuar rënie për shkak të profitabilitetit të ulët në fermat e vogla, kostos së lartë oportune por edhe për shkak të faktorëve tjerë ekonomik dhe shoqëror./Media Ndërtimi.