Ministri i Infrastrukturës, Liburn Aliu ka deklaruar se zyrtarisht s’ka marrëveshje të nënshkruar për ndërtimin e rrugës Deçan-Plavë.
Aliu ka sqaruar përmes një konference për media se kishte pasur disa takime me homologun e tij nga Mali i Zi ku është diskutuar çështja e ndërtimit të rrugës si e domosdoshme për banorët e të dy zonave malore.
“Fatkeqësisht, nuk ka asnjë marrëveshje në mes të Kosovës dhe Malit të Zi për rrugën Deçan Plavë. Rruga aktuale e paasfaltuar është Deçan-Bjeshkë, sepse projekti është deri në Kufij. Në pjesë tjetër ne, nuk e dimë as sa ka me qenë traseja. Ne do ta përfundojmë projektin Deçan-Bjeshkë, prandaj duhet me pa me Malin e Zi se sa janë të gatshëm ata që ta asfaltojnë pjesën tjetër. Natyrisht, do të këmbëngulim që të realizohet ky projekt”, theksoi ministri Aliu.
Në emër të kësaj rruge ka ndodh edhe një problem tjetër, deklaroi tutje ministri.
“Zona e Manastirit të Deçanit e ka detyrua kryetarin aktual të Deçanit dhe ministrin (Pal Lekaj) që ta ndërtojnë një By Pass për rrugë Deçan-Bjeshkë vetëm se Manastriti ka konstatuar se kjo rrugë të ofron me Plavën. Dhe, zyrtarisht nuk ka projekt të rrugës Deçan-Plavë”, tha Aliu.
Ministri i Infrastrukturës, në maj të këtij viti e ka quajtur të rrezikshëm ndërtimin e rrugës Deçan-Plavë mbi bazën e kërkesës së Kishës Ortodokse serbe.
Ai gjatë seancës së Kuvendit të Kosovës,të mbajtur dje tha se nuk është ndaluar buxheti për ndërtimin e kësaj rruge, por janë kundër idesë që të ndërtohet bypass-i 18 kilometra në vend të atij prej 6 kilometrave brenda zonës së mbrojtur.
“Nuk e kemi ndal buxhetin aspak. Ideja është të ndërtohet një rrugë 18 kilometra në vend të 6 kilometra brenda zonës së mbrojtur nëpër male dhe bjeshkë. Pse? Për shkak se kalon kah disa prona të caktuara. Kjo është gabim, sepse krijojmë një precedent të rrezikshëm dhe kudo që kemi zona të veçanta do të kërkojë të bëjmë bypass”, u shpreh ai.
Këtë deklarim të ministrit, e quajti gënjeshtër kryetari i AAK-së, Ramush Haradinaj, i cili tha i njëjti me këtë vendin po i shërben Beogradit.
“Po mundohesh, më fal për fjalorin, me na rrejt në sy edhe neve banorët atje. Mos! Nuk mundemi të të lejojmë, ndoshta unë të lejoj, por nuk mundem për hatër të atyre njerëzve. Rruga që na lidh me Plavë vazhdon nëpër bjeshkë, janë asfaltuar një numër i caktuar i kilometrave, mos e lidh me kishë. Edhe Beogradi po dëshiron me lidh me kishë për të na vonuar. Ti je kah dëshiron. Je duke ia hequr buxhetin. Dy herë ia ke larguar. Nëse të ka shti Beogradi tregona, a e ki aty problemin dhe po të falim. Ama, bash ashtu je duke bërë”, tha ai./ Media Ndërtimi.